Read Biatah Bidayuh TIBIRIK 21 Bible Online

TIBIRIK 21 - Biatah Bidayuh bible

TIBIRIK 21

¹TUHAN nyiberkat Sarah, nanyam janji-i ngga ayŭh,

² ka ayŭh bite ka biranak ndi anak dari yŭn Abraham kan ayŭh mbŭh minyamba. Anak dari anŭ dog biranak di tika adi Tapa ko nang ayŭh taŭn re dog biranak.

³Abraham kadŭn ayŭh Isaac,

⁴ ka kan Isaac mbŭh mai andu umbur-i, Abraham nyunat ayŭh, nanyam ka pesan Tapa.

⁵Abraham mbŭh 100 sawa umbur-i kan Isaac dog biranak.

⁶Ka Sarah nang, “Tapa mbŭh nggen pinyigaŭn adi bada aku tawŭh.[38] Sopŭrŭg daya adi dingah kayuh ati re sua tawŭh ngga aku.”

⁷Komŭnŭ ayŭh nang, “Asi re kidaan di Abraham nang aku re mira biranak? Ka aku meh mbŭh biranak ndi anak dari yŭn-i, darŭm ayŭh mbŭh minyamba.”

⁸Anak anŭ masang baga, ka kan ayŭh mbŭh dŭh tia sisuh di sindŭ-i, Abraham ndai gawai bās.

⁹Agi ndi andu, Ishmael anak Abraham ngga dayung bangsa Egypt adi dŭn Hagar agi birubi ngga[39] Isaac anak Sarah.[40]

¹⁰ Kan Sarah kiris ngara duwŭh birubi, ayŭh nang di Abraham. “Pibu dayung urun anŭ ngga anak-i Ishmael so ti. Amai anak dari urun anŭ dŭh bisa sua dapŭd ani ani utung so buat-rata mu adi anak ku Isaac re dapu.”

¹¹Pinganang Sarah nyusah atin Abraham, amai Ishmael taŭn mbŭh anak adŭp-i gŭh.

¹² Pak Tapa minyu di Abraham, “Dŭhnyah kuu susah pasar anak mu Ishmael ngga urun mu Hagar. Tunda adŭ pinganang Sarah, amai so Isaac inŭh kuu re dapŭd bara sesang adi Aku muko janji di kuu.

¹³Aku re nggen bagŭ anak gŭh di anak dayung urun mu anŭ isa ngara bisa jadi ndi bangsa. Ayŭh anak mu gŭh.”

¹⁴Awar isan isan andu jawa ndi, Abraham nggen pinguman ngga piin ndi bŭrŭh-kurit ndu Hagar inged-i. Ayŭh na Ishmael di punok Hagar yŭn kabis ka bada ngara bu. Hagar bu ka bigandon di tarun tana-pajam Beersheba.

¹⁵Kan piin inged-i mbŭh abo nok-i, ayŭh pasan ka tingge anak-i di ribo anak tŭngŭn kayuh,

¹⁶ka guru atur 100 mita jo-i so ayŭh. Ayŭh minyu darŭm asŭng-i, “Dŭh aku raan kiris anak ku kabŭs.” Darŭm ayŭh guru diginŭ, ayŭh[41] rasu sien.

¹⁷Tapa dingah anak anŭ sien, ka malaikat Tapa minyu so rangit ngga Hagar, “Mani kuu susah Hagar? Dŭhnyah taru. Tapa mbŭh dingah anak mu sien.

¹⁸Makat meh ka di tambit anak anŭ ka nyaduh ayŭh. Aku re ndai ndi bangsa adi bās so sesang-i.”

¹⁹Jadi Tapa kuka batŭh Hagar ka ayŭh kiris ndi prigi. Ayŭh di ngisi bŭrŭh-kurit anŭ ngga piin, ka nggen piin anŭ di anak-i.

²⁰Tapa agi ngga anak anŭ sitadŭn ayŭh masang baga bigatung; ayŭh rŭŭ di tarun tana-pajam Paran ka jadi pingasū adi raru pandai.

²¹Sindŭ-i dapŭd ndi naan dayung daya Egypt ka nggen di ayŭh ndu sawŭn.

²² Di tipuh anŭ Abimelech ayō Phicol, adi pingibās bara soldadu-i, di tudu Abraham ka nang di ayŭh, “Tapa agi ngga kuu darŭm sopŭrŭg kayuh adi kuu ndai.

²³Sabab anŭ bipayu meh digiti di sirung jawin Tapa, nang adŭp mu dŭh re nipu aku, anak anak ku, ka bara sesang ku. Aku mbŭh tian-ti tŭtŭd ngga kuu. Ngapŭi bijanji meh ngga aku nang adŭp mu re tŭtŭd ngga aku ka ngga rais ati adi yŭn mu rŭŭ.”

²⁴Abraham nang, “Aku bijanji.”

²⁵Abraham ngadu di Abimelech pasar ndi prigi adi daya-gaji Abimelech mbŭh ngaku.

²⁶Abimelech nang, “Aku dŭh puan asi adi mbŭh ndai simŭnŭ. Kuu mating kidaan di aku; muran aku dingah pasar kayuh anŭ.”

²⁷Komŭnŭ Abraham nggen di Abimelech kada biri ngga sapi, ka ngara duwŭh rasu ndai pekat-janji.

²⁸Abraham nyidŭrŭ 7 anak biri so kaban biri-i,

²⁹ka Abimelech siken di ayŭh, “Mani kuu ndai simŭnŭ?”

³⁰Abraham nam, “Trima 7 anak biri ati. Darŭm kuu trima-i, kuu ngaku aku ati adi kareh prigi ati.”

³¹Ngapŭi meh tarun anŭ dog kadŭn Beersheba,[42] amai diginŭ inŭh ngara duwŭh ndai payu-i.

³²Ripas ngara muko ndai pekat-janji anŭ di Beersheba, Abimelech ngga Phicol pari ka Philistia.

³³Komŭnŭ Abraham purun ndi tŭngŭn tamarisk di Beersheba ka nyambah TUHAN, adi Tapa adi udip adu adu.

³⁴Abraham rŭŭ di Philistia mua tian-i.