Read Biatah Bidayuh TIBIRIK 4 Bible Online

TIBIRIK 4 - Biatah Bidayuh bible

TIBIRIK 4

¹Jadi Adam nyibŭŭs ngga sawŭn-i Eve, ka-i bite. Ayŭh biranak ndi anak dari; ka-i rasu nang, “Ngga pinurung TUHAN aku mbŭh dapŭd anak ati.” Ka-i kadŭn ayŭh Cain.[15]

²Ripas anŭ, ayŭh biranak ndi anak dari dinge, adi-i kadŭn Abel. Abel jadi pingingat-biri, pak Cain jadi daya birŭmŭh.

³Mua tian-i ripas anŭ, Cain tambit kada buwa pingatŭm-i, ka jugan ndu sadis ka TUHAN.

⁴ Ka Abel taban gŭh anak bungas so biri biri-i, siŭ-i ka nggen tatad-i adi siabo kana ndu sadis. Yang TUHAN mbŭh raru munos di Abel ngga di sadis-i,

⁵pak-I abah di Cain samŭn sadis adi jugan-i. Cain mbŭh raru baji buang nyibanyu.

⁶Jadi TUHAN minyu ngga Cain, nang-I, “Mani kuu baji? Mani kuu nyibanyu?

⁷Kambŭi kuu mbŭh ndai kayuh adi kana, tatu kuu tawŭh;[16] pak sabab kuu mbŭh ndai kayuh adi arap, dosa mbŭh tuman kuu ka re ngarah kuu. Ayŭh raan nguasa kuu, pak kuu dŭh siŭn dŭh ngarah ayŭh.”

⁸ Ripas anŭ, Cain minyu ngga sude-i Abel, “Ja ata ruah panu.”[17] Kan ngara mbŭh di sapa tarun, Cain siŭ sude-i.

⁹TUHAN siken Cain, “Diki sude mu Abel?” Ayŭh nam, “Dŭh aku puan. Aku tukang kingat jaga ayŭh kah?”

¹⁰ Ka TUHAN nang, “Mani kuu mbŭh ndai kayuh adi raru sipŭ-i? Deya sude mu mbŭh bagan Aku so tana, sak sirŭŭn bagan mite baras.

¹¹Kuu mbŭh dog pangu ka re dŭh tia tungang purun kayuh di tana. Tana mbŭh nyŭp deya sude mu, keya ka mbŭh kanga baba-i taŭ deya-i di tika kuu siŭ ayŭh.

¹²Kan kuu birŭmŭh bait biteya, tana dŭh re bada kayuh adi purun mu timbu. Pinyirŭŭ mu dŭh re bituku, ka re bigandon di ndi abong tarun.”

¹³Ka Cain nang di TUHAN, “Ukum anŭ mbŭh rabis so adi tungang aku gŭrŭng.

¹⁴Kaam pibu aku so tarun tana ati, ka dŭh an tia kiris aku. Aku re dŭh bituku pinyirŭŭ ku ka re bigandon di ndi abong tarun; ka daya adi bidapŭd ngga aku re siŭ aku.”

¹⁵Pak TUHAN nam ka nang di ayŭh, “Dŭh. Daya adi siŭ kuu re dog ukum baras ju rupet bās dŭ so ukum adi nyatŭk kuu.” Sabab anŭ meh, TUHAN na tandā di Cain, isa-i kan daya bidapŭd ngga ayŭh, daya dŭh siŭ ayŭh.

¹⁶Jadi Cain birakang ngga TUHAN ka rŭŭ di ndi tarun tana adi dŭn “Bigandon,” tura ka timor di sapa Eden.

¹⁷Cain ngga sawŭn-i biyŭn ndi anak dari ka kadŭn-i Enoch. Komŭnŭ Cain pijog ndi kupo ka kadŭn-i Enoch, tunda dŭn anak-i.

¹⁸Enoch biyŭn ndi anak dari dŭn Irad, adi jadi sama Mehujael, ka Mehujael biyŭn ndi anak dari dŭn Methushael, adi jadi sama Lamech.

¹⁹Lamech biyŭn duwŭh sawŭn, Adah ngga Zillah.

²⁰Adah biranak Jabal, adi jadi tayung-babuk daya adi kudip dāng ka rŭŭ di bari.

²¹Sude dari Jabal inŭh Jubal, adi tayung-babuk sopŭrŭg daya adi pandai mambak kachapi ngga sitaboi.

²²Zillah biranak Tubal Cain, adi ndai barang masam pingakas[18] so timaga ngga basi. Sude dayung Tubal Cain inŭh Naamah.

²³Lamech nang di so-duwŭh sawŭn-i, “Adah, Zillah, dingah aku minyu: Aku agi siŭ ndi naan daya adi mara amai ayŭh mukong aku.

²⁴Kambŭi daya adi siŭ Cain dog ukum baras ju rupet bās dŭ so ukum adi nyatŭk Cain, ju puru-ju rupet baras ukum di daya anŭ adi siŭ aku.”

²⁵Adam ngga sawŭn-i biyŭn ndi dinge anak dari. Ka sawŭn-i nang, “Tapa mbŭh nggen di aku anak dari ngga gati Abel adi dog siŭ Cain.” Ngapŭi ayŭh kadŭn anak anŭ Seth.[19]

²⁶Seth biyŭn ndi anak dari adi-i kadŭn Enosh. So jaman anŭ daya piguru nyambah TUHAN ngga adŭn-I adi kudus.