Read Biatah Bidayuh TIBIRIK 31 Bible Online

TIBIRIK 31 - Biatah Bidayuh bible

TIBIRIK 31

¹Jacob agi dingah anak anak dari Laban minyu, “Jacob mbŭh kubo tambit sopŭrŭg kayuh adi sama dapu. Ayŭh mbŭh dapŭd buat rata-i so anŭ adi sama ta dapu.”

²Ayŭh ngatin gŭh Laban mbŭh dŭh tia rapat mun adi mbŭh ngga adŭp-i.

³TUHAN nang di Jacob, “Pari ka tarun tana sama mu ka yŭn bara madis mu. Aku re agi ngga kuu.”

⁴Jadi Jacob pait pinganang ka Rachel ngga Leah bada dapŭd adŭp-i di tarun yŭn kaban dāng-i.

⁵Ayŭh nang di ngara, “Aku ngatin sama ngan mbŭh dŭh tia rapat mun adi mbŭh ngga aku; pak Tapa sama ku agi ngga aku.

⁶So-duwŭh ngan puan nang aku mbŭh nyiraja yŭn sama ngan ngga siabo tungang ku.

⁷Pak ayŭh nipu aku ka ngubah kiang gaji ku pisimŭng kari. Sunggu mŭnŭ, Tapa dŭh bada ayŭh ida ida ngga aku.

⁸Tiap kari Laban nang, ‘Kambing adi bikurau buruh-i inŭh gaji mu,’ sopŭrŭg kaban kambing biranak anak adi bikurau. Kan ayŭh nang, ‘Kambing adi bijaran buruh-i inŭh gaji mu,’ sopŭrŭg kaban kambing biranak anak adi bijaran.

⁹Tapa mbŭh tambit kaban kaban dāng so sama ngan ka mbŭh nggen-i di aku.

¹⁰“Di tipuh dāng sawan aku agi nyipŭmŭh. Aku kiris bara dari kambing adi sawan sadi bijaran, biritik ka bikurau buruh-i.

¹¹Malaikat Tapa minyu di aku darŭm pŭmŭh, ‘Jacob!’ ‘Ani,’ aku nam.

¹²‘Tingga,’ ayŭh nang, ‘sopŭrŭg dari kambing adi sawan sadi bijaran, biritik ngga bikurau buruh-i. Aku bada-i jadi simŭnŭ sabab aku kiris sopŭrŭg kayuh adi Laban mbŭh ndai di kuu.

¹³ Aku ati Tapa adi nandŭng di kuu di Bethel, di yŭn mu nitah ndi batuh ka nginyo-i ngga inyo kanā da jadi batuh pinatŭng, ka di yŭn mu bipayu ngga Aku. Madin sidia adŭp mu ka pari ka tarun tana adi yŭn mu dog biranak.’ ”

¹⁴Rachel ngga Leah nam Jacob, “Mbŭh mating inŭh utung buat-rata re kieh dapŭd so sama ami.

¹⁵Ayŭh ndai di tunduh kieh keya ka kieh ati daya tami. Ayŭh jua kieh, ka mbŭh kubo pakai sopŭrŭg duit anŭ adi taŭn mbŭh rega ami.

¹⁶Pak sopŭrŭg rata, adi TUHAN ko tambit so sama ami, inŭh ata ngga anak ta dapu. Ndai nanyam adi Tapa ko kidaan di kuu.”

¹⁷Jadi Jacob sidia adŭp-i re pari ka tarun tana sama-i di Canaan. Ayŭh bada bara anak sawŭn-i guru di tunduh onta, ka bada sopŭrŭg dāng-i diŭ panu di jawin-i taban sopŭrŭg buat-rata adi-i dapŭd so Mesopotamia.

¹⁸

¹⁹Tagan Laban di gumbak buruh biri biri-i, Rachel naku dudu tibudo rawang adi Sama-i dapu.

