Read Biatah Bidayuh TIBIRIK 2 Bible Online

TIBIRIK 2 - Biatah Bidayuh bible

TIBIRIK 2

¹Jadi rangit ngga ong mbŭh kamas.

² Ngga andu adi ju sopŭrŭg kayuh adi Tapa napa mbŭh kamas ka Ayŭh mbŭh rŭŭ so kraja-I.

³ TUHAN Tapa nyiberkat andu adi ju anŭ ka bada-i jadi andu adi grua, amai di andu anŭ Ayŭh mbŭh ngamas pingandai-I ka rŭŭ so kraja.

⁴Simŭnŭ inŭh rangit ngga ong dog napa. Kan TUHAN[5] Tapa napa rangit ngga ong,

⁵gibabŭ mating kayuh timbu di tana ka mating ruwang kayuh timbu, amai TUHAN Tapa gibayuh nggen ujen, ka mating manusia re sita tana;

⁶adŭ-i piin adi ruah so darŭm tana adi misa-i.

⁷ TUHAN Tapa tambit tana[6] ka kakuk-i bada jadi manusia, ka rasu ngasŭng asŭng adi nggen udip ka darŭm rubang undung-i, ka manusia anŭ rasu udip.

⁸Muko anŭ TUHAN Tapa ndai ndi teya di Eden, tura ka timor, ka diginŭ Ayŭh na manusia adi-I ko napa.

⁹ TUHAN Tapa napa barang masam tŭngŭn kayuh adi ramus bada timbu diginŭ ka buān buwa adi kana. Di yun teya anŭ agi ndi tŭngŭn pimuruh adi nggen udip ka ndi tŭngŭn pimuruh adi nggen pinyipuan pasar kana ngga arap.[7]

¹⁰Ndi sungi aman di teya Eden ka misa teya anŭ; sungi anŭ agi bisakap pat di sapa teya Eden.

¹¹Sungi adi ndi dŭn Pishon, ka-i aman maning rais Havilah.

¹²(Tigŭrŭ mas bisa dog dapŭd di tarun tana anŭ; ka simŭnŭ gŭh wangi ngga batuh batuh brega.)

¹³Sungi adi duwŭh dŭn Gihon, aman maning rais Cush.[8]

¹⁴Sungi adi taruh dŭn Tigris, aman tura ka timor Assyria, ka sungi adi pat dŭn-i Euphrates.

¹⁵Komŭnŭ TUHAN Tapa na manusia di teya Eden da sita ka nguan-i.

¹⁶TUHAN Tapa pesan manusia, nang-I, “Kuu siŭn man tadŭ tadŭ buwa pimuruh di teya ati,

¹⁷adŭ-i tŭngŭn anŭ adi nggen pinyipuan pasar kana ngga arap kuu dŭh siŭn man; kambŭi kuu man kuu re kabŭs andu anŭ gŭh.”

¹⁸Jadi TUHAN Tapa nang, “Dŭh kana manusia ati rŭŭ sadi. Aku re napa ayō-i adi situgu ngga ayŭh, da turung ayŭh.”

¹⁹TUHAN Tapa tambit tana, rasu Ayŭh napa sopŭrŭg dāng ngga manuk ka taban ngara ka yŭn manusia anŭ da tingga ka nggen dŭn ngara; simŭnŭ inŭh ngara dapŭd dŭn ngara.

²⁰Jadi manusia nggen dŭn di sopŭrŭg manuk ngga dāng; pak sopŭrŭg ngara dŭh bisa jadi ayō-i adi bisa turung ayŭh.

²¹Jadi TUHAN Tapa bada dari anŭ bŭŭs rŭrŭ, ka sitadŭn ayŭh bŭŭs, Tapa tambit ndi turang tirasah-i ka bada arok-i marit.

²²Ngga turang tirasah anŭ Tapa pijadi ndi naan dayung ka taban ayŭh ka yŭn dari anŭ.

²³Rasu dari anŭ nang, “Siati inŭh kada ku adi brimun ngga adŭp ku. Turang so turang ku, isin so isin ku. ‘Dayung’ inŭh dŭn-i, amai-i dog tambit so pŭrŭng dari.”[9]

²⁴Sabab anŭ meh dari tingge sindŭ sama-i ka rŭŭ ngga sawŭn-i; ka ngara duwŭh jadi ndi pŭrŭng.

²⁵Dari ngga dayung anŭ sitabet sitagor, pak ngara dŭh puan mangŭh.