Read Biatah Bidayuh TIBIRIK 14 Bible Online

TIBIRIK 14 - Biatah Bidayuh bible

TIBIRIK 14

¹Pat naan raja, Amraphel so Babylonia, Arioch so Ellasar, Chedorlaomer so Elam, ka Tidal so Goiim,

²matak biperang rawan rimŭh naan raja adi bŭkŭn: Bera so Sodom, Birsha so Gomorrah, Shinah so Admah, Shemeber so Zeboiim, ka raja so Bela (puan kah Zoar.)

³Rimŭh naan raja anŭ bipambit ka nguruk adŭp-i di Rubān Siddim, adi madin dog kadŭn Rawŭt Pide.

⁴Ngara mbŭh dog nguasa Chedorlaomer sitŭkŭd simŭng duwŭh sawa, pak ngga sawa adi simŭng taruh ngara rawan ayŭh.

⁵Ngga sawa adi simŭng pat, raja Chedorlaomer ngga bara pambit-i ngarah Rephaim di Ashteroth Karnaim, daya Zuzim di Ham, daya Emim di rabak Kiriathaim,

⁶samŭn daya Hor di darŭd Edom, tadak ngara ndŭg tarun tana Elparan di bŭngŭn tarun tana-pajam.

⁷Komŭnŭ ngara pari ka mandŭg ka Kadesh (nganŭ dog kadŭn Enmishpat.) Ngara sirabut sopŭrŭg tarun tana daya Amalek ka ngarah daya Amor adi rŭŭ di Hazazon Tamar.

⁸Komŭnŭ raja raja so Sodom, Gomorrah, Admah, Zeboiim, ka Bela taban bara soldadu ngara ka biperang di gadung Rubān Siddim,

⁹rawan raja raja Elam, Goiim, Babylonia, ka Ellasar; rimŭh naan raja rawan pat naan raja.

¹⁰Rubān anŭ mbŭh puno ngga rubang tar, ka kan raja Sodom ngga raja Gomorrah bu mangān perang anŭ, ngara rabu ka darŭm rubang anŭ, pak raja adi taruh naan anŭ ruah ka bu di ka darŭd.

¹¹Raja anŭ adi pat naan tambit sopŭrŭg kayuh adi agi di Sodom ngga Gomorrah, samŭn dudu pinguman taban ngga bu.

¹²Lot, anak jurud Abram mbŭh rŭŭ di Sodom, ka ngara taban ayŭh ngga bu, samŭn sopŭrŭg buat rata-i.

¹³Pak ndi naan daya dapŭd pirupas adŭp-i ka kidaan sopŭrŭg kayuh anŭ di Abram, adi daya Hebrew, adi rŭŭ sindŭk tŭngŭn kayuh pirapu' adi dog dapu Mamre daya Amor. Mamre ngga jurud-i Eshcol ngga Aner inŭh pambit Abram.

¹⁴Kan Abram dingah anak jurud-i mbŭh dog nakap, ayŭh nguruk sopŭrŭg daya-i adi pandai birawan. Prungun-i 318 naan, ka tadak raja anŭ adi pat naan jeh ndŭg Dan.

¹⁵Diginŭ ayŭh kutung bara-i ngga tibaran, nyerang pinganyu singarŭm, ka ngarah ngara. Ayŭh tadak ngara ndŭg Hobah, di utara Damascus,

¹⁶ka tambit pari sopŭrŭg kayuh adi muko dog sirapas. Ayŭh taban mari gŭh anak jurud-i Lot, ngga buat rata-i, samŭn bara dayung ngga bara daya-takap adi bŭkŭn.

¹⁷Kan Abram mbŭh mari ripas pimanang-i rawan Chedorlaomer samŭn raja raja adi bŭkŭn, raja so Sodom mandŭg di bidapŭd ngga ayŭh di Rubān Shaveh (adi dog kadŭn Rubān Raja gŭh).

¹⁸Melchizedek adi raja so Salem, ka adi imam gŭh yŭn Tapa adi Sambu Sopŭrŭg, taban ruti ngga wain ka Abram,

¹⁹nyiberkat ayŭh, ka nang, “Isa-i Tapa adi Sambu Sopŭrŭg, adi napa rangit ngga ong, nyiberkat Abram!

²⁰ Isa-i Tapa adi Sambu Sopŭrŭg, adi bada kuu manang rawan pinganyu mu, dog muji!” Ka Abram nggen di Melchizedek ndi utung-so-simŭng so sopŭrŭg kayuh sirapas adi mbŭh-i dapŭd tambit pari.

²¹Raja Sodom nang di Abram, “Nyikŭn nŭh adŭ sopŭrŭg kayuh sirapas anŭ, pak nggen pari ka aku sopŭrŭg daya ku.”

²²Abram nam, “Aku ngga siabo atin ku bipayu di sirung jawin TUHAN, Tapa adi Sambu Sopŭrŭg, Pinapa rangit ngga ong,

²³aku dŭh re nyikŭn tadŭ tadŭ kayuh adi kuu dapu; ndŭg ka sirah tiburi bait taris kasut mu aku dŭh re nyikŭn. Isa andu bŭkŭn, kuu dŭh bisa nang, ‘Aku inŭh adi bada Abram kaya.’

²⁴Aku dŭh re tambit ani ani yŭn adŭp ku, adŭ anŭ adi bara daya ku ko pakai. Pak bada bara pambit ku, Aner, Eshcol ka Mamre, tambit utung ngara.”