Read Biatah Bidayuh TIBIRIK 3 Bible Online

TIBIRIK 3 - Biatah Bidayuh bible

TIBIRIK 3

¹ Jadi jippŭh inŭh dāng adi raru pitar adi TUHAN Tapa mbŭh napa. Jippŭh siken di dayung anŭ, “Sawŭ kah Tapa agi kidaan di angān da dŭh man buwa so tadŭ tadŭ tŭngŭn kayuh di teya ati?”

²“Kieh bisa man buwa so tadŭ tadŭ tŭngŭn kayuh di teya ati,” dayung anŭ nam,

³“adŭ-i so ndi tŭngŭn kayuh anŭ adi di yun teya. Tapa kidaan di kieh da dŭh man bait tama-i; kambŭi kieh man bait tama-i, kieh re kabŭs.”

⁴Jippŭh anŭ nam, “Anŭ dŭh-i sawŭ; angān dŭh re kabŭs.

⁵Tapa nang sakanŭ, amai Ayŭh puan nang kan angān man-i angān re mun Tapa[10] ka puan kayuh adi kana ngga kayuh adi arap.”[11]

⁶Dayung anŭ kiris munki raru sangŭn tŭngŭn kayuh anŭ buang buwa-i tatŭng sidi dog man. Ayŭh birundeng munki sawŭ pinyikana-i kambŭi nŭŭh jadi bijak. Jadi ayŭh tambit kada buwa-i ka man. Komŭnŭ ayŭh nggen kada-i di banŭh-i, ka ayŭh sua gŭh man-i.

⁷Dŭh tui ripas ngara ko man-i pikir ngara rasu tikuka ka rada adŭp-i mbŭh sitabet sitagor; jadi ngara nyapit ka nyiit dawŭn ara ngga nutu adŭp-i.

⁸Singumi andu anŭ ngara dingah TUHAN Tapa panu di teya, ka ngara samah bisukan so Ayŭh di karu tŭngŭn kayuh.

⁹Pak TUHAN Tapa bagan dari anŭ, “Diki kuu?”

¹⁰Ayŭh nam, “Aku agi dingah Kaam di teya; pak aku taru ka bisukan so Kaam amai aku sitagor.”

¹¹Tapa siken, “Asi kidaan di kuu nang kuu sitagor? Agi kah kuu man buwa kayuh anŭ adi Aku mbŭh kijaman kuu man?”

¹²Dari anŭ nam, “Dayung adi Kaam bada jadi ayō ku nggen di aku buwa kayuh anŭ, ka aku agi man-i.”

¹³TUHAN Tapa siken dayung, “Mani kuu ndai kayuh mun anŭ?” Ayŭh nam, “Jippŭh nyibudo aku da man-i.”

¹⁴Komŭnŭ TUHAN Tapa nang di jippŭh, “Kuu re dog ukum sitagar pingandai mu anŭ; kuu sadi adŭ so dāng dāng bŭkŭn dŭh siŭn dŭh gŭrŭng pangu ati: So madin kuu re panu ngga tain mu, ka kuu re man sapok dabu tana sitŭkŭd udip mu.

¹⁵Aku re bada kuu ngga dayung anŭ tiru di dingan ngan; bara sesang-i ngga tung jamu re jadi pinganyu. Anak sukuh-i re mŭmŭs ubak mu ka kuu re kuut tiga ngara.”

¹⁶Ka Ayŭh nang di dayung, “Aku re nambah pinyusah mu di tika kuu bite samŭn sarang andam biranak mu. Pak sunggu mŭnŭ, kuu re babŭ biyŭn pinyiripong di banŭh mu, ka re nundok di ayŭh.”

¹⁷Ka Ayŭh nang di dari anŭ, “Kuu mbŭh dingah pinganang sawŭn mu ka mbŭh man buwa adi Aku ko kijaman kuu man. Sabab kayuh adi kuu mbŭh ndai, tana re dog pangu. Kuu re bandar nyiraja nyiran adŭp mu sitŭkŭd umbur mu.

¹⁸ Tana re piruah uduh ngga tŭngŭn reja, ka kuu re man anak anak kayuh adi timbu di tarun.

¹⁹Kuu re nyiraja jera ndŭg ka mudas ngga mu dapŭd pinguman, ndŭg ka kuu pari ka tana adi so mu dog napa. Kuu dog napa so tana, ka kuu re pari jadi tana.”

²⁰Adam[12] kadŭn sawŭn-i Eve,[13] amai ayŭh jadi sindŭ sopŭrŭg manusia.

²¹Ka TUHAN Tapa ndai piraka so kurit dāng yŭn Adam ngga sawŭn-i.

²² Komŭnŭ TUHAN Tapa nang, “Madin manusia mbŭh brimun ngga ata ka biyŭn pinyipuan pasar kayuh adi kana ngga kayuh adi arap. Ngara dŭh siŭn dog nyibandar tambit buwa kayuh anŭ adi nggen udip, man-i, ka udip adu adu.”

²³Jadi TUHAN Tapa pibu ngara so Teya Eden ka bada ngara biteya birŭmŭh di tana adi so ngara dog napa.

²⁴Komŭnŭ di parad tura ka timor teya anŭ Ayŭh na cherubim[14] ka ndi pedang apui adi bipusing nura ndi tarun tarun. Anŭ ngga bitan tadŭ tadŭ daya mandŭg nyindŭk tŭngŭn kayuh adi nggen udip.