Read Biatah Bidayuh 2 SAMUEL 19 Bible Online

2 SAMUEL 19 - Biatah Bidayuh bible

2 SAMUEL 19

¹Joab dog kidaan nang Raja David muās buang ngurid Absalom.

²Sabab anŭ meh pinyigaŭn pimanang ngara rawan pinganyu mbŭh marui jadi susah yŭn sopŭrŭg tibaran soldadu David di andu anŭ, sabab ngara dingah raja ngurid anak-i.

³Ngara pari ka kupo ngara pajam mun bara soldadu adi mangŭh amai bu mangān perang.

⁴Raja nutu jawin-i ka sien bana, “O anak ku! Anak ku Absalom! Absalom, anak ku!”

⁵Joab di ka ramin raja ka nang di ayŭh, “Andu ati kaam mbŭh pimangŭh bara daya mai, bara daya adi ko nyiramat asŭng mai ka asŭng bara anak dari mai ngga anak dayung mai samŭn bara sawŭn mai ka bara dayung nyikŭn mai.

⁶Kaam rawan daya adi rindu di kaam, pak batu daya adi tiru di kaam! Mbŭh giranan kaam dŭh biguna di bara pingubak soldadu mai ngga bara soldadu mai. Kiris ku kaam sanang dŭ kambŭi Absalom udip ka sopŭrŭg kieh kabŭs.

⁷Panu madin di nyaduh bara daya mai. Aku bipayu ngga adŭn TUHAN kambŭi kaam dŭh ndai simŭnŭ, ndi naan mating gŭh ngara re agi ngga kaam sipagi. Anŭ pinyusah adi re rabis arap so anŭ adi kaam muko kinyam darŭm sitŭkŭd udip mai.”

⁸Muko anŭ raja makat, ka di guru sindŭk tiban-bās kupo. Bara daya-i dingah ayŭh agi diginŭ, ka sopŭrŭg ngara mandŭg tikuruk maning ayŭh. Sitadŭn anŭ sopŭrŭg daya Israel mbŭh bu ka kupo adŭp ngara.

⁹Sopŭrŭg daya Israel darŭm ndi rais rais bikaii dupan adŭp ngara. “Raja David mbŭh nyiramat ata so bara pinganyu ta,” ngara nang di dingan adŭp ngara. “Ayŭh nyiramat ata so daya Philistia, pak madin ayŭh mbŭh bu mangān Absalom ka mbŭh mating di rais.

¹⁰Ata mbŭh nginyo Absalom jadi raja ta, pak ayŭh mbŭh dog siŭ darŭm perang. Jadi mani meh daya dŭh suba taban Raja David pari?”

¹¹Agah pasar kayuh adi daya Israel nang mbŭh ndŭg Raja David.[51] Jadi ayŭh pait imam Zadok ngga imam Abiathar bada siken bara pinguru di Judah, “Mani angān raan jadi sikasŭn daya adi turung taban raja pari ka istana-i?

¹²Angān bara madis ku, isin kurit adŭp ku; mani angān raan jadi sikasŭn daya adi taban aku pari?”

¹³David agi gŭh kidaan di ngara bada nang di Amasa, “Kuu madis ku. So madin kuu daya adi aku tijuan bada jadi pingubak bara soldadu gati Joab. Isa-i Tapa siŭ aku kambŭi aku dŭh!”

¹⁴Pinganang David mbŭh tarik atin sopŭrŭg daya di Judah, ka ngara pait pinganang ka ayŭh bada ayŭh pari ngga sopŭrŭg pinurung-i.

¹⁵Di aran darŭm ayŭh pari, raja bidapŭd ngga bara daya Judah di Yang Jordan, adi mbŭh mandŭg ka Gilgal re nguru ayŭh mutas yang anŭ.

¹⁶ Di tika anŭ gŭh Shimei adi daya Benjamin anak Gera so Bahurim bigaut di ka Jordan di bidapŭd ngga Raja David.

¹⁷Ayŭh taban siribu daya so tibaran-asar Benjamin. Ka Ziba, daya-gaji rawang Saul, mandŭg gŭh ngga jangi simŭng rimŭh naan anak dari samŭn duwŭh puru naan daya-gaji; ngara ndŭg Jordan diŭ so raja.

¹⁸Ngara mutas[52] yang anŭ re nguru tibaran raja mutas ka ndai tadŭ kayuh adi raja raan. Darŭm raja aŭn sidia re mutas, Shimei taran adŭp-i di sirung jawin-i

¹⁹ka nang, “Tuan Raja, turung kambŭt sarah ku adi aku ndai di andu kaam bu so Jerusalem. Dŭhnyah ingat sarah ku anŭ, bait bipikir pasar-i dinge.

²⁰Aku puan, tuan, aku mbŭh bidosa, ka anŭ inŭh sabab aku adi siabo diŭ so tibaran-asar adi tura ka utara adi bidapŭd ngga kaam andu ati Tuan Raja.”

²¹Abishai anak Zeruiah minyu, nang-i: “Shimei patut dog ukum kabŭs sabab ayŭh mangu daya adi TUHAN mbŭh mien bada jadi raja.”

