Read Biatah Bidayuh 2 SAMUEL 21 Bible Online

2 SAMUEL 21 - Biatah Bidayuh bible

2 SAMUEL 21

¹Di jaman pinyipritah David agi apag adi bisā sitŭkŭd taruh sawa. Jadi David siken TUHAN pasar anŭ, ka TUHAN nang, “Saul ngga rawang-i mbŭh sarah amai ko siŭ daya; ayŭh nggen ukum kabŭs di daya Gibeon.”

² (Daya Gibeon dŭh daya Israel; ngara anŭ inŭh tibaran daya Amor adi sŭ adi daya Israel muko bijanji an ngibān, pak Saul ko suba an pirarap ngara amai ruai an pimaju Israel ngga Judah.)

³Jadi David bagan daya Gibeon ka nang di ngara, “Ani patut aku ndai di angān? Aku raan ndai kayuh adi ngga aku ngarun sarah ku di tunduh ngan, isa angān nyiberkat daya TUHAN.”

⁴Ngara nam, “Kaii ami ngga rawang Saul dŭh bisa dog nyirase ngga mas pirak, pak kieh dŭh gŭh raan siŭ tadŭ tadŭ daya Israel.” “Ani meh garang raan ngan aku ndai yŭn ngan?” David siken.

⁵Ngara nam, “Saul ko raan pirarap kieh isa kieh mating di tadŭ tadŭ yŭn di Israel.

⁶Ngapŭi nyerah di kieh ju naan sesang-i adi dari, isa kieh tangid ngara di sirung jawin TUHAN di Gibeah, kupo adŭp Saul, raja adi adŭp TUHAN ko mien.” “Aku re nyerah ngara ka angān,” raja nam.

⁷ Amai sabab payu adi ayŭh ngga Jonathan ko ndai ayŭh dŭh bada Mephibosheth anak Jonathan dog siŭ, adi sukuh Saul.

⁸ Pak, ayŭh nyerah Armoni ngga Mephibosheth, duwŭh madis sukuh Aiah adi Rizpah biranak yŭn Saul; Ayŭh nyerah gŭh rimŭh madis sukuh Saul so anak dayung-i Merab, adi-i biranak yŭn Adriel anak Barzillai so Meholah.

⁹David nyerah ngara ka daya Gibeon. Daya Gibeon tangid ngara di darŭd di sirung jawin TUHAN -- ju naan ngara samah kabŭs. Kan re ripuan tipuh bunga sindŭk tipuh ngatŭm jeri, ngara dog ukum kabŭs.

¹⁰Komŭnŭ Rizpah dayung nyikŭn Saul anak Aiah, pakai banang guni ngga ndai sidangak yŭn adŭp-i di tunduh batuh di yŭn tadang ngara, ka-i rŭŭ diginŭ so piguru ngatŭm ndŭg ka ujen tipuh jaya mandŭg. Ngga sandu ayŭh kasig manuk manuk so tadang ngara, ka singarŭm ayŭh ngibān tadang so dāng dāng tarun.

¹¹Kan David dingah kayuh adi Rizpah ndai,

¹² ayŭh di ka tambit turang turang Saul ngga Jonathan so daya Jabesh di Gilead. (Ngara ko naku-i so pakan kupo Beth Shan, di yŭn bara daya Philistia ko tangid tadang ngara di andu ngara siŭ Saul di Darŭd Gilboa.)

¹³David tambit turang turang Saul ngga Jonathan buang nguruk turang turang ngara adi ju naan adi ko dog tangid.

¹⁴Komŭnŭ ngara kubur turang turang Saul ngga Jonathan di kubur Kish adi sama Saul, di Zela di tarun tana Benjamin, nanyam ka pesan raja. Ka ripas anŭ, Tapa nam dua ngara yŭn rais anŭ.

¹⁵Daya Philistine ngga daya Israel biperang dinge, ka David ngga bara daya-i matak di rawan ngara. Agi ndi sidah di tika bisaad David jadi raru kawŭk.

¹⁶Ndi naan grigasi dŭn Ishbibenob, adi taban jarok timaga kira ka 3.5 kilogram bat-i buang nakin pedang bauh, pikir adŭp-i re tungang siŭ David.

¹⁷ Pak Abishai anak Zeruiah mandŭg di turung David, nyerang grigasi anŭ, ka siŭ ayŭh. Komŭnŭ bara daya David bada David bijanji dŭh tia sua tunda ngara biperang. “Kaam inŭh pingarap Israel; kieh dŭh raan kaam dog siŭ,” ngara nang di ayŭh.

¹⁸Ripas anŭ agi biperang ngga daya Philistine di Gob; nganŭ Sibbecai so Hushah siŭ ndi naan grigasi dŭn Saph.

¹⁹Agi dinge biperang ngga daya Philistine di Gob, ka Elhanan anak Jair[55] so Bethlehem siŭ Goliath so Gath. Tan jarok Goliath anŭ mati parang sinangan tanun.

²⁰Ripas anŭ agi dinge biperang di Gath, di yŭn ndi naan grigasi adi raru gagā birawan. Ayŭh anŭ biyŭn nŭm trinju di soduwŭh tangan-i ka nŭm trinju kaja di soduwŭh kaja-i.

²¹Ayŭh pimangŭh bara daya Israel, ka Jonathan, adi anak Shammah jurud David, siŭ ayŭh.

²²So-pat ngara anŭ sesang bara grigasi so Gath, adi dog siŭ David ngga bara daya-i.