Read Biatah Bidayuh TIBIRIK 27 Bible Online

TIBIRIK 27 - Biatah Bidayuh bible

TIBIRIK 27

¹Isaac madin mbŭh minyamba, ka mbŭh karak. Ayŭh bagan anak pinuai-i Esau ka nang di ayŭh, “Nak.” “Ani, ma,” ayŭh nam.

²Isaac nang, “Kuu kiris aku mbŭh minyamba, ka dŭm dŭh tui re kabŭs.

³Tambit bawŭh ngga reja reja-panah mu, di ka tarun ka siŭ ndi dāng yŭn ku.

⁴Tanŭk pinguman anŭ adi sidi kinyam ku, ka taban-i ka yŭn ku. Kan aku muko man-i, aku re nggen sikasŭn berkat ku di kuu diŭ so aku kabŭs.”

⁵Sitadŭn Isaac minyu ngga Esau, Rebecca agi nyiringa. Jadi kan Esau mbŭh matak di jiroh dāng,

⁶Rebecca nang di Jacob, “Aku agi bauh ko dingah sama mu nang di Esau,

⁷‘Jiroh dāng yŭn ku ka tanŭk-i yŭn ku. Ripas aku ko man-i, aku re nggen berkat ku di kuu di sirung jawin TUHAN diŭ so ku kabŭs.’

⁸Nak,” Rebecca pijuu minyu, “Dingah aku, ka ndai kayuh adi aku bada kuu ndai.

⁹Di ka kaban dāng ka mien duwŭh anak kambing adi gamu, isa aku tanŭk pinguman anŭ adi sama mu raru suka man.

¹⁰Kuu bisa taban-i ka yŭn-i da man, ka ayŭh re nggen berkat-i di kuu diŭ so-i kabŭs.”

¹¹Pak Jacob nang di sindŭ-i, “Kaam puan Esau daya adi piburuh, ka aku daya adi biyŭn kurit duduh.

¹²Sama ku re tama aku ka dapŭd aku nipu adŭp-i; ndong ka aku bada adŭp ku dog pangu adŭ ka dŭh meh dog nyiberkat.”

¹³Sindŭ-i nam, “Isa-i tadŭ tadŭ pangu di tunduh mu nyatŭk aku, nak; ndai adŭ sak adi kidaan ku, ka panu meh di tambit anak anak kambing anŭ yŭn ku.”

¹⁴Jadi Jacob di tambit anak anak kambing anŭ ka taban-i ka sindŭ-i, ka ayŭh tanŭk pinguman anŭ nanyam adi sama-i suka.

¹⁵Komŭnŭ Rebecca tambit piraka Esau adi siabo kana, adi nyikŭn-i darŭm arŭn, ka kasŭk-i di Jacob.

¹⁶Ayŭh na anyit kambing di tangan Jacob ka di arong tungo-i adi dŭh piburuh.

¹⁷Rebecca nggen di Jacob pinguman adi sidi anŭ ngga ruti adi-i ko ndai.

¹⁸Ka Jacob di ka yŭn sama-i ka nang, “Ma!” “Ani nak”, ayŭh nam. “Aki ndi so anak ku kuu?”

¹⁹Jacob nam, “Aku ati anak pinuai mai Esau; Aku muko ndai kayuh adi kaam bada aku ndai. Turung makat ka guru, ka man pinguman dagin ati adi aku taban ka kaam, isa kaam bisa nggen berkat mai di aku.”

²⁰Isaac nang, “Simuki kuu rikas raru dapŭd-i, nak?” Jacob nam, “TUHAN adi Tapa mai turung aku dapŭd-i.”

²¹Isaac nang di Jacob, “Kamati, sindŭk aku, isa aku bisa tama kuu. Kuu sawŭ Esau kah?”

²²Jacob sigen adŭp-i sindŭk sama-i, adi tama ayŭh ka nang, “Sirŭŭn mu sak sirŭŭn Jacob, pak tangan mu nyam tangan Esau.”

²³Ayŭh dŭh natŭng Jacob amai tangan-i piburuh nyam tangan Esau. Ayŭh mbŭh re nggen berkat-i di Jacob,

²⁴pak-i siken dinge, “Kuu sawŭ Esau kah?” “Aku inŭh Esau,” ayŭh nam.

²⁵Isaac nang, “Taban kamati pinguman dagin anŭ. Ripas aku ko man-i, aku re nggen berkat ku di kuu.” Jacob taban pinguman anŭ ka yŭn sama-i, ka taban gŭh wain da-i nok.

²⁶Komŭnŭ sama-i nang di ayŭh, “Kamati sindŭk aku ka sium aku, nak.”

