Read Biatah Bidayuh TIBIRIK 13 Bible Online

TIBIRIK 13 - Biatah Bidayuh bible

TIBIRIK 13

¹Abram panu ka utara ruah so Egypt di ka parad siratan tarun tana Canaan ngga sawŭn-i ka ngga sopŭrŭg buat-rata adi-i dapu, ka Lot sua ngga ayŭh.

²Abram inŭh daya adi raru kaya; ayŭh biyŭn bagŭ biri, kambing, ka sapi, samŭn mas pirak.

³Ayŭh tingge tarun anŭ, bipindah so tarun ndi di ka tarun andi nuju Bethel. Ayŭh mandŭg ka tarun tana adi di asah Bethel ngga Ai, tarun adi ko-i yŭn bibari dawŭ-i,

⁴ka mbŭh pijog ndi mija-sambah. Diginŭ ayŭh nyambah TUHAN.

⁵Lot biyŭn gŭh biri, kambing ngga sapi, ka rawang adŭp-i samŭn daya-gaji.

⁶Ngapŭi tarun tana kupai mbŭh dŭh sadang yŭn duwŭh rawang anŭ briyŭn rŭŭ, amai dāng ngara mbŭh raru bagŭ.

⁷Ka kaii timbur di dupan daya adi jaga dāng Abraham ngga daya adi jaga dāng Lot. (Di tipuh anŭ daya Canaan ngga daya Periz gibabŭ rŭŭ di tarun tana anŭ.)

⁸Jadi Abram nang di Lot, “Ata ati bikada, ka daya mu ngga daya ku dŭh patut bikaii.

⁹Ngapŭi ata birakang adŭ. Mien tadŭ tadŭ parad tarun tana adi raan mu. Kuu di ka parad ndi, aku di ka parad andi.”

¹⁰ Lot tingga ndi abong tarun anŭ, ka-i kiris ndi tarun tarun Rubān Jordan ndŭg abong Zoar biyŭn bagŭ piin, mun Teya TUHAN,[27] puan kah mun tarun tana Egypt. (Anŭ inŭh tipuh adi diŭ so TUHAN pirabur kupo Sodom ngga kupo Gomorrah.)

¹¹Jadi Lot kubo ngaku Rubān Jordan, ka bipindah jeh ka parad timor. Simŭnŭ inŭh gaya ngara duwŭh birakang.

¹²Abram rŭŭ di tana Canaan, ka Lot rŭŭ di gadung kupo kupo di rubān anŭ, ka bibari sindŭk Sodom,

¹³adi puno ngga daya ginaka ngga adi bidosa rawan TUHAN.

¹⁴Ripas Lot mbŭh bu, TUHAN nang di Abram, “So tarun adi yŭn mu madin, nakit meh tingga sopŭrŭg parad tarun.

¹⁵ Aku re nggen di kuu ngga di sopŭrŭg sesang mu, sopŭrŭg tarun tana adi kuu kiris anŭ, ka-i re adu adu jadi tung jamu.

¹⁶Aku re nggen bagŭ turap sesang di kuu ndŭg ka mating daya re tungang mirang sopŭrŭg ngara; nimun dabu tana dŭh tungang dog mirang simŭnŭ gŭh ngara dŭh tungang dog mirang!

¹⁷Panu meh di tingga ndi abong tarun tana anŭ, sabab Aku taŭn re kubo nggen-i di kuu.”

¹⁸Ngapŭi Abram mindah bari-i ka rŭŭ sindŭk dudu tŭngŭn kayuh pirapu' Mamre di Hebron, ka diginŭ gŭh ayŭh pijog ndi mija-sambah yŭn TUHAN.