Read Biatah Bidayuh TIBIRIK 41 Bible Online

TIBIRIK 41 - Biatah Bidayuh bible

TIBIRIK 41

¹Kan mbŭh ripuan duwŭh sawa, raja Egypt pŭmŭh adŭp-i mijog di tabing Yang Nile,

²kan ju pŭrŭng sapi adi gamu buang jarŭh ka ramus makat so yang anŭ ka rasu man kupai.

³Ripas anŭ makat gŭh ju pŭrŭng sapi adi bŭkŭn adi raru manyuh mirigung. Ngara anŭ mijog brindŭk ngga bara sapi adi bŭkŭn di tabing yang anŭ,

⁴ka sapi adi manyuh kubo man sapi adi gamu. Komŭnŭ raja anŭ burah.

⁵Ayŭh bŭŭs dinge ka dapŭd pŭmŭh adi bŭkŭn. Ju tundun gandom adi pigandŭ buang masak di ndi tŭngŭn.

⁶Komŭnŭ ju tundun gandom adi bŭkŭn ruah gŭh, piraping ka mangas da sabak adi mandŭg so tarun tana-pajam.

⁷Jadi tundun tundun gandom adi piraping kubo tŭrŭn tundun tundun adi pigandŭ. Raja anŭ burah ka rada adŭp-i nyipŭmŭh.

⁸ Ngga isan isan andu sipagi ayŭh mbŭh susah ka-i bagan sopŭrŭg pinanung ngga daya bijak di Egypt. Ayŭh kidaan di ngara pŭmŭh-i, pak mating so ngara dapŭd kidaan rati-i.

⁹Komŭnŭ pingidang wain nang di raja, “Aku dŭh siŭn dŭh ngaku andu ati aku agi ndai sarah.

¹⁰Kaam ko baji di pingubak tukang ndai ruti samŭn di aku, ka kaam kurung kieh di ramin pingubak daya adi tukang jaga istana.

¹¹Di ndi ngarŭm kieh agi samah nyipŭmŭh, pak pŭmŭh ami dŭh brimun rati-i.

¹²Ngga kieh agi ndi naan pimara daya Hebrew, urun pingubak daya adi tukang jaga istana. Kieh nyidundan di ayŭh pŭmŭh ami ka ayŭh kidaan rati-i di kieh.

¹³Kayuh adi-i kidaan jadi bitŭtŭk: kaam bada aku pari nyiraja mun adi mbŭh, pak kaam siŭ ayŭh adi tukang ndai ruti.”

¹⁴Raja anŭ bada daya bagan Joseph, ka-i rasu dog taban ruah so ramin jer. Ripas-i muko bigumbak ka nukar piraka-i, ayŭh di ka yŭn raja.

¹⁵Raja nang di ayŭh, “Aku agi pŭmŭh, pak mating daya tungang kidaan rati-i. Aku agi dog kidaan nang kuu pandai kidaan rati pŭmŭh.”

¹⁶Joseph nam, “Dŭh aku pandai, Tuan Raja, pak Tapa tungang kidaan rati-i.”

¹⁷Raja nang, “Aku pŭmŭh adŭp ku mijog di tabing Yang Nile,

¹⁸kan ju pŭrŭng sapi adi gamu buang jarŭh ramus, makat so yang anŭ ka rasu man kupai.

¹⁹Komŭnŭ ju sapi adi bŭkŭn makat gŭh so nŭ adi manyuh mirigung. Ngara anŭ mbŭh siabo abo arap sapi so adi mbŭh aku kiris di tadŭ yŭn di Egypt.

²⁰Sapi anŭ adi manyuh kubo man anŭ adi gamu,

²¹pak mating daya tungang puan, amai tain ngara babŭ mun mun-i manyuh. Komŭnŭ aku burah.

²²Aku pŭmŭh gŭh adŭp ku agi kiris ju tundun gandom adi pigandŭ buang masak di ndi tŭngŭn.

²³Komŭnŭ ju tundun adi bŭkŭn ruah gŭh, adi piraping ka mangas da sabak so tarun tana-pajam,

²⁴ka tundun anŭ adi piraping kubo tŭrŭn anŭ adi pigandŭ. Aku kidaan pŭmŭh pŭmŭh ku anŭ di bara pinanung, pak mating katŭn ngara tungang kidaan rati-i di aku.”

²⁵Joseph nang di raja, “So-duwŭh pŭmŭh anŭ agi brimun rati-i; Tapa mbŭh kidaan di kaam kayuh adi re-I ndai.

²⁶Ju pŭrŭng sapi adi gamu anŭ inŭh ju sawa, ka ju tundun gandom adi pigandŭ anŭ gŭh ju sawa; rati-i agi samah.

²⁷Ju pŭrŭng sapi adi manyuh adi mandŭg sundis ka ju tundun gandom adi piraping ka mangas da sabak so tarun tana-pajam inŭh ju sawa apag.

²⁸Nimun adi nang ku di kaam, Tapa mbŭh kidaan di kaam kayuh adi re-I ndai.

²⁹Re agi, sitŭkŭd ju sawa, gandom raru bagŭ di ndi tarun tana Egypt.

³⁰Ripas anŭ re agi apag sitŭkŭd ju sawa, ka sopŭrŭg sawa adi ngga gandom raru bagŭ re dog kambŭt, sabab apag anŭ re pirusak rais.

