Read Biatah Bidayuh TIBIRIK 26 Bible Online

TIBIRIK 26 - Biatah Bidayuh bible

TIBIRIK 26

¹Agi dinge apag di tarun tana anŭ, nimun anŭ adi mbŭh jadi di jaman Abraham. Isaac di ka Gerar, di bidapŭd ngga Abimelech, raja daya Philistine.

²TUHAN ko nandŭng di Isaac nang, “Dŭhnyah di ka Egypt; rŭŭ di tarun tana ati di yŭn Aku bada kuu rŭŭ.

³Rŭŭ digiti, ka Aku re agi ngga kuu ka nyiberkat kuu. Aku re nggen sopŭrŭg tarun tana ati di kuu, ngga di bara sesang mu. Aku re ingat janji adi Aku ko ndai ngga sama mu Abraham.

⁴ Aku re bada sesang mu bagŭ keya ka bitang di rangit; ka re nggen di ngara sopŭrŭg tarun tana ati. Sopŭrŭg bangsa re mite Aku nyiberkat ngara nimun Aku ko nyiberkat bara sesang mu.

⁵Aku re nyiberkat kuu, sabab Abraham nundok di Aku ka sita sopŭrŭg ukum-adat ngga pesan Ku.”

⁶Jadi Isaac rŭŭ di Gerar.

⁷ Kan bara dari diginŭ siken pasar sawŭn-i, ayŭh nang di ngara ayŭh sude dayung-i. Ayŭh dŭh an ngaku Rebecca sawŭn-i, sabab ayŭh taru ngara siŭ adŭp-i yŭn an tambit Rebecca, adi taŭn dayung adi raru ramus.

⁸Kan Isaac mbŭh mua tian-i rŭŭ diginŭ, Raja Abimelech nyingo so pinjan ka kiris Isaac ngga Rebecca biawang.

⁹Abimelech bada daya di bagan Isaac ka nang, “Jadi sibatur-i ayŭh anŭ sawŭn mu! Mani kuu nang ayŭh sude dayung mu?” Ayŭh nam, “Aku pikir adŭp ku re dog siŭ kambŭi aku nang ayŭh sawŭn ku.”

¹⁰“Ani ati mbŭh mu ndai di kieh?” Abimelech nang. “Ndi so bara daya ku bo tipia tungang bŭŭs ngga sawŭn mu, ka kuu inŭh adi re dapu tanggong sarah ami.”

¹¹Abimelech bakan sopŭrŭg daya: “Asi asi adi ida ida ngga daya ati bait ngga sawŭn-i, daya anŭ re dog ukum kabŭs.”

¹²Isaac nyipurun di tarun tana anŭ, ka di sawa anŭ pingatŭm-i siratus rupet bagŭ so anŭ adi purun-i, sabab Tapa mbŭh nyiberkat ayŭh.

¹³Pimudip-i makin mujur ndŭg ka ayŭh mbŭh jadi daya kaya.

¹⁴Sabab ayŭh biyŭn bagŭ kaban biri ngga sapi ka bagŭ daya-gaji, daya Philistine mbŭh sina di ayŭh.

¹⁵Jadi ngara napuk sopŭrŭg prigi adi bara daya-gaji sama-i Abraham ko kareh di tipuh ayŭh gibabŭ udip.

¹⁶Komŭnŭ Abimelech nang di Isaac, “Bu so rais ami. Kuu mbŭh jadi rabis bikuasa so kieh.”

¹⁷Jadi Isaac bu ka bibari di Rubān Gerar, di yŭn-i rŭŭ mua tian-i.

¹⁸Ayŭh kareh dinge dudu prigi anŭ adi ko dog kareh di jaman sama-i Abraham ka adi ko dog napuk daya Philistine ripas Abraham kabŭs. Isaac kadŭn dudu prigi anŭ ngga dŭn dŭn anŭ adi ko sama-i ngga kadŭn-i.

¹⁹Daya-gaji Isaac kareh prigi di rubān anŭ ka dapŭd piin dieh.

²⁰Pingingat-biri so Gerar bikaii ngga pingingat-biri Isaac, nang, “Piin ati kieh dapu.” Jadi Isaac kadŭn prigi anŭ “Kaii.”

²¹Bara daya-gaji Isaac kareh dinge prigi adi bŭkŭn, ka agi dinge kaii pasar anŭ dinge, jadi ayŭh kadŭn prigi anŭ “Bipinganyu.”

²²Ayŭh bu so nŭ ka kareh dinge prigi adi bŭkŭn. Mating kaii pasar ati ndi, jadi ayŭh kadŭn-i “Sanang” Ayŭh nang, “TUHAN mbŭh bada ata sanang rŭŭ di tarun tana ati buang re mujur dieh.”

²³Isaac bu di ka Beersheba.

²⁴Ngarŭm anŭ TUHAN nandŭng di ayŭh ka nang, “Aku ati Tapa sama mu Abraham. Dŭhnyah taru; Aku agi ngga kuu. Aku re nyiberkat kuu ka nggen di kuu bagŭ sesang sabab janji Ku ngga urun Ku Abraham.”

²⁵Isaac ndai mija-sambah diginŭ ka nyambah TUHAN. Komŭnŭ ayŭh pijog bari-i diginŭ, ka daya gaji-i kareh prigi adi bŭkŭn.

²⁶ Abimelech mandŭg so Gerar ngga Ahuzzath adi tukang pitayan ayŭh, ka Phicol adi pingibās bara soldadu-i, di bidapŭd ngga Isaac.

²⁷Jadi Isaac siken, “Mani angān bisa di dapŭd aku madin; dawŭ-i angān dŭh kana ngga aku ka bada aku bu so rais ngan?”

²⁸Ngara nam, “Madin kieh puan nang TUHAN agi ngga kuu, ka kieh pikir taŭn patut ata bipayu ndai yŭn adŭp ta pekat-janji,

²⁹adi yŭn-i kuu dŭh bisa ida ida ngga kieh nimun kieh dŭh bisa ida ida ngga kuu. Kieh ko kana ngga kuu ka bada kuu bu ngga damai. Madin mbŭh giranan inŭh TUHAN agi ngga kuu.”

³⁰Isaac ndai gawai yŭn ngara, ka ngara man nok.

³¹Awar isan isan andu jawa ndi barang naan ngara ndai janji-i ka ngabŭt-i ngga payu. Isaac nggen siramat panu di ngara, ka ngara birakang buang mbŭh bidingan.

³²Di Andu anŭ gŭh bara daya-gaji Isaac mandŭg ka kidaan di ayŭh pasar prigi adi ko ngara kareh. Ngara nang, “Kieh mbŭh dapŭd piin.”

³³Ayŭh kadŭn prigi anŭ “Payu.” Simŭnŭ inŭh kupo Beersheba[50] dapŭd dŭn-i.

³⁴Kan Esau mbŭh pat puru sawa umbur-i, ayŭh sawŭn duwŭh naan dayung daya Hitti, Judith anak Beeri, ngga Basemath anak Elon.

³⁵Ngara anŭ bada pimudip Isaac ngga Rebecca sangsara.