²²Pak David nang di Abishai ngga di jurud-i Joab, “Dŭhsah sua nang ani ani. Angān re ndai pinyusah di aku kah? Aku inŭh raja Israel madin, ka mating daya Israel re dog ukum kabŭs andu ati.”

²³Ka-i nang di Shimei, “Aku bijanji kuu dŭh re dog ukum kabŭs.”

²⁴ Komŭnŭ Mephibosheth, sukuh Saul, mandŭg di bidapŭd ngga raja. Ayŭh dŭh ngu kaja-i, gumbak gagap-i bait ngu piraka-i so andu raja bu so Jerusalem ndŭg andu ayŭh pari ngga siramat.

²⁵Kan Mephibosheth mandŭg so[53] Jerusalem di bidapŭd ngga raja, raja nang di ayŭh, “Mephibosheth, kuu mating sua ngga aku. Mani?”

²⁶Ayŭh nam, “Kaam puan aku bajang, Tuan Raja. Aku kidaan di daya-gaji ku bada na tapas-pinyiguru di tunduh kaldi ku siŭn aku bisa sua matak ngga kaam, pak ayŭh tingge aku.

²⁷Ayŭh napŭ aku di sirung jawin Tuan Raja, pak kaam mbŭh keya ka malaikat Tapa. Ngapŭi ndai adŭ nanyam adi kaam kira patut dog ndai di tunduh aku.

²⁸Sopŭrŭg rawang sama ku taŭn patut dog ukum kabŭs di tangan Tuan Raja, pak kaam mbŭh nyibandar aku man di mija mai. Aku dŭh re tia birani mite tadŭ tadŭ kayuh so Tuan Raja.”

²⁹Raja nam, “Kuu dŭhsah tia nang ani ani dinge. Aku mbŭh ndai pikir ku, kuu ngga Ziba re samah dapu buat-rata Saul.”

³⁰“Bada Ziba dapu sopŭrŭg-i,” Mephibosheth nam. “Sanang inŭh atin ku Tuan Raja mbŭh mari ngga siramat.”

³¹ Barzillai, so Gilead, agi gŭh mandŭg so Rogelim re nguru raja mutas yang Jordan.

³²Barzillai mbŭh minyamba, mai puru sawa umbur-i. Ayŭh raru kaya ka mbŭh tukang nggen pinguman di David di andu ayŭh di Mahanaim.

³³Raja nang di ayŭh, “Sua ngga aku di ka Jerusalem; aku re kingat kuu diginŭ.”

³⁴Pak Barzillai nam, “Aku dŭh re tui udip; dŭhsah aku tunda Tuan Raja di ka Jerusalem?

³⁵Aku mbŭh mai puru sawa umbur ku, ka pŭrŭng ku mbŭh madŭd. Aku dŭh tungang kija kayuh man ngga kayuh nok tia, ka dŭh gŭh aku tungang dingah sirŭŭn bara pinyanyi. Ndong ka aku nyusah Tuan Raja adŭ te.

³⁶Aku dŭh patut re trima upah bās adi mun anŭ. Kiang aku sua nguru kaam ndŭg parad mandi yang Jordan adŭ.

³⁷Komŭnŭ bada aku pari ka ramin adŭp ku ka kabŭs sindŭk kubur pimas adŭp ku. Ta ati anak dari ku Chimham, ayŭh bisa bituan di kaam. Tuan Raja bisa taban ayŭh, ka ndai yŭn-i ani adi kaam pikir patut.”

³⁸Raja nam, “Aku re taban ayŭh ka ndai yŭn-i ani adi patut nanyam pinyiraan mu. Ka aku re ndai yŭn mu tadŭ tadŭ kayuh adi mite mu.”

³⁹Komŭnŭ David ngga sopŭrŭg daya-i mutas yang Jordan. Ayŭh sium Barzillai ka nyiberkat ayŭh, ka Barzillai mari ka ramin adŭp-i.

⁴⁰Kan raja mbŭh mutas, dog nguru sopŭrŭg daya Judah ngga sitangah daya Israel, ayŭh radus di ka Gilgal, ka Chimham sua ngga ayŭh.

⁴¹Komŭnŭ sopŭrŭg daya Israel di ka yŭn raja ka nang, “Tuan Raja, mani bara jurud ami, daya Judah, pikir adŭp ngara biyŭn hak taban kaam ngga bu ka nguru kaam, rawang mai, ka bara daya mai mutas yang Jordan?”

⁴²Bara daya Judah nam, “Kieh ndai simŭnŭ amai raja inŭh ndi so bara ami. Jadi mani kayuh ati bisa bada angān tuas? Ayŭh mating bayar pinguman so kieh, mating gŭh ayŭh nggen di kieh tadŭ tadŭ kayuh.”

⁴³Daya Israel nam, “Kieh biyŭn simŭng rupet hak rabis dŭ so tung jangān di Raja David, sunggu ayŭh ndi so angān bait kani. Mani angān kinabah kieh? Dŭhnyah kambŭt kieh adi diŭ minyu pasar an taban raja pari!” Pak daya Judah mbŭh rabis gaok so daya Israel darŭm ngara minyu pasar hak ngara.