²⁰Jacob nipu tua-i Laban darŭm-i dŭh kidaan adŭp-i re bu.

²¹Ayŭh taban sopŭrŭg buat-rata adŭp-i, ka rasu bu ngga bigaut. Ayŭh mutas Yang Euphrates ka kadŭg aran adi nuju rais tarun tana sandah Gilead.

²²Taruh andu ripas anŭ, agah ndŭg Laban nang Jacob mbŭh bu.

²³Laban ngga bara daya-i tadak Jacob ju andu ndŭg ka ayŭh nyandat ayŭh di rais tarun tana sandah Gilead.

²⁴Ngarŭm anŭ darŭm pŭmŭh Tapa mandŭg ka yŭn Laban ka nang di ayŭh, “Nakit nŭh, dŭhnyah pirawan ayŭh bait sibarang minyu ngga ayŭh.”

²⁵Jacob bibari di darŭd, ka Laban bibari gŭh ngga bara madis-i di arong anŭ di rais tarun tana sandah Gilead.

²⁶Laban nang di Jacob, “Mani kuu nipu aku ka taban anak anak dayung ku ngga bu mun dayung dog nakap darŭm perang?

²⁷Mani kuu nipu aku ka bu dŭh kidaan di aku? Kambŭi kuu kidaan di aku, aku bisa nguru kuu ngga atin pawŭn, pakai ragu tamburin ka kachapi.

²⁸Kuu dŭh bada aku sium anak sukuh ku bait nggen siramat panu di anak anak dayung ku. Pingandai adi raru budo inŭh anŭ.

²⁹Aku biyŭn kuasa bada kuu kinaman, pak ngarŭm singumi Tapa sama mu bakan aku da dŭh pirawan kuu.

³⁰Aku puan, kuu taŭn gruwŭn an pari ka ramin sama mu, pak mani kuu naku tibudo rawang ku?”

³¹Jacob nam tua-i, “Aku taru kaam sirapas anak anak dayung mai so aku.

³²Pak kambŭi kaam dapŭd tadŭ tadŭ daya digiti adi naku tibudo rawang mai daya anŭ bisa dog ukum kabŭs. Digiti di sirung jawin bara daya ta ndu saksi, jiroh tadŭ tadŭ kayuh adi kaam dapu, kambŭi agi, kaam bisa tambit-i.” Jacob dŭh puan Rachel agi tambit tibudo sama-i.

³³Laban di jiroh di bari Jacob; komŭnŭ ayŭh di ka bari Leah, samŭn bari duwŭh naan urun dayung, pak mating tibudo rawang-i dog dapŭd. Komŭnŭ ayŭh mŭrŭt bari Rachel.

³⁴Rachel ko tambit tibudo rawang anŭ ka na-i darŭm kandi tapas-pinyiguru pinunggang onta, ka guru di tunduh-i. Laban jiroh darŭm sopŭrŭg bari, pak dŭh tungang dapŭd tibudo rawang-i.

³⁵Rachel nang di sama-i, “Dŭhnyah kaam tuas di aku; aku dŭh tungang mijog di sirung jawin mai amai aku kais nandā buran ku.” Laban nakit jiroh pak dŭh gŭh dapŭd tibudo rawang-i.

³⁶Jacob mbŭh ruai nang tuas-i. “Ani sarah mbŭh aku ndai?” ayŭh siken buang tuas. “Ani sarah ku adi bada kaam tadak aku?

³⁷Amai madin kaam mbŭh kisak kambur sopŭrŭg kayuh adi aku dapu, ani meh kayuh rawang mai mbŭh mai dapŭd? Na digiti di yŭn daya mai ngga daya ku bisa tingga-i, ka bada ngara kidaan asi so ata duwŭh adi batur.

³⁸Aku ko rŭŭ ngga kaam sitŭkŭd duwŭh puru sawa; biri ngga kambing mai bŭn re dŭh biranak ka papah, ka aku bŭn gŭh man dagin dari biri so kaban dāng mai.

