Read Biatah Bidayuh TIBIRIK 25 Bible Online

TIBIRIK 25 - Biatah Bidayuh bible

TIBIRIK 25

¹Abraham sawan dinge ngga dayung bŭkŭn adi dŭn Keturah.

²Sawŭn-i anŭ biranak yŭn-i Zimran, Jokshan, Medan, Midian, Ishbak, ka Shuah.

³Jokshan inŭh sama Sheba ngga Dedan, ka bara sesang Dedan inŭh daya Asshurim, daya Letushim, ngga daya Leummim.

⁴Anak anak dari Midian inŭh Ephah, Epher, Hanoch, Abida, ka Eldaah. Sopŭrŭg ngara inŭh bara sesang Keturah.

⁵Abraham tingge sopŭrŭg buat rata-i di Isaac;

⁶pak sitadŭn ayŭh gibabŭ udip, ayŭh nggen pinganggen di bara anak dari-i adi so bara sawŭn-i adi bŭkŭn. Komŭnŭ ayŭh pait bara anak dari-i anŭ da rŭŭ di tarun tana di Timor, jo so anak-i Isaac.

⁷Abraham kabŭs kan ayŭh mbŭh sukup minyamba 175 sawa.

⁹Anak-i Isaac ngga Ishmael kubur ayŭh di Tang Machpelah, di tana tura ka timor Mamre adi ko dog dapu Ephron anak dari Zohar daya Hitti.

¹⁰ Tana anŭ inŭh adi Abraham ko miris so daya Hitti; ngara duwŭh, Abraham ngga sawŭn-i Sarah dog kubur diginŭ.

¹¹Ripas pinyikabŭs Abraham, Tapa nyiberkat anak-i Isaac, adi rŭŭ sindŭk “Prigi Nyanŭ adi Udip adi Kiris Aku.”

¹²Ishmael, adi Hagar daya Egypt adi urun Sarah, biranak yŭn Abraham,

¹³biyŭn bara anak dari, dog nyusud nanyam ka pinyibranak ngara: Nebaioth, Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Naphish, ka Kedemah.

¹⁶Ngara inŭh tayung-babuk simŭng duwŭh tibaran-asar, ka dŭn dŭn ngara mbŭh dog pakai ngga kadŭn anak anak kupo ka tarun tarun tana adi yŭn ngara bibari.

¹⁷Ishmael agi 137 sawa umbur-i kan ayŭh kabŭs.

¹⁸Bara sesang Ishmael rŭŭ di tarun tana di asah Havilah ngga Shur, parad tura ka timor Egypt di aran nuju Assyria. Ngara rŭŭ birijo so bara sesang Abraham adi bŭkŭn.

¹⁹Ati inŭh dundan Isaac adi anak Abraham.

²⁰Isaac mbŭh pat puru sawa umbur-i kan ayŭh tambit Rebecca ndu sawŭn, anak dayung Bethuel (daya Aram so Mesopotamia) ka jurud dayung Laban.

²¹Sabab Rebecca dŭh biyŭn anak, Isaac bidua ka TUHAN yŭn-i. TUHAN nam pimite-i, ka Rebecca meh rasu bite.

²²Rebecca re biranak anak apid, ka sibayuh ngara dog biranak, ngara siraru birawan ngga dingan-i darŭm ite sindŭ-i. Rebecca nang, “Mani kah kayuh mun ati bisa jadi di aku?” Jadi ayŭh di siken TUHAN rati-i.

²³ TUHAN nang di ayŭh, “Duwŭh bangsa agi di darŭm ite mu; Kuu re biranak duwŭh bangsa daya adi dŭh bisa bigaur. Ndi re bake dŭ so sianŭ ndi; Adi tuuh re bituan di sianŭ adi mara.”

²⁴Tipuh adi ngga-i biranak mbŭh mandŭg, ka-i ruwan anak apid.

²⁵Adi diŭ ruah agi bireh, ka kurit-i mun jipo-ambu adi piburuh, jadi ayŭh dog kadŭn Esau.[47]

²⁶Adi numbor duwŭh ruah bidigen tagap di tiga Esau, ka ayŭh dog kadŭn Jacob.[48] Isaac mbŭh nŭm puru sawa umbur-i kan ngara dog biranak.

²⁷So-duwŭh anak anŭ mbŭh baga, ka Esau jadi daya adi pandai ngasū, daya adi rindu pimudip di sapa tarun, pak Jacob inŭh daya adi dŭh piminyu ka raan dŭ rŭŭ di arŭn.

²⁸Isaac rindu dŭ di Esau, sabab ayŭh gagā man dagin dāng adi Esau dapŭd, pak Rebecca rindu dŭ di Jacob.

²⁹Ndi andu darŭm Jacob aŭn tanŭk sup ruwang kasang, Esau mari ngasū. Ayŭh mbŭh sibŭrŭk

³⁰ka nang di Jacob, “Aku sibŭrŭk; nggen di aku kada pinguman adi bireh anŭ.” (Anŭ meh sabab ayŭh dog kadŭn Edom.[49])

³¹Jacob nam, “Aku an nggen di kuu kambŭi kuu nggen pangkat mu adi anak pinuai di aku.”

³²Esau nang, “Bisa! Re ku ngga mani pangkat pinuai ku anŭ; aku mbŭh re kabŭs sikirau tong-i!”

³³ Jacob nam, “Kuu an diŭ bipayu adŭp mu re nggen pangkat mu anŭ di aku.” Esau bipayu ka nggen pangkat-i anŭ di Jacob.

³⁴Komŭnŭ Jacob nggen di ayŭh ruti ngga kada sup anŭ. Ayŭh man ka nok, komŭnŭ ayŭh makat ka bu. Esau mbŭh taran pangkat-i adi anak pinuai.