Read Biatah Bidayuh TIBIRIK 32 Bible Online

TIBIRIK 32 - Biatah Bidayuh bible

TIBIRIK 32

¹Buang Jacob gibabŭ panu di aran, kudu kudu naan malaikat agi bidapŭd ngga ayŭh.

²Kan ayŭh kiris ngara, ayŭh nang, “Ati inŭh bari Tapa,” jadi ayŭh kadŭn tarun anŭ Mahanaim.[76]

³Jacob pait bara pinyisung-i da diŭ so adŭp-i di ka yŭn kaka-i Esau di rais Edom.

⁴Ayŭh ngajar ngara da minyu sakati: “Aku, Jacob adi urun mai, nggen puan di tuan ku Esau nang aku agi rŭŭ ngga Laban ka aku mbŭh raru tui dŭh mari.

⁵Aku biyŭn sapi, kaldi, biri, kambing ka urun. Aku pait pinganang ka kaam tuan amai harap kaam re dŭh tia mandam atin di aku.”

⁶Kan bara pinyisung anŭ pari ka yŭn Jacob, ngara nang di ayŭh, “Kieh di ka yŭn kaka mai Esau, ka ayŭh madin mbŭh aŭn panu re bidapŭd ngga kaam. Ayŭh taban 400 naan daya.”

⁷Jacob mbŭh ruai taru buang gapang atin-i. Ayŭh kutung bara daya adi ayō-i da jadi duwŭh tibaran, samŭn bara biri, sapi, kambing, ka onta-i.

⁸Ayŭh pikir, “Kambŭi Esau mandŭg ka nyerang tibaran adi ndi, tibaran adi duwŭh bisa bu nyiramat adŭp-i.”

⁹Ka Jacob bidua, “O Tapa babai ku Abraham, ka Tapa sama ku Isaac, dingah aku! Kaam bada aku, TUHAN, pari ka rais adŭp ku, ka yŭn bara madis ku, ka bada aku mujur darŭm pimudip ku.

¹⁰Aku adi urun mai mbŭh raru dŭh patut kambat mandis ngga pinyitŭtŭd mai. Dawŭ-i di andu aku mutas yang Jordan mating ani ani taban ku kaŭs-i ndi sikud, ka madin aku mbŭh mari ngga duwŭh tibaran ati.

¹¹Aku bidua mite Kaam, tak aku so baji kaka ku Esau. Aku taru ayŭh mandŭg di nyerang ka siŭ sopŭrŭg kieh, samŭn dayung ngga anak anak-sŭ.

¹² Ingat Kaam mbŭh bijanji re bada pimudip ku mujur ka nggen bagŭ sesang di aku rabis so tungang daya mirang, keya ka sumat di pang rawŭt.”

¹³Ripas ko nyirŭmŭn diginŭ, Jacob mien so kaban dāng-i ndu pinganggen yŭn kaka-i Esau: 200 dayung kambing ngga 20 dari-i. 200 dayung biri ngga 20 dari-i. 30 onta adi gibabŭ nyisuh anak-i, 40 dayung sapi ngga 10 dari-i, 20 dayung kaldi ngga 10 dari-i.

¹⁶Ayŭh kutung dudu dāng-i bada bikaban ka na ndi naan daya gaji-i di barang kaban da jaga. Ayŭh nang di ngara, “Panu angān diŭ so aku, ka ndai asah di barang kaban dāng adi diŭ ngga adi sundis.”

¹⁷Ayŭh pesan daya-gaji adi diŭ sakati, “Kan kaka ku Esau bidapŭd ngga kuu ka siken, ‘Asi tuan mu? Re kamaki kuu? Asi dapu dāng dāng anŭ adi kuu nguru?’

¹⁸Kuu dŭh siŭn dŭh nam, ‘Urun mai Jacob inŭh adi dapu dāng dāng ati, ka ayŭh mbŭh pait-i ndu pinganggen ka tuan-i Esau. Adŭp Jacob agi panu sundis so kieh.’ ”

¹⁹Sakanŭ gŭh ayŭh pesan daya gaji-i adi numbor duwŭh ka numbor taruh, ka adi bŭkŭn adi jaga barang kaban dāng-i: “Angān dŭh siŭn dŭh nang sakati di Esau kan angān bidapŭd ngga ayŭh.

²⁰Angān dŭh siŭn dŭh nang, ‘Sawŭ urun mai Jacob agi tunda punok ami.’ ” Jacob nang darŭm asŭng-i, “Aku re tungang kadud atin-i ngga dudu pinganggen, ka kan aku bidapŭd ngga ayŭh aku harap ayŭh apun aku.”

²¹Ayŭh pait dudu pinganggen anŭ diŭ so adŭp-i, ka adŭp-i nyirŭmŭn ngarŭm anŭ di yŭn ngara bibari.

²²Ngarŭm anŭ gŭh Jacob makat, tambit duwŭh naan sawŭn-i, duwŭh naan dayung nyikŭn-i, ka simŭng madis anak-i, ka mutas Yang Jabbok.

²³Ripas ayŭh muko bada ngara mutas, ayŭh bada dog taban mutas gŭh sopŭrŭg kayuh adi-i dapu,

²⁴pak adŭp-i dŭh sua, ka rŭŭ diginŭ sadi-i. Ka agi ndi naan daya mandŭg ka bigire ngga ayŭh ndŭg siri jawa.

²⁵Kan daya anŭ kinyam adŭp-i dŭh tungang ngarah Jacob, ayŭh ani' Jacob di tigang ka puun sape-i sitiked.

²⁶ Daya anŭ nang, “Pasan aku, andu mbŭh re jawa.” Jacob nam, “Abah aku, kambŭi kaam dŭh nyiberkat aku.”

²⁷“Asi dŭn mu?” daya anŭ siken. “Jacob,” ayŭh nam.

²⁸ Daya anŭ nang, “Dŭn mu dŭh re tia Jacob. Kuu mbŭh bigire ngga Tapa ka ngga manusia, ka kuu mbŭh manang; sabab anŭ kuu re dog kadŭn Israel.”[77]

²⁹ Jacob nang, “Kidaan meh dŭn mai di aku.” Pak daya anŭ nam, “Mani kuu sah an puan dŭn ku?” Komŭnŭ ayŭh nyiberkat Jacob.

³⁰Jacob nang, “Aku muko situra jawin kiris Tapa, ka aku gibabŭ udip.” Ngapŭi ayŭh kadŭn tarun anŭ Peniel.[78]

³¹Batŭh andu aŭn makat kan Jacob bu so Peniel, buang-i nyitijong naman tigang-i.

³²Ndŭg andu ati bara sesang Israel dŭh siŭn man isin adi ngagit turang tigang ngga turang pŭŭh dāng, amai di isin anŭ inŭh Jacob dog ani'.