Read Biatah Bidayuh TIBIRIK 46 Bible Online

TIBIRIK 46 - Biatah Bidayuh bible

TIBIRIK 46

¹Jacob misŭn sopŭrŭg buat rata-i adi agi ka di ka Beersheba, di yŭn-i jugan sadis ka Tapa sama-i Isaac.

²Tapa minyu ngga ayŭh singarŭm keya ka darŭm pŭmŭh ka bagan, “Jacob Jacob!” “Ta aku digiti,” ayŭh nam.

³“Aku ati Tapa, Tapa sama mu”, Ayŭh nang. “Dŭhnyah taru di ka Egypt; Aku re bada sesang mu jadi bangsa adi bās diginŭ.

⁴Aku re sua ngga kuu di ka Egypt, ka Aku re taban bara sesang mu pari ka tarun tana ati dinge. Joseph re agi ngga kuu di andu mu kabŭs.”

⁵Jacob matak so Beersheba. Bara anak dari-i na ayŭh ngga bara anak ngara adi gi-sŭ, ngga bara sawŭn ngara di darŭm krita krita-sapi adi raja Egypt ko pait.

⁶ Ngara taban dāng kudip ngara samŭn buat-rata adi ngara dapŭd di Canaan ka matak ka Egypt. Jacob taban sopŭrŭg sesang-i:

⁷bara anak dari-i, bara sukuh dari-i, bara anak dayung-i, bara sukuh dayung-i.

⁸Sopŭrŭg daya adi darŭm rawang Jacob adi sua di ka Egypt inŭh anak pinuai-i Reuben

⁹ngga bara anak dari-i: Hanoch, Pallu, Hezron, ka Carmi.

¹⁰Simeon, ngga bara anak dari-i: Jemuel, Jamin, Ohad, Jachin, Zohar, ka Shaul adi anak dari-i ngga dayung daya Canaan.

¹¹Levi ngga bara anak dari-i: Gershon, Kohath, ngga Merari.

¹²Judah ngga bara anak dari-i: Shelah, Perez, ngga Zerah. (Anak Judah adi bŭkŭn, Er ngga Onan mbŭh kabŭs di rais Canaan.) Anak anak dari Perez inŭh Hezron ngga Hamul.

¹³Issachar ngga bara anak dari-i: Tola, Puah, Jashub, ngga Shimron.

¹⁴Zebulum ngga bara anak dari-i: Sered, Elon, ngga Jahleel.

¹⁵Ngara inŭh bara anak dari adi dog biranak Leah yŭn Jacob di Mesopotamia, samŭn anak dayung-i Dinah. Prungun-i sesang Jacob ngga Leah agi 33 naan.

¹⁶Gad ngga bara anak dari-i: Zephon, Haggi, Shuni, Ezbon, Eri, Arod ngga Areli.

¹⁷Asher ngga bara anak dari-i: Imnah, Ishvah, Ishvi, Beriah, ngga jurud dayung ngara Serah. Anak dari Beriah inŭh Heber ngga Malchiel.

¹⁸Ngara adi 16 naan anŭ inŭh sesang Jacob ngga Zilpah adi urun dayung adi Laban nggen di anak-i Leah.

¹⁹Sawŭn Jacob, adi dŭn Rachel agi biranak 2 madis anak dari yŭn-i: Joseph ngga Benjamin.

²⁰ Di Egypt, Joseph biyŭn 2 madis anak dari: Manasseh ngga Ephraim, adi dog biranak sawŭn-i Asenath, adi anak dayung Potiphera adi jadi imam di Heliopolis.

²¹Bara anak dari Benjamin inŭh: Bela, Becher, Ashbel, Gera, Naaman, Ehi, Rosh, Muppim, Huppim, ngga Ard.

²²Ngara adi 14 naan anŭ inŭh sesang Jacob so sawŭn-i Rachel.

²³Dan ngga anak dari-i Hushim.

²⁴Naphtali ngga bara anak dari-i: Jahzeel, Guni, Jezer, ngga Shillem.

²⁵Ngara adi 7 naan anŭ inŭh sesang Jacob ngga Bilhah, dayung urun anŭ adi dog nggen Laban di anak-i Rachel.

²⁶Prungun tigŭrŭ sesang Jacob adi di ka rais Egypt agi 66 naan, dŭh ngitong samŭn iban iban dayung-i.

²⁷ Duwŭh madis anak dari dog biranak yŭn Joseph di Egypt; sabab anŭ meh, sopŭrŭg sesang Jacob adi sua di ka Egypt agi 70 naan.

²⁸Jacob pait Judah da diŭ panu ka kidaan di Joseph da bidapŭd ngga bara adŭp-i di tarun tana Goshen. Kan ngara mbŭh ndŭg,

²⁹Joseph mŭrŭt krita kuda-i ka di ka Goshen di bidapŭd ngga sama-i. Kan ngara mbŭh bidapŭd, Joseph dakŭp sama-i ka sien mua tian-i.

³⁰Jacob nang di Joseph, “Mbŭh sadang ngga aku kabŭs madin amai aku mbŭh kiris kuu ka puan nang kuu gibabŭ udip.”

³¹Jadi Joseph nang di bara jurud dari-i ngga di bara adi bŭkŭn adi mandŭg so rawang sama-i, “Aku dŭh siŭn dŭh di kidaan di raja nang bara jurud ku ngga sopŭrŭg rawang pinanak sama ku adi muko rŭŭ di Canaan mbŭh mandŭg ka yŭn ku.

³²Aku re kidaan di ayŭh nang angān pingingat-biri ngga sapi ka mbŭh taban kaban dāng ngan ka sopŭrŭg kayuh adi bŭkŭn adi angān dapu.

³³Kambŭi raja bagan angān ka siken ani kraja adi ngga angān kudip adŭp ngan,

³⁴angān dŭh siŭn dŭh kidaan nang so angān gi-sŭ angān jadi pingingat dāng nimun tayung-babuk ngan. Amai kambŭi angān sakanŭ ayŭh re bada angān rŭŭ di tarun tana Goshen.” Joseph minyu sakanŭ amai-i puan nang daya Egypt dŭh raan udip bigaur ngga daya adi jadi pingingat-biri.