Read Biatah Bidayuh TIBIRIK 38 Bible Online

TIBIRIK 38 - Biatah Bidayuh bible

TIBIRIK 38

¹Ngga arong tika anŭ Judah tingge bara jurud-i di rŭŭ ngga ndi naan daya dŭn Hirah, adi mandŭg so kupo Adullam.

²Diginŭ Judah bidapŭd ngga ndi naan dayung daya Canaan anak Shua. Ayŭh tambit ayŭh ndu sawŭn.

³Dayung anŭ biranak yŭn-i ndi anak dari adi-i kadŭn Er.

⁴Ayŭh bite dinge ka biranak anak dari dinge ka kadŭn-i Onan.

⁵Gibabŭ gŭh ayŭh biranak anak dari dinge ka kadŭn-i Shelah. Judah di kupo Achzib di andu anak-i anŭ dog biranak.

⁶Yŭn anak pinuai-i Er, Judah dapŭd ndi naan dayung adi dŭn Tamar ndu-i sawŭn.

⁷Urah rakah Er ruai nang ginaka-i, ka dŭh-i pimunos asŭng TUHAN, jadi TUHAN tambit asŭng-i.

⁸Ka Judah nang di Onan, sude Er, “Di nyibŭŭs ngga uban kaka mu. Ndai simŭnŭ, kuu adi jurud banŭh-i ngga pijadi sesang yŭn kaka mu.”

⁹Pak Onan puan nang anak-i anŭ dŭh ayŭh re dapu, ngapŭi di tiap kari ayŭh nyibŭŭs ngga uban kaka-i, ayŭh bada piin bine-i ruah di sapa, isa kaka-i dŭh dapŭd sesang.

¹⁰Urah-i anŭ bada asŭng TUHAN dŭh munos, ka TUHAN tambit asŭng-i gŭh.

¹¹Judah nang di iban-i Tamar, “Kiang kuu pari adŭ ka rŭŭ di ramin sama mu ka udip nimun dayung uban ndŭg ka anak ku Shelah mbŭh baga.” Ayŭh nang sakanŭ amai ayŭh taru te Shelah kabŭs mun kaka-i adi duwŭh madis. Jadi Tamar pari ka rŭŭ di ramin sama adŭp-i.

¹²Dŭh tui ripas anŭ sawŭn Judah kabŭs. Kan tipuh adi ngga-i ngurid mbŭh ripuan, ayŭh ngga jerā-i Hirah daya so Adullam di ka Timnah, di yŭn-i gumbak buruh biri-i.

¹³Daya kidaan di Tamar nang damŭh-i re di ka Timnah di gumbak buruh biri-i.

¹⁴Jadi ayŭh rasu kadi piraka uban-i, nutu jawin-i ngga taŭb, ka guru di tiban-bās kupo Enaim, kupo di aran nuju Timnah. Ayŭh taŭn puan sibusu Judah adi dŭn Shelah mbŭh baga, pak gibayuh dog bada jadi banŭh-i.

¹⁵Kan Judah kiris Tamar, ayŭh pikir ayŭh anŭ dayung sundar, amai jawin-i dog nutu.

¹⁶Judah di tudu ayŭh adi guru di pang aran ka siken, “Kiang-ki aku patut bayar kuu?” (Ayŭh dŭh puan nang ayŭh anŭ iban-i.) Ayŭh nang, “Ani re mu nggen di aku?”

¹⁷Judah nam, “Aku re nggen di kuu ndi anak kambing adi so kaban dāng ku.” Ayŭh nam, “Bisa, kambŭi kuu an nggen di aku kayuh ndu tandā janji ndŭg ka kuu pait anak kambing anŭ ka aku.”

¹⁸“Ani an mu aku nggen di kuu ndu tandā janji?” ayŭh siken. Tamar nam, “Kukong chop-tandā mu anŭ ngga sikud adi di tangan mu.” Ayŭh nggen so-duwŭh anŭ di ayŭh. Komŭnŭ ngara rasu nyibŭŭs, ka ayŭh bite.

¹⁹Tamar maad ka arŭn-i, kadi taŭb so jawin-i, ka pari kasŭk piraka uban-i.

²⁰Judah bada jerā-i Hirah di tŭd kambing anŭ ka tambit pari so dayung anŭ kayuh kayuh adi ndu-i tandā janji, pak Hirah dŭh tungang dapŭd dayung anŭ.

²¹Hirah siken di daya di Enaim, “Diki dayung sundar anŭ adi ko guru di pang aran ati?” “Gi-bŭn dayung sundar agi digiti,” ngara nam.

²²Hirah pari ka kidaan di Judah, “Aku dŭh tungang dapŭd dayung anŭ. Bara daya di tarun anŭ nang gi-bŭn dayung sundar agi diginŭ.”

²³Judah nang, “Tandah ayŭh nyikŭn kayuh kayuh anŭ. Ata dŭh raan daya tawŭh adŭp ata. Aku raan bayar ayŭh, pak kuu dŭh tungang dapŭd ayŭh.”

²⁴Na ka taruh buran ripas anŭ agi daya kidaan di Judah, “Iban mu Tamar agi ndai urah keya ka dayung sundar ka madin mbŭh bite.” Judah nggen ukum, “Taban ayŭh ka sapa ka badang ayŭh ndŭg kabŭs.”

²⁵Darŭm Tamar dog taban ka sapa, ayŭh pait pinganang ka damŭh-i. “Aku bite da daya adi dapu kayuh kayuh ati. Tingga kayuh ati ka asi dapu-i. Kukong chop-tandā ngga sikud ati.”

²⁶Judah natŭng kayuh kayuh anŭ ka nang, “Ayŭh dŭh sarah. Aku sarah amai aku dŭh bada ayŭh banŭh anak ku Shelah.” Ka Judah dŭh tia nyibŭŭs ngga ayŭh dinge.

²⁷Kan tipuh adi ngga ayŭh biranak, ayŭh mbŭh dog puan re biranak anak apid.

²⁸Darŭm ayŭh aŭn naman andam sarang biranak, ndi so anak-i piruah tangan-i ka sapa, rasu pinading nakap ka mŭŭng tiburi bireh di tangan anŭ, ka nang, “Siati inŭh adi diŭ ruah.”

²⁹Pak anak anŭ pari pibŭrŭt tangan-i, ka apid-i diŭ ruah. Ka pinading anŭ nang, “Simŭnŭ kuu pirupas adŭp mu ka sapa dian-i!” Jadi ayŭh dog kadŭn Perez.[88]

³⁰Komŭnŭ apid-i ruah adi dog mŭŭng tiburi bireh di tangan-i, ka ayŭh dog kadŭn Zerah.[89]