Read Biatah Bidayuh TIBIRIK 18 Bible Online

TIBIRIK 18 - Biatah Bidayuh bible

TIBIRIK 18

¹TUHAN pinandŭng adŭp-I di Abraham di yŭn tŭngŭn kayuh pirapu' Mamre. Darŭm Abraham guru di baŭm tiban bari-i sitadŭn sura paras di andu anŭ,

² ayŭh pakat ubak-i ka kiris taruh naan daya mijog diginŭ. Kan-i kiris ngara anŭ, ayŭh bikaduh ruah di kambat ngara. Mutu ubak-i ndŭg ka jawin-i dog tana,

³ayŭh nang, “Tuan, turung dŭhnyah murah adŭ ramin ku; aku an ngidang angān.

⁴Isa aku di tambit piin ngga ngu kaja ngan; angān bisa rŭŭ digiti di ribo tŭngŭn kayuh ati.

⁵Aku re tambit gŭh kada pinguman isa-i nyibake angān kan angān pijuu pimanu ngan. Angān mbŭh stabi di aku amai tungang nyasa di bari ku; ngapŭi meh, bada aku ngidang angān.” Ngara nam, “Bisa; trima kaseh di kuu.”

⁶Abraham bigaut mŭrŭt ka darŭm bari-i ka nang di Sarah, “Rikas tambit ndi kandi tibaduk mu adi siabo kana ka ndai ruti.”

⁷Ka adŭp-i bikaduh di ka kaban dāng-i ka tambit ndi anak sapi adi gamu buang mara ka nggen-i di daya-gaji bada rikas sidia.

⁸Ayŭh tambit kada krim, sisuh, ka dagin, ka na pinguman anŭ di sirung jawin ngara. Di ribo tŭngŭn kayuh anŭ ayŭh ngidang ngara, ka ngara man.

⁹Komŭnŭ ngara siken di ayŭh, “Diki sawŭn mu Sarah?” Ayŭh nam, “Agi ayŭh diginŭ di darŭm bari.”

¹⁰ Ndi so ngara nang, “Prii buran so madin[32] aku re mandŭg dinge, ka sawŭn mu Sarah re biyŭn ndi anak dari.” Sarah agi di punok-i sindŭk tiban bari, nyiringa.

¹¹Abraham ngga Sarah taŭn mbŭh minyamba ka Sarah mbŭh dŭh tia kais nandā buran-i.

¹² Sarah tawŭh darŭm asŭng-i, “Madin aku mbŭh minyamba, tungang kah aku re pidundong pinyiraan ku babŭ puan dari? Ka dinge, banŭh ku mbŭh minyamba gŭh.”

¹³Jadi TUHAN siken di Abraham, “Mani Sarah tawŭh buang nang, ‘Bisa kah aku biyŭn anak darŭm aku mbŭh minyamba?’

¹⁴ Paŭh mbar kah kayuh di TUHAN? Nimun adi muko Aku nang, prii buran so madin Aku re mandŭg dinge, ka Sarah re biyŭn ndi anak dari.”

¹⁵Sabab Sarah mbŭh taru, ayŭh miman, “Mating aku tawŭh.” “Kuu sawŭ agi tawŭh,” Ayŭh nam.

¹⁶Jadi ngara anŭ bu panu di ka tarun tana adi yŭn ngara dapŭd nyirangga rais Sodom, ka Abraham nguru ngara ndŭg atang aran.

¹⁷Ka TUHAN nang darŭm asŭng-I, “Aku dŭh re sukan so Abraham kayuh adi re Ku ndai.

¹⁸Sesang-i re jadi bangsa adi bās ka bake ka so ayŭh Aku re nyiberkat sopŭrŭg bangsa.[33]

¹⁹Aku mbŭh mien ayŭh siŭn-i bisa pesan bara anak dari-i ngga bara sesang-i da nundok di Aku ka ndai kayuh adi batur ka patut. Kambŭi ngara ndai simŭnŭ, Aku re ndai barang masam kayuh yŭn-i nanyam adi muko Aku janji.”

²⁰Komŭnŭ TUHAN nang di Abraham, “Mbŭh agi pinganang adi raru bat nyarah Sodom ngga Gomorrah, ka taŭn sawŭ dosa ngara anŭ mbŭh raru bās.

²¹Aku dŭh siŭn dŭh mūn di tingga nang ka sawŭ kah dŭh pinganang anŭ adi Aku mbŭh dingah.”

²²Komŭnŭ duwŭh naan ngara anŭ bu ka panu nuju kupo Sodom, pak TUHAN babŭ ngga Abraham.

²³Abraham nyindŭk TUHAN ka siken, “Re Mai pirabur kah daya adi dŭh sarah ngga adi sarah?

²⁴Kambŭi agi 50 naan daya adi dŭh sarah di kupo anŭ, re Mai kubo pirabur kah kupo anŭ? Dŭh kah Kaam tandah adŭ ngga nyiramat ngara adi 50 naan?

²⁵Tatu Kaam dŭh re siŭ ngara adi dŭh sarah samah ngga ngara adi sarah. Dŭh-i bisa jadi simŭnŭ! Kaam dŭh bisa ndai simŭnŭ. Kambŭi Kaam sawŭ ndai simŭnŭ, gŭt-i daya adi dŭh sarah sua dog pirabur samah ngga daya adi sarah. Dŭh-i bisa jadi simŭnŭ. Arang ong ati an miratak ukum ngga tŭnggŭn.”

²⁶TUHAN nam, “Kambŭi Aku tungang dapŭd 50 naan daya adi dŭh sarah di Sodom, Aku bisa tandah adŭ kupo anŭ amai sabab ngara.”

²⁷Abraham minyu dinge: “Turung apun aku, amai aku pagan babŭ minyu ngga Kaam, TUHAN. Aku ati taŭn manusia ka dŭh patut nang ani ani.

²⁸Pak kadŭ-i 45 naan adŭ kani daya adi dŭh sarah, dŭh 50. Re Mai kubo pirabur kah kupo anŭ sabab-i mbŭh kurang 5?” TUHAN nam, “Aku dŭh re pirabur kupo anŭ kambŭi Aku tungang dapŭd 45 naan daya adi dŭh sarah.”

²⁹Abraham minyu dinge: “Kadŭ-i 40 naan adŭ kani.” Ayŭh nam, “Aku dŭh re pirabur-i kambŭi agi 40 naan.”

³⁰Abraham nang, “Turung dŭhnyah tuas TUHAN, pak aku dŭh siŭn dŭh minyu dinge. Munki kambŭi agi 30 naan adŭ?” Ayŭh nam, “Aku dŭh re pirabur-i kambŭi Aku dapŭd 30 naan.”

³¹Abraham nang, “Turung apun pinyipagan ku adi babŭ an minyu ngga TUHAN. Simuki meh kambŭi 20 naan adŭ dog dapŭd?” Ayŭh nang, “Aku dŭh re pirabur kupo anŭ kambŭi Aku tungang dapŭd 20 naan.”

³²Abraham nang, “Turung dŭhnyah tuas TUHAN, amai aku babŭ an minyu dŭm ndi sidah. Simuki kambŭi 10 naan adŭ dog dapŭd?” Ayŭh nang, “Aku dŭh re pirabur-i kambŭi agi 10 naan.”

³³Ripas-I muko minyu ngga Abraham, TUHAN bu, ka Abraham maad.