Read Biatah Bidayuh TIBIRIK 16 Bible Online

TIBIRIK 16 - Biatah Bidayuh bible

TIBIRIK 16

¹Sarai, adi sawŭn Abram, dŭh biranak. Sarai agi ndi naan dayung urun bangsa daya Egypt dŭn Hagar,

²ka-i nang di Abram, “TUHAN mbŭh bitan aku biranak. Kana kuu nyibŭŭs ngga urun ku adŭ. Kadŭ ayŭh bisa dapŭd anak yŭn ku.” Abram situju ngga pinganang Sarai.

³Jadi Sarai nggen Hagar di banŭh-i da jadi dayung nyikŭn-i. (Nganŭ Abram mbŭh simŭng sawa rŭŭ di tarun tana Canaan.)

⁴Abram nyibŭŭs ngga Hagar, ka ayŭh bite. Kan ayŭh kinyam adŭp-i mbŭh bite, ayŭh jadi sambuh ka ngamun Sarai.

⁵Jadi Sarai nang di Abram, “Sitagar mu inŭh Hagar ngamun aku.[28] Adŭp ku nggen ayŭh di kuu, ka tan ayŭh mbŭh bite ayŭh ari ngamun aku. Isa-i TUHAN tingga asi so ata duwŭh adi batur, kuu kah aku!”

⁶Abram nam, “Sawŭ, ayŭh anŭ urun mu, ka di ribo kuasa mu; sikamun kamun mu ngga ayŭh.” Jadi Sarai mbŭh barang ka mun-i ngga Hagar ndŭg ka ayŭh bu adŭ.

⁷Malaikat TUHAN bidapŭd ngga Hagar sindŭk rubang piin di tarun tana-pajam, di aran nuju Shur,

⁸ka nang, “Hagar urun Sarai, so ki kuu ka re kamaki kuu?” Ayŭh nam, “Aku bu so ramin tuan ku Sarai.”

⁹Malaikat TUHAN nang, “Pari ka babŭ bituan di ayŭh.”

¹⁰Komŭnŭ ayŭh nang, “Aku re bada sesang mu papah ndŭg ka-i dŭh tungang dog mirang.

¹¹Kuu re biyŭn ndi anak dari, ka re kadŭn ayŭh Ishmael,[29] amai TUHAN mbŭh dingah pinyusah mu.

¹²Pak anak dari mu re udip keya ka kaldi tarun; ayŭh re rawan daya, ka daya re rawan ayŭh. Ayŭh re udip jo so jurud madis-i.”

¹³Hagar siken darŭm asŭng-i, “Aku mbŭh sawŭ kiris Tapa kani, ka babŭ udip re piagah pasar Ayŭh?” Ngapŭi ayŭh kadŭn TUHAN, adi muko minyu ngga adŭp-i, “Tapa adi Kiris.”

¹⁴Ngapŭi daya kadŭn prigi anŭ di asah Kadesh ngga Bered “Prigi Nyanŭ adi Udip adi Kiris Aku.”

¹⁵ Hagar biranak ndi anak dari yŭn Abram ka kadŭn-i Ishmael.

¹⁶Nganŭ Abram mbŭh 86 sawa.