³⁹Tiap kari biri mai dog siŭ dāng tarun, aku adi ari dapu tanggong. Aku bŭn taban-i ka kaam ka kidaan nang-i dŭh sitagar sarah ku. Kaam bada aku nubos ani ani kayuh adi dog naku sandu bait singarŭm.

⁴⁰Ari jera dog sura sandu, ka singarŭm dog adud. Aku dŭh tungang bŭŭs.

⁴¹Simŭnŭ inŭh pimudip ku duwŭh puru sawa rŭŭ ngga kaam. Simŭng pat sawa aku nyiraja yŭn ku dapŭd duwŭh madis anak dayung mai. Ka nŭm sawa yŭn dapŭd kaban dāng mai. Pak kaam ngubah kiang gaji ku pisimŭng kari.

⁴²Kambŭi Tapa sama ku, Tapa Abraham ngga Isaac, mating ngga aku, kaam tatu ko bada aku bu bŭrŭh-beyang. Pak Tapa agi kiris pinyusah ku ka kraja adi ko aku ndai, ka singumi Ayŭh mbŭh nang kaam.”

⁴³Laban nam Jacob, “Dayung dayung adi mara anŭ anak ku, anak anak ngara aku dapu. Kaban dāng anŭ tung jaku gŭh. Sibatur-i, sopŭrŭg kayuh adi kuu kiris digiti inŭh aku dapu. Pak amai mating aran ku re tambit anak anak dayung ku ngga anak anak ngara,

⁴⁴aku mbŭh sidia an ndai ndi pekat-janji ngga kuu. Ja ata nugung batuh ndu ta pingingat, isa ata dŭh kambŭt pekat-janji ta.”

⁴⁵Jacob tambit ndi batuh ka pijog-i ndu batuh pinatŭng.

⁴⁶Ayŭh kidaan di bara daya-i da nguruk batuh ka nugung-i. Komŭnŭ ngara guru man nok di bŭngŭn tugung batuh anŭ.

⁴⁷Laban kadŭn-i Jegar Sahadutha,[72] pak Jacob kadŭn-i Galeed.[73]

⁴⁸Laban nang di Jacob, “Tugung batuh ati jadi pingingat di ata duwŭh.” Anŭ meh sabab tarun anŭ dog kadŭn Galeed.

⁴⁹Laban gŭh nang, “Isa-i Tapa nyibatŭh ata darŭm ata birakang ngga dingan ta.” Ka tarun anŭ dog kadŭn Mizpah.[74]

⁵⁰Laban nang dinge, “kambŭi kuu ida ida ngga anak anak dayung ku, bait sawŭn dayung bŭkŭn, sawŭ sunggu aku dŭh puan, ingat, Tapa inŭh adi ari agi nyibatŭh ata.

⁵¹Ati batuh adi aku ko nugung yŭn ata duwŭh, ka ati batuh pinatŭng.

⁵²Soduwŭh-i, tugung batuh ati ngga batuh pinatŭng ati inŭh jadi pingingat yŭn ta. Aku dŭh siŭn panu rewan tugung batuh ati di nyerang kuu, ka kuu dŭh gŭh siŭn panu rewan-i bait rewan batuh pinatŭng ati di nyerang aku.

⁵³Tapa Abraham ngga Tapa Nahor[75] re tukang tingga asi so ata duwŭh adi batur.” Komŭnŭ, di sirung jawin Tapa adi sama-i Isaac nyambah, Jacob bipayu an sita janji-i.

⁵⁴Ayŭh siŭ ndi dāng ndu sadis di darŭd anŭ ka ayŭh bagan daya daya-i ngga sua man. Ripas ko man, ngara nyirŭmŭn di darŭd anŭ.

⁵⁵Awar isan isan andu jawa ndi Laban sium bara sukuh-i ngga anak anak dayung-i buang nggen siramat panu ka pari ka ramin adŭp-i.