Read Biatah Bidayuh TIBIRIK 28 Bible Online

TIBIRIK 28 - Biatah Bidayuh bible

TIBIRIK 28

¹Isaac bagan Jacob, tabi ayŭh, ka nang di ayŭh, “Dŭhnyah sawŭn dayung daya Canaan.

²Pati ka nŭŭh di ka Mesopotamia, ka rais adŭp babai mu Bethuel, ka sawŭn ndi so bara dayung bujang diginŭ, adi pinanak samba mu Laban.

³Isa-i Tapa Bisa-pŭrŭg nyiberkat pinyisawan mu ka nggen di kuu bagŭ anak, isa kuu jadi sama yŭn bagŭ bangsa!

⁴ Isa-i Ayŭh nyiberkat kuu samŭn bara sesang mu, nimun Ayŭh mbŭh nyiberkat Abraham, ka isa-i kuu dapu tarun tana ati adi yŭn mu ko rŭŭ ka adi Tapa ko nggen di Abraham!”

⁵Isaac bada Jacob di ka Mesopotamia, ka yŭn Laban adi anak Bethuel daya Aram, ka kaka Rebecca, adi sindŭ Jacob ngga Esau.

⁶Esau dingah Isaac mbŭh nyiberkat Jacob ka bada ayŭh di ka tarun tana Mesopotamia di jiroh dayung ndu sawŭn. Ayŭh dingah gŭh nang di andu Isaac nyiberkat Jacob ayŭh pesan Jacob da dŭh sawŭn dayung daya Canaan.

⁷Ayŭh puan gŭh nang Jacob sawŭ tunda pinganang sindŭ sama-i ka di ka Mesopotamia.

⁸Esau mirati nang sama-i Isaac dŭh nyibandar ayŭh sawŭn dayung daya Canaan.

⁹Jadi ayŭh di ka yŭn Ishmael anak Abraham, ka sawŭn anak-i adi dŭn Mahalath jurud Nebaioth.

¹⁰Jacob bu so Beersheba ka panu nuju Haran.

¹¹Kan batŭh andu mbŭh simŭdŭp ayŭh ndŭg tarun yŭn adi kudus[53] ka nyirŭmŭn diginŭ. Ayŭh guring ka bŭŭs sangan ubak-i di tunduh batuh.

¹² Ayŭh nyipŭmŭh ka kiris ndi tungoh tipijog so tana ndŭg rangit, ka bara malaikat mūn maad dieh.

¹³ Ka diginŭ TUHAN agi mijog sindŭk ayŭh,[54] ka nang, “Aku ati TUHAN adi Tapa Abraham ngga Isaac, Aku re nggen di kuu ngga di bara sesang mu tarun tana ati adi yŭn mu guring.

¹⁴ Ngara re bagŭ keya ka dabu tana. Ngara re bada tarun tana ngara bayah ka barang parad, ka so kuu ngga sesang mu Aku re nyiberkat sopŭrŭg bangsa.[55]

¹⁵Ingat, Aku re agi ngga kuu ka grindung kuu di tadŭ ka kuu di, ka Aku re taban kuu pari ka tarun tana ati. Aku dŭh re tingge kuu ndŭg ka Aku muko ndai sopŭrŭg kayuh adi Aku ko janji di kuu.”

¹⁶Jacob burah ka nang, “TUHAN agi digiti! Ayŭh agi di tarun ati; muran aku puan!”

¹⁷Ayŭh mbŭh taru ka nang, “Tikŭnŭd nyam nŭŭh di tarun ati! Ati tatu ramin Tapa, tiban mŭrŭt shorga.”

¹⁸Jacob makat isan isan andu jawa ndi, tambit batuh anŭ adi ko-i yŭn mangan ubak-i, ka pijog-i da jadi pinatŭng. Komŭnŭ ayŭh ren inyo kanā di tunduh-i ngga nitah-i yŭn Tapa.

¹⁹Ayŭh kadŭn tarun anŭ Bethel[56] (Kupo di tarun tana anŭ dawŭ-i dŭn Luz.)

²⁰Muko anŭ Jacob bipayu ngga TUHAN: “Kambŭi Kaam agi ngga aku ka grindung aku sitadŭn pimanu ku ati ka nggen di aku pinguman ngga pimakai,

²¹ka kingat aku ndŭg ka aku mari ka ramin sama ku ngga siramat, nŭ ka Kaam jadi Tapa ku.

²²Batuh pinatŭng ati adi ko aku pijog digiti re jadi tarun adi yŭn Kaam dog nyambah, ka aku re nggen ndi utung-so-simŭng so tadŭ tadŭ kayuh adi Kaam nggen di aku.”