Read Biatah Bidayuh TIBIRIK 33 Bible Online

TIBIRIK 33 - Biatah Bidayuh bible

TIBIRIK 33

¹Jacob kiris Esau mandŭg ngga pat ratus naan daya-i, jadi ayŭh kutung bara anak-i bada panu samah ngga sindŭ ngara Leah, Rachel, ngga duwŭh naan dayung nyikŭn-i.

²Ayŭh bada dayung nyikŭn-i ngga anak anak ngara panu diŭ, komŭnŭ Leah ngga anak anak-i, ka sikasŭn-i Rachel ngga Joseph tura ka punok.

³Jacob panu diŭ so ngara ka mutu ubak-i pikuju kari buang-i tudu kaka-i.

⁴Pak Esau bikaduh tudu ayŭh, dakŭp ayŭh, ka sium ayŭh. So-duwŭh ngara sien.

⁵Kan Esau kimat bait tauh-i ka kiris bara dayung ngga bara anak ngara, ayŭh siken, “Asi ngara ati ayō mu?” “Ngara, tuan, inŭh bara anak ku adi Tapa ngga raru mandis-I mbŭh nggen di aku,” Jacob nam.

⁶Komŭnŭ dayung nyikŭn-i adi duwŭh naan mandŭg ngga bara anak ngara ka mutu ubak ngara;

⁷komŭnŭ Leah ngga jangi anak, ka sikasŭn-i Joseph ngga Rachel mandŭg gŭh ka mutu ubak ngara.

⁸Esau siken, “Tibaran asi meh garang anŭ adi muko aku dapŭd? Ani rati anŭ?” Jacob nam, “Anŭ ngga aku bada atin mu dŭh mandam di aku.”

⁹Pak Esau nang, “Sude ku, jaku mbŭh sadang; nyikŭn adŭ anŭ adi tung jamu.”

¹⁰Jacob nang, “Dŭh simŭnŭ, kambŭi kuu mbŭh kana ngga aku, aku mite kuu kambat adŭ pinganggen ku. Tingga raŭn mu adŭ mbŭh keya ka tingga jawin Tapa, amai kuu mbŭh raru kana ngga aku.

¹¹Turung trima pinganggen ku adi aku mbŭh taban ka kuu. Tapa mbŭh raru mandis ngga aku ka mbŭh nggen di aku sopŭrŭg adi aku biguna.” Jacob darah ngasu ayŭh ndŭg ka ayŭh trima adŭ.

¹²Esau nang, “Ja meh garang panu. Aku re panu diŭ so kuu.”

¹³Jacob nam, “Kuu puan nang bara anak anak ati ramah, ka aku an rada gŭh biri ngga kaban dāng adi mira sŭ. Kambŭi ngara dog takan da panu ndi andu dinge, ndi kaban anŭ re abo kabŭs.

¹⁴Turung panu diŭ so aku. Aku bisa tunda kuu ngga situngang tungang ku taban kaban dāng ngga bara anak-sŭ ati ndŭg ka aku nyandat kuu di Edom.”

¹⁵Esau nam, “Bada garang aku tingge kada so bara daya ku ngga kuu.” Pak Jacob nam, “Dŭhsah ndai simŭnŭ; aku batur ku raan bada asŭng mu sanang.”[79]

¹⁶Jadi andu anŭ Esau panu pari ka Edom.

¹⁷Pak Jacob di ka Sukkoth, di yŭn-i pijog ramin-i ka sidangak yŭn dāng kudip-i. Anŭ sabab tarun anŭ dog kadŭn Sukkoth.[80]

¹⁸Darŭm-i pari so Mesopotamia Jacob mandŭg ngga siramat ka kupo Shechem di tarun tana Canaan ka bibari di tana sindŭk kupo anŭ.

¹⁹ Ayŭh miris supek tana anŭ so sesang Hamor sama Shechem ngga rega siratus kiping pirak.

²⁰Ayŭh pijog ndi mija-sambah diginŭ ka kadŭn-i El, Tapa Israel.