³¹Tipuh adi ngga gandom raru bagŭ re dog kambŭt, sabab ko anŭ apag re raru bisā.

³²Pŭmŭh mai adi piduwŭh saba rati-i Tapa mbŭh ngŭtŭ nang kayuh anŭ dŭh siŭn dŭh jadi, ka dŭm dŭh tui re jadi.

³³“Madin kaam patut mien daya adi bijak buang pitar ka bada ayŭh tukang nguasa rais.

³⁴Kaam dŭh siŭn dŭh gŭh tijuan bara pinurung adi bŭkŭn ka nguruk ndi utung so rimŭh so buwa buwa pimuruh darŭm ju sawa adi ngga gandom raru bagŭ.

³⁵Mritah ngara da nguruk sopŭrŭg pinguman darŭm sawa adi re mandŭg adi ngga gandom raru bagŭ, ka nggen di ngara kuasa da nyikŭn gandom di barang kupo ka jaga-i.

³⁶Pinguman anŭ an dog nyikŭn tah ju sawa apag adi re mandŭg nyatŭk Egypt. Kambŭi nŭŭh ndai simŭnŭ daya ratus dŭh re sikirau.”

³⁷Raja ngga bara pinurung-i nyibandar atur anŭ,

³⁸ka-i nang di ngara, “Ata dŭh tungang dapŭd daya adi patut dŭ so Joseph; ayŭh daya adi biyŭn roh Tapa di adŭp-i.”

³⁹Raja nang di Joseph, “Tapa mbŭh kiren sopŭrŭg kayuh ati di kuu, ngapŭi kuu tatŭng biyŭn pinyibijak ngga pitar dŭ so daya bŭkŭn.

⁴⁰ Aku tijuan kuu da tukang nguasa rais ku, ka sopŭrŭg daya ku re nundok di kuu. Kuasa mu adŭ-i re numbor duwŭh so jaku.

⁴¹Aku madin tijuan kuu jadi gabenor di ndi tarun tana Egypt.”

⁴² Raja pirudos sisin so trinju adŭp-i adi agi chop-tandā raja dieh ka kasŭk-i di trinju Joseph. Ayŭh kasŭk gŭh di Joseph jipo-ambu adi dog ndai so banang linen adi grua, ka na gŭh kukong mas di tungo-i.

⁴³Raja nggen di ayŭh krita kuda adi numbor duwŭh yŭn raja bada ayŭh pakai, ka bara pingibān-stabi panu diŭ, buang nyirais nang, “Nggen aran! Nggen aran!” Simŭnŭ inŭh Joseph dog tijuan jadi gabenor di ndi tarun tana Egypt.

⁴⁴Raja nang di ayŭh, “Aku ati raja, pak mating daya di ndi tarun tana Egypt re nyimau mau ndai kayuh kambŭi gibayuh dapŭd pinyibandar so kuu.”

⁴⁵Ayŭh kadŭn Joseph ngga dŭn daya Egypt, Zaphenath Paneah, ka nggen di ayŭh sawŭn, Asenath anak Potiphera adi imam di kupo Heliopolis. Joseph mbŭh taruh puru sawa umbur-i kan ayŭh piguru nyiraja yŭn raja Egypt. Ayŭh ruah so yŭn raja ka panu di ndi tarun tana rais anŭ.

⁴⁶

⁴⁷Sitadŭn ju sawa adi ngga gandom raru bagŭ tana piruah raru bagŭ buwa pimuruh,

⁴⁸adi Joseph sun ka nyikŭn di barang kupo. Di barang kupo ayŭh nyikŭn pinguman so teya maning kupo anŭ.

⁴⁹Gandom mbŭh raru bagŭ jadi Joseph mbŭh dŭh tia nakar-i; mbŭh paŭh bagŭ keya ka sumat di pang rawŭt.

⁵⁰Diŭ so tipuh apag mandŭg, Joseph mbŭh biyŭn duwŭh madis anak dari so sawŭn-i Asenath.

⁵¹Ayŭh nang, “Tapa mbŭh bada aku kambŭt sopŭrŭg pinyusah ku, samŭn rawang sama ku;” jadi ayŭh kadŭn anak pinuai-i Manasseh.[90]

⁵²Ayŭh nang gŭh, “Tapa mbŭh nggen di aku anak di tarun tana pinyusah ku”; jadi ayŭh kadŭn anak-i adi numbor duwŭh Ephraim.[91]

⁵³Ju sawa adi ngga gandom raru bagŭ di tarun tana Egypt mbŭh ndŭg pinŭbŭn-i,

⁵⁴ ka ju sawa apag piguru, nanyam adi Joseph muko kidaan. Apag mbŭh agi di barang rais adi bŭkŭn, pak pinguman agi di ndi tarun tana Egypt.

⁵⁵ Kan daya bangsa Egypt mbŭh piguru dŭh biyŭn pinguman, ngara mite pinguman so raja. Jadi ayŭh bada ngara di ka yŭn Joseph ka ndai anŭ adi-i bada ngara ndai.

⁵⁶Apag mbŭh dŭ dŭ bisā ka mbŭh di ndi tarun tarun tana rais, jadi Joseph kuka sopŭrŭg ramin adi yŭn gandom dog nyikŭn ka jua-i ka bara daya bangsa Egypt.

⁵⁷Daya so ndi ong ong mandŭg ka Egypt di miris gandom so Joseph, sabab di barang yŭn-i apag mbŭh raru bisā.