Read Biatah Bidayuh 2 SAMUEL 11 Bible Online

2 SAMUEL 11 - Biatah Bidayuh bible

2 SAMUEL 11

¹ Di tipuh bunga, tipuh adi ngga raja raja matak biperang, David pait Joab ngga bara pingubak soldadu-i ngga bara tibaran soldadu daya Israel; ngara ngarah bara daya Ammon ka nyikapung kupo Rabbah. Adŭp David rŭŭ di Jerusalem.

²Ndi andu, sindŭk singumi andu, David makat ko mŭnyŭp ka panu di tibung istana. Darŭm ayŭh panu diginŭ, ayŭh kiris ndi naan dayung mamuh. Dayung anŭ raru ramus.

³Jadi ayŭh pait ndi naan daya bada di siken asi dayung anŭ, ka rasu dog kidaan nang anŭ Bathsheba, anak Eliam ka sawŭn Uriah adi daya Hitti.

⁴David pait kudu kudu naan daya bada di tambit ayŭh. Ngara taban dayung anŭ ka yŭn David ka-i nyibŭŭs ngga ayŭh. (Bathsheba bauh ko ndai adat pibisig di adŭp-i, ripas kais-i.) Komŭnŭ ayŭh pari ka ramin adŭp-i.

⁵Ripas anŭ ayŭh kinyam adŭp-i bite ka pait pinganang ka David, bada ayŭh puan.

⁶Komŭnŭ David pait pinganang ka Joab: “Bada Uriah daya Hitti anŭ mandŭg ka yŭn ku.” Jadi Joab pait Uriah ka yŭn David.

⁷Kan Uriah mandŭg, David siken agah Joab ngga bara soldadu, ka munki biperang anŭ madin.

⁸Komŭnŭ ayŭh nang di Uriah, “Panu maad ka rŭŭ dawŭ-i.” Uriah ruah, ka David pait pinganggen ka ramin-i.

⁹Pak Uriah dŭh maad; ayŭh bŭŭs di tiban Istana ngga bara pingibān raja.

¹⁰Kan David dingah Uriah dŭh maad ka ramin-i, ayŭh siken, “Kuu mbŭh tui dŭh mari; mani kuu dŭh maad ka arŭn mu?”

¹¹Uriah nam, “Bara soldadu daya Israel ngga Judah jeh di yŭn biperang, ka Pati Simanya agi ngga ngara; pingibās ku Joab ngga bara bara pingubak soldadu aŭn bibari di sapa tarun. Simuki aku re maad ka ramin ku, di man, nok, ka bŭŭs ngga sawŭn ku? Ngga adŭn mai aku dŭh re ndai simŭnŭ!”

¹²Jadi David nang, “Rŭŭ digiti garang ndŭg andu mbŭh ripuan, ka sipagi kuu bisa pari.” Jadi Uriah rŭŭ di Jerusalem andu anŭ ngga andu anŭ ndi.

¹³David bada ayŭh sua man singumi andu ka bada ayŭh mabuk. Pak babŭ gŭh Uriah dŭh maad ka ramin adŭp-i ngarŭm anŭ; ayŭh bŭŭs di tunduh putong-i[24] di darŭm birit bara pingibān Istana.

¹⁴Isan isan andu jawa ndi David nuris surat ka Joab ka bada Uriah tukang taban-i.

¹⁵Ayŭh nuris: “Di yŭn bisaad, na Uriah di tura ka jawin, komŭnŭ ngundur ka tandah ayŭh dog siŭ.”

¹⁶Jadi darŭm Joab aŭn nyikapung kupo pinganyu, ayŭh bada Uriah di ka tarun yŭn adi-i puan nang yŭn pinganyu raru bake.

¹⁷Bara soldadu pinganyu ruah so kupo ka bisaad ngga bara soldadu Joab; agi kada so bara pingubak soldadu David dog siŭ, simŭnŭ gŭh adŭp Uriah.

¹⁸Komŭnŭ Joab pait pinganang ka David kidaan di ayŭh pasar perang anŭ.

¹⁹Ayŭh pitayan pinyisung-i, “Ripas kuu muko kidaan di raja sopŭrŭg kayuh pasar perang anŭ,

²⁰kadŭ ayŭh re baji ka siken kuu, ‘Mani angān nyindŭk kupo anŭ darŭm angān rawan ngara? Dŭh kah angān puan nang ngara bisa nimbak angān ngga reja-panah so sindung kupo?

²¹ Dŭh kah angān ingat munki Abimelech anak Gideon dog siŭ? So sindung kupo di Thebez, ndi naan dayung siŭ ayŭh ngga batuh kisar adi-i buān bada nyatŭk ayŭh. Mani meh angān di nyindŭk sindung kupo?’ Kambŭi raja siken kuu sakanŭ, kidaan di ayŭh, ‘Pingubak soldadu mai, Uriah, mbŭh dog siŭ gŭh.’ ”

²²Jadi pinyisung anŭ matak di ka yŭn David ka kidaan di ayŭh kayuh adi Joab bada ayŭh kidaan.

²³Ayŭh nang, “Bara pinganyu raru bake so kieh ka ruah so kupo di rawan kieh di sapa tarun, pak kieh bada ngara ngundur pari ndŭg tiban-bās kupo.

²⁴Komŭnŭ ngara nimbak kieh ngga reja reja-panah so sindung kupo, ka kada so pingubak soldadu mai Tuan Raja mbŭh dog siŭ; Uriah adi pingubak soldadu mai mbŭh dog siŭ gŭh.”

²⁵David nang di pinyisung anŭ, “Ngatat Joab ka kidaan di ayŭh bada dŭhnyah susah, amai mŭnŭ dŭh gŭh nŭŭh bisa kidaan asi re kabŭs darŭm biperang. Kidaan di ayŭh bada bandar nyerang kupo anŭ ka sirabut-i.”

²⁶Kan Bathsheba dingah banŭh-i mbŭh dog siŭ, ayŭh ngurid banŭh-i.

²⁷Kan tipuh ngurid mbŭh ripuan, David bada ayŭh dog taban ka istana; ayŭh jadi sawŭn-i ka biranak ndi anak dari yŭn-i. Pak TUHAN dŭh munos asŭng-i di kayuh adi David mbŭh ndai.