Read Biatah Bidayuh TIBIRIK 45 Bible Online

TIBIRIK 45 - Biatah Bidayuh bible

TIBIRIK 45

¹ Joseph mbŭh dŭh tan nyijŭn asŭng-i di sirung jawin bara daya gaji-i, jadi ayŭh bada sopŭrŭg ngara ruah so birit anŭ. Mating daya bŭkŭn ngga Joseph kan ayŭh kidaan asi adŭp-i di bara jurud-i.

²Ayŭh sien bana ndŭg ka daya daya Egypt dingah, ka agah anŭ dog taban ka istana raja.

³Joseph nang di bara jurud-i, “Aku ati Joseph. Gibabŭ udip kah sama ku?” Pak kan bara jurud-i dingah sakanŭ, ngara mbŭh raru taru ndŭg ka mbŭh dŭh tungang nam ayŭh.

⁴Komŭnŭ Joseph nang di ngara, “Mandŭg kamati sindŭk aku.” Ngara nyindŭk ayŭh, ka-i nang di ngara, “Aku ati Joseph, jurud ngan adi angān ko jua ka Egypt.

⁵Pak dŭhnyah susah pasar adŭp ngan adi ko jua aku kamati. Adŭp Tapa inŭh adi ko pait aku da di diŭ so angān yŭn nyiramat asŭng daya bagŭ.

⁶Ati gi muran-i sawa adi duwŭh darŭm tipuh apag; re agi dŭm rimŭh sawa dinge daya re mating majak bait ngatŭm.

⁷Tapa mbŭh pait aku kamati diŭ so angān yŭn nyiramat angān ngga aran adi saruh mun ati isa angān ngga bara sesang ngan dapŭd udip.

⁸Jadi sibatur-i dŭh-i angān adi pait aku kamati, pak mbŭh adŭp Tapa. Ayŭh mbŭh bada aku jadi pinurung adi bās yŭn raja. Aku inŭh adi tukang nguasa rais-i; aku inŭh adi mritah ndi tarun tarun tana rais Egypt.

⁹“Madin rikas pari ka yŭn sama ku ka kidaan di ayŭh nang ati inŭh pinganang so anak-i Joseph; ‘Tapa mbŭh bada aku mritah ndi tarun tana Egypt; rikas mandŭg kamati ka yŭn ku.

¹⁰Angān bisa rŭŭ di tarun tana Goshen di yŭn ngan re dŭh jo so aku. Angān ngga bara anak ngan, sukuh ngan, biri ngan, kambing ngan, sapi ngan, ka sopŭrŭg kayuh adi angān biyŭn.

¹¹ Kambŭi angān rŭŭ di Goshen, aku bisa jaga angān. Apag ati dŭm rimŭh sawa; ka aku dŭh raan angān ngga rawang ngan ka dāng ngan sikirau.’ ”

¹²Joseph nang dinge, “Madin sopŭrŭg ngan samŭn kuu Benjamin, kiris aku ati inŭh sawŭ Joseph.

¹³Kidaan di sama ku munki masam bās kuasa ku digiti di Egypt ka kidaan di ayŭh pasar kayuh adi angān mbŭh kiris. Komŭnŭ rikas taban ayŭh ngga kamati.”

¹⁴Joseph dakŭp sude-i Benjamin ka rasu sien; Benjamin gŭh sien buang-i dakŭp ayŭh.

¹⁵Komŭnŭ, buang babŭ sien, ayŭh dakŭp barang naan jurud-i ka sium ngara. Ko anŭ, bara jurud-i piguru minyu kirakar ngga ayŭh.

¹⁶Kan agah mbŭh ndŭg istana nang bara jurud Joseph agi mandŭg, asŭng raja ngga bara pinurung-i mbŭh raru munos.

¹⁷Raja nang di Joseph, “Kidaan di bara jurud mu da taban gandom di tunduh kaldi ngara ngga pari ka Canaan.

¹⁸Bada ngara di tambit sama ngara samŭn rawang ngara ngga pari kamati. Aku re nggen di ngara tana adi siabo kana di Egypt, ka ngara re biyŭn rabis so sadang buwa pimuruh so tana anŭ.

¹⁹Kidaan gŭh di ngara da taban so ti krita krita-sapi isa agi dog pakai sawŭn sawŭn ngara, bara anak-sŭ ngara ka sama ngara ngga kamati.

²⁰Ngara dŭhsah gapang pasar tingge barang barang ngara; tana adi siabo kana di Egypt re ngara dapu.”

²¹Bara anak Jacob ndai nanyam adi ko dog kidaan. Joseph nggen krita krita-sapi adi ngga muat barang nunda ka pinyibada raja samŭn inged ngara di aran.

²²Ayŭh nggen gŭh di barang naan piraka kibarui ngara, pak tung Benjamin ayŭh nggen taruh ratus kiping pirak, ka rimŭh pasang piraka kibarui.

²³Ayŭh pait ka sama-i simŭng kaldi kabis barang masam kayuh adi siabo kana di Egypt, ka simŭng kaldi kabis gandom, ruti ka pinguman adi bŭkŭn ndu inged di aran.

²⁴Ayŭh di tingga bara jurud-i panu, buang nang di ngara. “Dŭhnyah bikaii di aran.”

²⁵Ngara bu so Egypt pari ka sama ngara Jacob di Canaan.

²⁶“Joseph babŭ udip!” ngara kidaan di ayŭh, “Ayŭh mritah di ndi tarun tana Egypt!” Jacob gŭgŭh buang dŭh sabah ngara.

²⁷Pak kan ngara kidaan di ayŭh sopŭrŭg kayuh adi Joseph ko nang di ngara, ka kiris krita krita-sapi adi Joseph pait ngga taban ayŭh ka Egypt, ka yang-i nak pari mua gŭh.

²⁸“Anak ku Joseph gibabŭ udip!” ayŭh nang. “Anŭ inŭh kayuh adi aku ruai raan! Aku dŭh siŭn dŭh di tingga ayŭh sibayuh aku kabŭs.”