Read Biatah Bidayuh 2 SAMUEL 22 Bible Online

2 SAMUEL 22 - Biatah Bidayuh bible

2 SAMUEL 22

¹Ripas TUHAN nyiramat David so bara pinganyu-i, David nang ragu ati ka TUHAN:

²TUHAN inŭh adi grindung aku; ayŭh inŭh kuta ku adi tagap.

³Tapa ku inŭh pinyigrindung ku, aku siramat ngga Ayŭh. Ayŭh grindung aku keya ka pinangin; Ayŭh tak aku ka bada aku siramat. Ayŭh inŭh pinyikudip ku, Ayŭh grindung aku ka nyiramat aku so daya adi ganas.

⁴Aku bagan TUHAN, ka Ayŭh nyiramat aku so bara pinganyu ku. Muji meh TUHAN!

⁵Girumbang pinyikabŭs mbŭh kirurung aku; Girumbang pinyirusag mbŭh nyarab aku.

⁶Pinyusah pinyikabŭs mbŭh kirurung aku, ka kubur mbŭh tŭŭn jarat-i yŭn kudog aku.

⁷Darŭm pinyusah ku aku bagan TUHAN; Aku bagan Tapa ku yŭn mite turung. Darŭm Ramin-I Ayŭh dingah sirŭŭn ku; Ayŭh nyiringa aku bagan mite turung.

⁸Komŭnŭ tana kimŭtŭr ka bigŭgŭs; Pimŭnŭs rangit bigagar ka biguyut amai Tapa mbŭh baji!

⁹Asuh bijambung ruah so undung-I, jireb apui ngga bam apui ruah so baba-I.

¹⁰Ayŭh kuka rangit ka mūn, ngga kruman adi singŭt di ribo kaja-I.

¹¹Ayŭh mikabur raju di tunduh dāng-I adi piurad; Ayŭh nyisayar di tunduh urad sabak.

¹²Ayŭh marut adŭp-I ngga karŭm; Abun tabar adi puno ngga[56] piin, kirurung Ayŭh;

¹³bam apui bijireb so kijat adi di sirung jawin-I.

¹⁴Muko mŭnŭ TUHAN bidungam so rangit ka sirŭŭn Tapa Bisa-pŭrŭg mbŭh dog dingah.

¹⁵Ayŭh nimbak reja panah-I ka mesak pinganyu-I; ngga kirab kijat Ayŭh bada ngara babak bu.

¹⁶Rasan rawŭt mbŭh badŭh, ka pimŭnŭs tana mbŭh tatŭng kan TUHAN nang pinganyu-I ka ngŭr ngara darŭm baji-I.

¹⁷TUHAN ton tangan-I so sambu ka digen aku; Ayŭh tarik aku so piin adi tŭrŭp.

¹⁸Ayŭh nyiramat aku so pinganyu ku adi bake ka so ngara adi tiru di aku; amai ngara mbŭh paŭh bake yŭn ku rawan.

¹⁹Di tika aku dog pinyusah, ngara nyerang aku, pak TUHAN grindung aku.

²⁰Ayŭh piruah aku so dog pinyusah; Ayŭh nyiramat aku amai asŭng-I munos di aku.

²¹TUHAN ngupah aku amai aku ndai kayuh adi batur; Ayŭh nyiberkat aku amai aku dŭh biyŭn sarah.

²²Aku mbŭh tunda ukum-adat TUHAN; aku gi-dŭh bu so Tapa ku.

²³Aku mbŭh sita sopŭrŭg ukum adat-I; aku bŭn nyibireu pinyipesan-I.

²⁴Ayŭh puan nang aku dŭh sarah, ka aku mbŭh pijo adŭp ku so ndai sarah.

²⁵Ngapŭi Ayŭh ngupah aku amai aku ndai anŭ adi batur, amai Ayŭh puan aku dŭh biyŭn sarah.

²⁶O TUHAN, Kaam tŭtŭd ngga sinadan daya adi tŭtŭd ngga Kaam, ka sukup kana ngga ngara[57] adi kana.

²⁷Kaam kiren adŭp Mai bisig di sinadan ngara adi bisig, pak gaok ngga ngara adi ginaka.

²⁸Kaam nyiramat ngara adi pirapat adŭp-i, pak Kaam pirapat ngara adi sambuh.

²⁹Kaam, TUHAN, inŭh jawa ku; Kaam ngarah karŭm ku.

³⁰Kaam nggen pinyibake di aku ngga nyerang pinganyu ku; ka kuasa ngga ngarah kuta ngara.

³¹Tapa ati -- munki raru kana kraja pingandai-I, pinganang-I dapŭd dog sabah! Ayŭh keya ka pinangin yŭn sopŭrŭg adi jiroh pinyigrindung-I.

³²TUHAN sadi adŭ adi Tapa; Tapa sadi adŭ adi pingibān ta.

³³Tapa ati inŭh kuta ku adi tagap; Ayŭh bada[58] aran ku siramat.

³⁴ Ayŭh bada kaja ku daras bikaduh keya ka peyu; Ayŭh bada aku siramat di tarun tana darŭd.

³⁵Ayŭh pirates aku yŭn biperang, isa aku bisa pakai bawŭh panah adi bagŭg.

³⁶O TUHAN, Kaam grindung ka nyiramat aku; pinurung Mai mbŭh bada aku jadi bās.

³⁷Kaam mbŭh kingat aku so dog takap, ka aku bŭn rabu.

³⁸Aku tadak pinganyu ku ka ngarah ngara; aku dŭh rŭŭ ndŭg ka aku mbŭh pirabur ngara.

³⁹Aku mukong ngara ndŭg ka ngara dŭh tungang makat; ngara tumbang arah di sirung jawin ku.

⁴⁰Kaam nggen di aku pinyibake yŭn biperang, ka pimanang ngarah pinganyu ku.

⁴¹Kaam bada pinganyu ku bikaduh mangān aku; Aku pirabur ngara adi tiru di aku

⁴²Ngara jiroh pinurung, pak mating daya nyiramat ngara; ngara bagan TUHAN, pak Ayŭh dŭh nam ngara.

⁴³Aku pirandŭk ngara, ka ngara jadi mun dabu; aku bidigang di tunduh ngara keya ka tawang di aran kupo.

⁴⁴Kaam nyiramat aku so daya ku adi gagā birawan; ka bada aku jadi pimritah bangsa bangsa; daya adi aku puan madin mbŭh jadi rayat ku.

⁴⁵Daya pinami nundok di aku; kan dingah aku, ngara tunda pinganang ku.

⁴⁶Pinyipagan ngara mbŭh miyap ka mandŭg buang kimŭtŭr ruah[59] so kuta kuta ngara.

⁴⁷TUHAN udip! Muji meh pingibān ku! piagah bās Tapa adi bake adi nyiramat aku!

⁴⁸Ayŭh nggen di aku pimanang ngarah pinganyu ku; Ayŭh na bangsa bangsa di ribo aku.

⁴⁹ka nyiramat aku so pinganyu ku. O TUHAN, Kaam nggen di aku pimanang ngarah pinganyu ku, ka grindung aku so daya adi ganas.

⁵⁰ Jadi aku muji Kaam di ruang bangsa bangsa; aku nang ragu puji ka Kaam.

⁵¹Tapa nggen pimanang adi bās di raja-I; Ayŭh kiren pinyirindu adi dŭh bisa birubah di sianŭ adi-I mbŭh mien, di David ngga di bara sesang-i ndŭg situi tui.