Read Biatah Bidayuh TIBIRIK 34 Bible Online

TIBIRIK 34 - Biatah Bidayuh bible

TIBIRIK 34

¹Ndi andu Dinah, anak dayung Jacob ngga Leah, di muah ka yŭn kada dayung daya Canaan.

²Kan anak Hamor adi dŭn Shechem, pingubak bara daya Hivi di tarun tana anŭ kiris ayŭh, Shechem nakap ayŭh ka miragag ayŭh.

³Pak ayŭh kiris dayung anŭ raru ramus ka awang ayŭh, ka suba bada ayŭh awang adŭp-i.[81]

⁴Ayŭh kidaan di sama-i, “Aku raan kaam tambit Dinah yŭn ku ndu sawŭn.”

⁵Jacob dingah anak dayung-i dog pimangŭh, pak sabab bara anak dari-i mbŭh abo di tarun ngga dāng kudip-i, ayŭh dŭh ndai ani ani ndŭg ka ngara mbŭh mari.

⁶Hamor, adi sama Shechem, di bisatur ngga Jacob,

⁷di tika bara anak Jacob aŭn mari so tarun. Kan ngara dingah kayuh adi mbŭh jadi, ngara mbŭh raru gŭgŭh buang raru baji di Shechem di pingandai-i anŭ, miragag anak Jacob ngga pimangŭh daya Israel.

⁸Hamor nang di ayŭh, “Anak ku Shechem mbŭh raru awang anak mu; turung bada ayŭh tambit anak mu ndu sawŭn.

⁹Ja ata ndai pekat-janji isa dari dayung so tibaran ngan ngga so tibaran ami bisa banan sawan.

¹⁰Ka angān bisa rŭŭ digiti di rais ami ngga kieh; angān bisa rŭŭ di tadŭ yŭn nanyam pinyiraan ngan, bijua bijaja ka biyŭn buat-rata.”

¹¹Komŭnŭ Shechem nang di sama Dinah samŭn di bara jurud dari-i, “Turung nggen pimite ku ati, ka aku re nggen di angān ani ani adi raan ngan.

¹²Kidaan di aku ani pinganggen adi angān raan, ka natap rega sikiang adi raan ngan yŭn Dinah ndu ku sawŭn; aku an nggen tadŭ tadŭ kayuh adi angān mite, atas angān an bada aku sawŭn ayŭh.”

¹³Sabab Shechem mbŭh pimangŭh jurud ngara Dinah, bara anak dari Jacob nam Shechem ngga sama-i Hamor, pakai aran tipu.

¹⁴Ngara nang di ayŭh, “Kieh dŭh tungang bada jurud dayung ami banŭh dari adi dŭh bisunat; anŭ re nggen mangŭh di kieh.

¹⁵Kieh bisa situju adŭ-i kambŭi sopŭrŭg dari ngan dog nyunat mun kieh.

¹⁶Simŭnŭ ka kieh bisa situju di banan sawan dari dayung so tibaran ngan ngga so tibaran ami. Kieh bisa rŭŭ di ruang ngan ka jadi ndi tibaran daya ngga angān.

¹⁷Pak kambŭi angān dŭh trima atur ami ati ka dŭh dog nyunat, kieh re taban Dinah ngga bu so tarun ati.”

¹⁸Atur anŭ agi kana sak-i di Hamor ngga di anak-i Shechem,

¹⁹anŭ sabab bujang dari anŭ dŭh taran masā pak rasu ndai nimun adi muko dog nyabŭt amai-i awang anak dayung Jacob. Shechem inŭh daya adi raru dog stabi di rawang-i.

²⁰Hamor ngga anak-i Shechem di ka tarun adi yŭn daya tikuruk di tiban-bās kupo ka minyu ngga bara daya di kupo anŭ:

²¹“Bara daya anŭ kana; bada ngara rŭŭ di ruang ta ka panu kamati kamanŭ dŭh dog mito. Tarun tana ati agi sadang bayah yŭn ngara sua rŭŭ dieh. Ata bisa sawŭn anak dayung ngara ka ngara bisa sawŭn anak dayung ta.

²²Pak ngara anŭ situju rŭŭ bigaur jadi ndi tibaran ngga ata kambŭi ata nyunat sopŭrŭg dari ta mun ngara.

²³Dŭh kah kaban dāng ngara ka sopŭrŭg kayuh adi bŭkŭn jadi tung jata gŭh? Ja ata samah samah situju bada ngara rŭŭ bigaur ngga ata.”

²⁴Sopŭrŭg daya di kupo anŭ situju di pinganang Hamor ngga Shechem, ka sopŭrŭg dari ngara dog nyunat.

²⁵Taruh andu ripas anŭ, kan bara dari gibabŭ naman sunat ngara, duwŭh madis so bara anak Jacob, Simeon ngga Levi, adi jurud Dinah, tambit pedang ngara ka di ka kupo anŭ ngga gaya adi dŭh daya puan ka siŭ sopŭrŭg dari,

²⁶samŭn Hamor ngga anak-i Shechem. Komŭnŭ ngara tambit Dinah ngga bu so ramin Shechem.

²⁷Ripas muko siŭ ngara, anak dari Jacob adi bŭkŭn di sirapas kayuh kayuh di kupo anŭ ngga maras mangŭh adi muko dog ndai di tunduh jurud dayung ngara.

²⁸Ngara sirapas biri biri, sapi sapi, kaldi, samŭn kayuh kayuh bŭkŭn adi agi darŭm kupo anŭ bait di teya.

²⁹Ngara tambit sopŭrŭg kayuh adi brega, nakap sopŭrŭg dayung, samŭn bara anak-sŭ, ka taban ngga bu tadŭ tadŭ kayuh adi agi darŭm ramin.

³⁰Jacob nang di Simeon ngga Levi, “Angān mbŭh taban pinyusah ka aku; madin bara daya Canaan ngga bara daya Periz, samŭn ngara adi bŭkŭn di tarun tana ati re tiru kiris aku. Ata dŭh bagŭ; ka kambŭi ngara nguruk adŭp-i rawan aku ka nyerang aku, sopŭrŭg rawang ta ati re rarap.”

³¹Pak ngara nam, “Kieh dŭh an tandah jurud dayung ami dog ndai mun dayung sundar.”