²⁷ Darŭm-i nyindŭk re sium ayŭh, Isaac kadŭk piraka-i; ka-i nggen berkat-i di ayŭh. Jacob nang, “Dagŭn anak ku adi buuh ramak agi buuh dagŭn tarun adi TUHAN mbŭh nyiberkat.

²⁸Isa-i Tapa nggen di kuu sipot-abun so rangit ka bada tana ŭmŭh mu damŭn! Isa-i Ayŭh nggen bagŭ gandom ngga wain di kuu!

²⁹ Isa-i bangsa bangsa daya jadi urun mu, ka isa-i daya daya nundok di kuu. Isa-i kuu mritah sopŭrŭg madis mu, ka isa-i sesang sindŭ mu nundok di kuu. Isa-i daya adi mangu kuu dog pangu, ka daya adi nyiberkat kuu dog nyiberkat.”

³⁰Kan Isaac muko nyiberkat Jacob, ka kan ayŭh mbŭh ruah so yŭn sama-i, nganŭ gŭh Esau mari ngasū.

³¹Ayŭh tanŭk gŭh pinguman adi sidi anŭ ka taban-i ka yŭn sama-i. Ayŭh nang, “Makat, ma, man pinguman dagin ati adi aku taban ka kaam, isa kaam bisa nggen berkat mai di aku.”

³²“Asi kuu?” Isaac siken ayŭh. “Aku ati anak pinuai mai Esau,” Ayŭh nam.

³³Kan Isaac dingah sakanŭ, ndi pŭrŭng ganan-i kimŭtŭr, ka-i siken, “Asi meh sianŭ adi muko siŭ dāng ka taban-i ka yŭn ku? Aku muko man-i diŭ so kuu mandŭg; ka aku muko gŭh nggen sikasŭn berkat ku di ayŭh, adi re adu adu tung jangi.”

³⁴Kan Esau dingah sakanŭ, ayŭh nangŭng sien ka nang, “Nggen gŭh di aku berkat mai, ma!”

³⁵Isaac nam, “Sude mu mbŭh mandŭg ka nipu aku, ka mbŭh tambit berkat adi re ku nggen di kuu.”

³⁶ Esau nang, “Ati mbŭh piduwŭh saba ayŭh nipu aku. Ngapŭi ka dŭn-i Jacob.[51] Ayŭh muko tambit so aku hak ku adi anak pinuai, ka madin ayŭh mbŭh tambit dinge so aku berkat ku. Mating kah berkat nitah mai yŭn ku?”

³⁷Isaac nam, “Aku mbŭh bada ayŭh jadi tuan di tunduh mu, ka mbŭh bada sopŭrŭg madis-i jadi urun-i. Aku mbŭh nggen di ayŭh gandom ngga wain. Madin mbŭh mating tia kayuh adi bisa aku ndai yŭn mu, nak!”

³⁸ Esau darah mite so sama-i, “Ndi anŭ adŭ kah berkat mai, ma? Nyiberkat aku gŭh.” Ayŭh rasu sien.

³⁹Komŭnŭ Isaac nang di ayŭh, “Mating sipot-abun so rangit yŭn mu, Mating tana ŭmŭh adi damŭn yŭn mu.

⁴⁰ Kuu re udip ngga pedang mu, pak jadi urun sude mu. Di tipuh kuu birawan,[52] kuu re rupas so kuasa-i.”

⁴¹Esau tiru di Jacob amai sama-i muko nggen berkat-i di ayŭh. Ayŭh nang darŭm asŭng-i, “Tipuh adi ngga muās pinyikabŭs sama ku mbŭh sindŭk; nganŭ aku re siŭ Jacob.”

⁴²Pak kan Rebecca dingah pasar kayuh adi Esau re ndai, ayŭh bagan Jacob ka nang, “Ingat, jurud mu Esau an maras dendam ka re siŭ kuu.

⁴³Ndai kayuh adi aku bada kuu ndai. Rikas bu ka yŭn jurud ku Laban di Haran,

⁴⁴ka rŭŭ ngga ayŭh mua tian-i, ndŭg ka jurud mu anŭ mbŭh dŭh tia baji

⁴⁵buang kambŭt kayuh adi kuu ko ndai di tunduh-i. Komŭnŭ aku re pait daya da taban kuu ngga pari kamati. Aku dŭh raan so-duwŭh anak ku kabŭs darŭm ndi andu.”

⁴⁶Rebecca nang di Isaac, “Aku mbŭh raru dŭh suka bara sawŭn Esau adi daya pinami. Kambŭi Jacob sawŭn gŭh dayung daya Hitti mbŭh kana dŭ inŭh aku kabŭs.”