Read Biatah Bidayuh TIBIRIK 44 Bible Online

TIBIRIK 44 - Biatah Bidayuh bible

TIBIRIK 44

¹Joseph bada daya-gaji adi tukang nguasa kayuh di ramin-i, “Ngisi guni ngara ngga sibagŭ bagŭ pinguman tungang ngara kabis, ka na duit barang naan ngara di darŭm baba guni-i.

²Na makuk pirak ku ngga duit rega gandom di darŭm baba guni sude sibusu ngara.” Daya-gaji anŭ ndai nimun dog kidaan.

³Awar isan isan andu jawa ndi ngara adi bijurud ati dog bada matak ngga kaldi ngara.

⁴Kan ngara gi-dŭh jo so kupo anŭ, Joseph nang di daya-gaji adi tukang nguasa kayuh di ramin-i, “Rikas di tadak ngara. Kan kuu mbŭh ndŭg ngara, siken, ‘Mani angān maras kana ngga arap?

⁵Mani angān naku makuk pirak tuan ku?[92] Anŭ makuk adi ayŭh siraru pakai ngga nok ka ngga nanung. Angān mbŭh ndai sarah bās.’ ”

⁶Kan daya-gaji anŭ nyandat ngara, ayŭh nang sak adi ko dog kidaan di ayŭh.

⁷Ngara nam ayŭh, “Ani rati pinganang mai sakanŭ, tuan, adi bada kaam minyu sakanŭ? Kieh bipayu kieh mating ndai simŭnŭ.

⁸Kaam puan kieh taban pari so tarun tana Canaan duit adi dog dapŭd darŭm guni ami. Simuki kieh re naku makuk pirak puan kah mas so ramin tuan mai?

⁹Tuan, kambŭi agi so kieh ati dog dapŭd tambit kayuh anŭ isa-i ayŭh dog ukum kabŭs, ka sopŭrŭg ami adi bŭkŭn jadi urun mai.”

¹⁰Ayŭh nang “Aku situju; pak kaŭs sianŭ adi tambit makuk pirak anŭ re jadi urun ku. Angān adi bŭkŭn bisa mari.”

¹¹Jadi ngara rasu mbas guni ngara di tana, ka samah kuka-i.

¹²Daya-gaji Joseph nakit pirasa, piguru so adi pinuai ndŭg sibusu, ka makuk anŭ dog dapŭd darŭm guni Benjamin.

¹³Ngara adi bijurud anŭ nyiratak piraka ngara darŭm susah. Na barang ngara di tunduh kaldi ngara, ka pari ka kupo anŭ.

¹⁴Kan Judah ngga jurud-i mandŭg ka ramin Joseph, ayŭh gi-babŭ diginŭ. Ngara mutu ubak ngara ka ayŭh,

¹⁵ka Joseph nang, “Ani anŭ ndai ngan? Dŭh kah angān puan nang daya mun aku ati bisa puan kayuh ndai ngan so kuasa nanung?”

¹⁶“Ani bisa kieh nang di kaam, tuan?” Judah nam, “Simuki kieh re bikarit? Simuki kieh re nang adŭp ami dŭh sarah? Tapa mbŭh kiren arap ami. Sopŭrŭg kieh madin mbŭh urun mai, dŭh-i sianŭ adi dog dapŭd ngga makuk pirak anŭ adŭ.”

¹⁷Joseph nam, “Dŭh! Aku dŭh bisa ndai simŭnŭ! Kaŭs-i sianŭ adi dog dapŭd ngga makuk anŭ adŭ re jadi urun ku. Angān adi bŭkŭn bisa mari ngga siramat ka yŭn sama ngan.”

¹⁸Judah di nyindŭk Joseph ka nang. “Tuan, turung bada aku minyu ngga kaam. Dŭhnyah tuas di aku; kaam mbŭh keya ka adŭp raja.

¹⁹Tuan, prajah kaam siken kieh, ‘Agi kah sama ngan puan kah jurud ngan adi bŭkŭn?’

²⁰Kieh nam, ‘Kieh biyŭn sama adi mbŭh minyamba ka ndi naan sude, adi dog biranak yŭn-i darŭm-i mbŭh minyamba. Kaka-i mbŭh kabŭs, ka ayŭh inŭh adi babŭ udip adi dog biranak sindŭ-i; sama-i ruai rindu ayŭh.’

²¹Tuan, kaam bada kieh taban ayŭh ngga kamati, isa kaam bisa kiris ayŭh,

²²ka kieh nam nang anak anŭ dŭh bisa tingge sama-i; kambŭi ayŭh tingge sama-i, sama-i tatu re kabŭs.

²³Ka kaam nang, ‘Angān dŭh re bisa bidapŭd ngga aku dinge kambŭi jurud sibusu ngan dŭh sua mandŭg ngga angān.’

²⁴“Kan kieh pari ka sama ami, kieh kidaan pinganang mai di ayŭh.

²⁵Komŭnŭ ayŭh bada kieh pari di miris pinguman.

²⁶Kieh nam, ‘Kieh dŭh bisa di; kieh dŭh bisa bidapŭd ngga daya anŭ kambŭi sude sibusu ami dŭh sua ngga kieh. Kieh dapŭd di adŭ-i kambŭi sude sibusu ami sua ngga kieh.’

²⁷Sama ami nang di kieh, ‘Angān puan nang sawŭn ku Rachel kaŭs-i biranak yŭn ku duwŭh madis anak dari.

²⁸Ndi naan mbŭh tingge aku. Ayŭh anŭ tatu mbŭh dog man dāng tarun, amai aku mating tia kiris ayŭh so andu-i ruah panu.

²⁹Kambŭi angān tambit siati ndi so aku ka ayŭh dog stika, pinyusah adi angān ndai di tunduh ku re bada aku kabŭs, aku ati adi mbŭh minyamba.’

³⁰“Jadi madin, tuan,” Judah pijuu minyu, “Kambŭi aku pari ka sama ku dŭh taban sude ami ati, ka darŭm-i kiris ayŭh mating sua mari, ayŭh re kabŭs. Asŭng sama ami bisangan di asŭng anak ati; ayŭh mbŭh minyamba ka pinyusah adi re kieh taban ka ayŭh taŭn re bada ayŭh kabŭs.

³²Nambah gŭh dinge, aku mbŭh bipayu ngga asŭng adŭp ku di sama ku yŭn anak ati. Aku kidaan nang kambŭi aku dŭh taban anak ati pari ka adŭp-i, aku re dapu tanggong sitŭkŭd umbur ku.

³³Jadi madin, tuan, aku adŭ rŭŭ digiti jadi urun mai ngga gati anak ati; bada ayŭh pari ngga bara kaka-i.

³⁴Simuki aku re pari ka sama ku kambŭi sude ami ati dŭh sua ngga aku? Aku dŭh raan bada pinyusah ati nyatŭk sama ku.”