Read Biatah Bidayuh TIBIRIK 17 Bible Online

TIBIRIK 17 - Biatah Bidayuh bible

TIBIRIK 17

¹Kan Abram mbŭh prii puru-prii sawa umbur-i, TUHAN pinandŭng adŭp-i di ayŭh ka nang, “Aku ati Tapa Bisa-pŭrŭg. Nundok di Aku ka ndai kayuh adi batur.

²Aku re ndai simanya Ku ngga kuu ka nggen di kuu bagŭ sesang.”

³Abram mutu ubak-i ndŭg ka jawin-i dog tana, ka Tapa nang,

⁴“Aku ndai simanya ati ngga kuu: Aku bijanji kuu re jadi babuk yŭn bagŭ bangsa.

⁵ Dŭn mu dŭh tia Abram, pak Abraham,[30] sabab Aku bada kuu jadi pingubak bagŭ bangsa.

⁶Aku re nggen di kuu bagŭ sesang, ka kada so ngara anŭ re jadi raja. Kuu re biyŭn raru bagŭ sesang ndŭg ka ngara anŭ re jadi bagŭ bangsa.”

⁷ “Aku re kingat janji Ku di kuu ka di sesang mu di turap turap adi re, da jadi simanya adi tan adu adu. Aku re jadi Tapa mu ka Tapa bara sesang mu.

⁸ Aku re nggen di kuu ka di sesang mu tana ati adi yŭn mu madin jadi daya pinami. Ndi tarun tana Canaan re adu adu dog dapu bara sesang mu, ka Aku re jadi Tapa ngara.”

⁹Tapa nang di Abraham, “Kuu dŭh siŭn dŭh gŭh an situju samah sita simanya anŭ ngga Aku, adŭp mu ngga bara sesang mu ndŭg turap adi re.

¹⁰ Kuu ngga sesang mu dŭh siŭn dŭh gŭh an situju nyunat barang naan anak dari ngan.

¹¹So madin kuu dŭh siŭn dŭh nyunat barang naan anak dari kan umbur ngara mbŭh mai andu, samŭn urun urun adi dog biranak di ramin mu, samŭn urun urun adi miris mu so daya pinami. Anŭ meh adi re jadi tandā simanya adi Aku mbŭh ndai ngga kuu.

¹³Barang naan dŭh siŭn dŭh dog nyunat, ka ati re jadi tandā pŭrŭng adi kiren simanya Ku ngga kuu agi tan adu adu.

¹⁴Tadŭ tadŭ dari adi dŭh dog nyunat dŭh re dog nyirundeng daya Ku, sabab ayŭh dŭh sita simanya anŭ ngga Aku.”

¹⁵Tapa nang di Abraham, “Kuu dŭh siŭn tia bagan sawŭn mu Sarai; so madin dŭn-i inŭh Sarah.

¹⁶Aku re nyiberkat ayŭh, ka Aku re nggen di kuu ndi anak dari so ayŭh. Aku re nyiberkat ayŭh, ka ayŭh re jadi sindŭ dudu bangsa, ka re agi raja raja so turap sesang-i.”

¹⁷Abraham mutu ubak-i ndŭg ka jawin-i dog tana, pak tawŭh kan ayŭh pikir darŭm asŭng-i, “Tungang kah daya biyŭn anak kan umbur-i mbŭh siratus sawa? Tungang kah Sarah biyŭn anak kan umbur-i mbŭh prii puru sawa?”

¹⁸Ayŭh siken di Tapa, “Mani dŭh bada Ishmael jadi pimunān ku?”

¹⁹Pak Tapa nang, “Dŭh. Sawŭn mu Sarah re biranak ndi anak dari, ka kuu re kadŭn ayŭh Isaac.[31] Aku re adu adu sita simanya Ku ngga ayŭh ka ngga bara sesang-i. Anŭ inŭh simanya adi tan adu adu.

²⁰Aku mbŭh dingah pimite mu pasar Ishmael, Aku re nyiberkat ayŭh ka bada ayŭh biyŭn bagŭ anak ka bagŭ sesang. Ayŭh re jadi sama ngara adi simŭng duwŭh naan pingubak tibaran-asar, ka Aku re bada bara sesang-i jadi bangsa adi bās.

²¹Pak Aku re ingat simanya Ku ngga anak dari mu Isaac, adi re dog biranak so Sarah ngga arong munti sawa, sawa bauh.”

²²Kan Tapa muko minyu ngga Abraham, Tapa tingge ayŭh.

²³Andu anŭ gŭh Abraham tunda pinganang Tapa, ka nyunat anak dari-i Ishmael, ka sopŭrŭg dari adi bŭkŭn adi agi di rawang-i, samŭn bara urun-i adi dog biranak di ramin-i samŭn ngara anŭ adi-i ko miris.

²⁴Abraham mbŭh 99 sawa umbur-i adi ngga-i dog nyunat,

²⁵ka anak dari-i Ishmael 13 sawa.

²⁶So-duwŭh ngara dog nyunat di andu anŭ,

²⁷samah ngga sopŭrŭg urun Abraham.