Read Biatah Bidayuh TIBIRIK 9 Bible Online

TIBIRIK 9 - Biatah Bidayuh bible

TIBIRIK 9

¹ Tapa nyiberkat Noah ngga bara anak dari-i, “Biranak bagŭ meh, isa bara sesang ngan udip di ndi ong ong.

²Sopŭrŭg dāng, manuk, ka iken re udip darŭm taru di angān. Ngara mbŭh di ribo kuasa ngan.

³Ngara siŭn jadi pinguman ngan, samŭn anak anak kayuh barŭm adi timbu; Aku nggen sopŭrŭg-i di angān ndu pinguman.

⁴ Ndi kayuh adi angān dŭh siŭn man, anŭ inŭh dagin adi babŭ bideya. Aku kijaman angān man-i sabab asŭng agi darŭm deya.

⁵Kambŭi agi daya tambit asŭng manusia, ayŭh dŭh siŭn dŭh dog ukum. Aku gŭh re nggen ukum kabŭs di tadŭ tadŭ dāng adi tambit asŭng manusia.

⁶ Manusia dog napa nunda gayŭn Tapa, ngapŭi asi asi adi siŭ tadŭ tadŭ so ngara re dog siŭ daya bŭkŭn.

⁷ “Angān dŭh siŭn dŭh biyŭn bagŭ anak, isa bara sesang ngan udip di ndi ong ong.”

⁸Tapa nang di Noah ka di bara anak dari-i,

⁹“Aku madin ndai simanya Ku ngga angān ka ngga bara sesang ngan,

¹⁰ka ngga sopŭrŭg kayuh adi udip, sopŭrŭg manuk ngga dāng; barang pŭrŭng adi ruah ngga kuu so batra.

¹¹Ngga pinganang sakati Aku ndai simanya Ku ngga angān: Aku bijanji re dŭh tia bada sopŭrŭg kayuh adi udip dog pirusak ngga uba; uba re dŭh tia pirusak ong.

¹²Ndu tandā simanya anŭ, adi tan adu adu, adi ndai Ku ngga angān ka ngga sopŭrŭg kayuh adi udip,

¹³Aku na bawŭh panah Ku di abun. Anŭ re jadi tandā simanya Ku ngga ong.

¹⁴Niap kari Aku nutu rangit ngga abun, ujen bukang agi tatŭng,

¹⁵Aku re ingat janji Ku ngga angān ka ngga sopŭrŭg dāng amai uba dŭh re tia pirusak sopŭrŭg kayuh adi udip.

¹⁶Kan ujen bukang tatŭng di abun, Aku re kiris-i ka ingat simanya Ku adi tan adu adu adi Aku ko ndai ngga sopŭrŭg kayuh adi udip di tunduh tana.

¹⁷Anŭ inŭh tandā janji adi Aku ndai ngga sopŭrŭg kayuh adi udip.”

¹⁸Bara anak dari Noah adi samah ruah ngga ayŭh so batra inŭh Shem, Ham, ka Japheth. (Ham inŭh sama Canaan.)

¹⁹So-taruh madis anak Noah anŭ mbŭh jadi tayung-babuk sopŭrŭg daya di ong.

²⁰Noah, daya adi biteya birŭmŭh, inŭh sibungas manusia adi ndai teya anggor.

²¹Ripas-i ko nok kada wain anŭ, ayŭh mabuk, kubo pirudos piraka-i, ka guring sitagor darŭm bari.

²²Kan Ham, adi sama Canaan, kiris sama-i sitagor, ayŭh ruah ka sapa ka kidaan di jurud-i adi duwŭh madis.

²³Komŭnŭ Shem ngga Japheth tambit ndi jipo-ambu ka murai-i di kawin ngara. Ngara panu sikanang mŭrŭt ka darŭm bari sama ngara ka nabun ayŭh, buang bada jawin ngara nura tarun bŭkŭn siŭn ngara dŭh kiris ayŭh sitagor.

²⁴Kan Noah mbŭh rada adŭp-i ka puan kayuh adi anak sibusu-i mbŭh ndai di adŭp-i,

²⁵ayŭh nang, “Pangu nyatŭk Canaan! Ayŭh re jadi urun bara kaka-i.

²⁶Nggen puji di TUHAN, adi Tapa Shem! Canaan re jadi urun Shem.

²⁷Isa-i Tapa nyiberkat Japheth[23] ngga tarun tana adi bayah yŭn-i rŭŭ. Isa-i sesang Japheth rŭŭ samah ngga sesang Shem! Canaan re jadi urun Japheth.”

²⁸Ripas uba bās anŭ Noah udip 350 sawa dinge

²⁹ka kabŭs kan umbur-i mbŭh 950 sawa.