Read Biatah Bidayuh TIBIRIK 23 Bible Online

TIBIRIK 23 - Biatah Bidayuh bible

TIBIRIK 23

¹Sarah udip ndŭg ka umbur-i mbŭh 127 sawa.

²Ayŭh kabŭs di Hebron di tana Canaan, ka Abraham ngurid di pinyikabŭs-i.

³Ayŭh tingge tarun adi yŭn tadang sawŭn-i, di ka yŭn bara daya Hitti, ka nang,

⁴ “Aku ati daya pinami rŭŭ bigaur ngga angān; jua di aku kada tana, yŭn ku bisa kubur sawŭn ku.”

⁶“Dingah kieh, tuan. Di kieh kaam mbŭh keya ka pingubak adi bikuasa; kubur sawŭn mai di kubur ami adi siabo kana. Tadŭ tadŭ kieh taŭn raan nggen ngga sanang asŭng ndi kubur di kaam, adi yŭn mai bisa kubur ayŭh.”

⁷Ka Abraham mutu ubak-i ka ngara

⁸buang nang, “Kambŭi angān raan bada aku kubur sawŭn ku digiti, turung mite Ephron anak dari Zohar,

⁹da jua di aku tang Machpelah di tura ka bŭngŭn tana-i. Bada ayŭh jua-i di aku ngga sipuno rega-i, digiti di sirung jawin ngan, isa aku bisa dapu-i ndu tana kubur.”

¹⁰Adŭp Ephron mbŭh agi guru ngga bara daya Hitti di tarun adi yŭn daya tikuruk di tiban-bās kupo; ayŭh nam di sirung jawin sopŭrŭg daya adi agi tikuruk diginŭ.

¹¹“Dingah, tuan; aku re nggen di kaam sopŭrŭg tana anŭ samŭn tang anŭ adi agi dieh. Digiti di sirung jawin bara daya ku, aku nggen-i di kaam, isa kaam bisa kubur sawŭn mai.”

¹²Pak Abraham mutu ubak-i ka bara daya Hitti

¹³ka nang di Ephron, isa sopŭrŭg daya tungang dingah, “Aku mite kuu nakit dingah. Aku re miris sopŭrŭg tana anŭ. Trima pinyibayar ku, ka aku re kubur sawŭn ku diginŭ.”

¹⁴Ephron nam,

¹⁵“Tuan, rega tana 400 kiping pirak adŭ. Dŭhsah paŭh nyirundeng kayuh adi mun anŭ. Kubur nŭh sawŭn mai diginŭ.”

¹⁶Abraham situju ka nimbang kiang rega adi Ephron ko nyabŭt di sirung jawin daya bagŭ, anŭ inŭh 400 kiping pirak nanyam ka timbang adi pakai daya dagang.

¹⁷Simŭnŭ inŭh gaya rata adi Ephron ko dapu di Machpelah, tura ka timor Mamre, jadi rata Abraham. Anŭ samŭn teya ka tang adi agi dieh, ka sopŭrŭg tŭngŭn kayuh di tana anŭ ndŭg ka bŭngŭn tarun maning tana anŭ.

¹⁸Bara daya Hitti adi agi tikuruk diginŭ mbŭh kadŭn anŭ rata Abraham.

¹⁹Jadi Abraham kubur sawŭn-i Sarah di tang anŭ di tana Canaan.

²⁰Simŭnŭ inŭh tarun tana anŭ adi ko dog dapu daya Hitti, samŭn tang anŭ adi agi dieh, jadi rata Abraham ndu tana kubur.