Read Biatah Bidayuh TIBIRIK 40 Bible Online

TIBIRIK 40 - Biatah Bidayuh bible

TIBIRIK 40

¹Mua tian ripas anŭ, tukang pingidang wain raja di Egypt ngga pingubak tukang ndai ruti-i bada ayŭh baji.

²Ayŭh baji ngga duwŭh naan pinurung-i anŭ

³ka bada ngara dog kurung di ramin pingubak daya adi tukang jaga istana, samah di tarun yŭn Joseph dog kurung.

⁴Ngara tui rŭŭ di ramin jer, ka pingubak daya adi tukang jaga istana anŭ bada Joseph jadi daya-gaji ngara.

⁵Agi ndi ngarŭm meh, pingidang wain anŭ ngga pingubak tukang ndai ruti anŭ agi nyipŭmŭh ka pŭmŭh ngara dŭh brimun rati-i.

⁶Kan Joseph mandŭg ka yŭn ngara ngga isan isan, ayŭh kiris ngara raru susah.

⁷Joseph siken ngara, “Mani angān mun adi raru susah andu ati?”

⁸Ngara nam ayŭh, “Kieh duwŭh agi nyipŭmŭh, ka digiti mating daya tukang kidaan rati-i.” Joseph nam, “Tapa inŭh adi nggen pimandai ngga kidaan rati pŭmŭh.” “Kidaan di aku pŭmŭh ngan.”

⁹Pingidang wain nang, “Darŭm pŭmŭh ku aku kiris ndi tŭngŭn anggor di sirung jawin ku.

¹⁰Tŭngŭn anggor anŭ biyŭn taruh daan-i. Darŭm-i pidawŭn ayŭh rasu bisera, ka buwa-i rasu masak.

¹¹Aku digŭng saker tuan raja; jadi aku tambit anggor anŭ ka mŭ ju-i ka darŭm saker anŭ ka nggen-i di ayŭh.”

¹²Joseph nang, “Ati rati-i: taruh daan anŭ inŭh taruh andu.

¹³Dŭm taruh andu so madin, raja re piruah kuu, re apun kuu ka re bada kuu pari ndai kraja mu. Kuu re nggen saker di ayŭh nimun dawŭ-i kuu jadi pingidang wain-i.

¹⁴Pak turung ingat aku kan sopŭrŭg kayuh mbŭh kana yŭn mu, ka turung nyabŭt aku di raja isa aku tungang dog piruah so ramin jer ati.

¹⁵Sibandar-i, aku dawŭ-i dog nakap so tarun tana daya Hebrew, ka digiti di Egypt aku mating ndai sarah adi yŭn aku patut dog na di ramin jer.”

¹⁶Kan pingubak tukang ndai ruti dingah rati pŭmŭh pingidang wain anŭ agi kana sak-i, ayŭh nang di Joseph, “Jaku agi gŭh pŭmŭh; aku nyipŭmŭh aku agi taruh bakur di tunduh ubak ku.

¹⁷Di darŭm bakur anŭ adi sikasŭn tunduh agi barang masam ruti yŭn raja, ka manuk manuk man-i.”

¹⁸Joseph nam, “Ati rati-i: taruh bakur anŭ inŭh taruh andu.

¹⁹Dŭm taruh andu so madin, raja re piruah kuu so ti ka re kapŭg ubak mu! Ayŭh re kideng tadang mu di ndi tiang, ka dudu manuk re man isin mu.”

²⁰Di andu pinyibranak-i taruh andu ripas anŭ raja ndai gawai ka bagan sopŭrŭg pinurung-i; ayŭh piruah so ramin jer pingidang wain-i ngga pingubak tukang ndai ruti-i ka taban ngara ka sirung jawin bara pinurung-i.

²¹Pingidang wain anŭ raja bada pari ndai kraja-i,

²²pak pingubak tukang ndai ruti anŭ, ayŭh bada dog ukum kabŭs. Sopŭrŭg anŭ jadi nimun adi ko Joseph kidaan.

²³Pak pingidang wain anŭ mbŭh dŭh tia ingat Joseph. Ayŭh kambŭt Joseph.