Read Biatah Bidayuh 2 SAMUEL 23 Bible Online

2 SAMUEL 23 - Biatah Bidayuh bible

2 SAMUEL 23

¹David anak Jesse inŭh daya adi Tapa mbŭh bada jadi bās, adi Tapa Jacob mbŭh mien bada jadi raja, ka adi mbŭh nimbur ragu ragu adi ramus yŭn Israel. Ati inŭh sikasŭn piminyu pinganang David.

²Roh TUHAN minyu so aku, pinganang-I di bibis ku.

³Tapa Israel mbŭh minyu, pinyigrindung Israel nang di aku: “Raja adi mritah ngga pinŭnggŭn, adi mritah darŭm nundok di Tapa,

⁴mbŭh keya ka batŭh andu nyekar di rangit kan abun mating dieh, keya ka sekar batŭh andu adi bada kupai mikirab ripas ujen.”

⁵Ngga simŭnŭ inŭh Tapa re nyiberkat bara sesang ku, sabab Ayŭh mbŭh ndai simanya adi tan adu adu ngga aku, pekat-janji adi dŭh bisa dog miranggar, janji adi dŭh bisa dog ngubah. Anŭ adŭ adi raan ku; anŭ adi re jadi pimanang ku, ka Tapa re bada-i jadi bitŭtŭk.

⁶Pak daya adi dŭh taru di Tapa mbŭh keya ka dudu reja adi dog taran; mating daya bisa tama-i ngga tangan.

⁷Kuu dŭh siŭn dŭh pakai pingakas basi puan kah jarok; ngara re abo dog badang.[60]

⁸Ati inŭh dŭn dŭn bara soldadu David adi timagah: adi diŭ inŭh Josheb anak Basshebeth so Tachemon, adi jadi pingubak “Ngara adi Taruh”;[61] Ayŭh birawan ngga jarok-i[62] rawan mai ratus naan daya ka siŭ sopŭrŭg ngara darŭm ndi sidah bisaad.

⁹Adi numbor duwŭh timagah so ngara anŭ adi taruh naan inŭh Eleazar anak Dodo, so manak Ahoh. Ndi andu ayŭh ngga David rawan daya Philistine adi mbŭh agi tikuruk re biperang. Bara daya Israel ngundur,

¹⁰pak ayŭh dŭh ngundur; ayŭh rawan daya Philistine ndŭg ka tangan-i mbŭh bagŭg ka dŭh tungang pirupas pedang adi ngagŭm-i. TUHAN dapŭd pimanang bās andu anŭ. Kan muko bisaad, daya Israel pari ka tarun yŭn Eleazar ka pirukos jipo perang so tadang tadang daya adi mbŭh kabŭs.

¹¹Adi numbor taruh timagah so ngara anŭ adi taruh naan inŭh Shammah anak Agee, so Harar. Daya Philistine mbŭh agi tikuruk di Lehi, di yŭn teya kasang bireh. Daya Israel bu mangān daya Philistine.

¹²Pak Shammah dŭh ngundur so teya anŭ, ngibān-i, ka siŭ bara daya Philistine. TUHAN mbŭh dapŭd pimanang bās andu anŭ.

¹³Sindŭk tipuh daya re piguru ngatŭm,[63] taruh naan soldadu so “Ngara adi Taruh Puru” mūn di ka Tang Adullam, tarun adi yŭn David, sitadŭn ndi tibaran daya Philistine bibari di Rubān Rephaim.

¹⁴Di tipuh anŭ David agi di sandah adi bikuta, ka bara daya Philistine mbŭh agi ngisi kupo Bethlehem.

¹⁵David timbur jabŭng ka nang, “Kasi ka daya agi an taban piin nok ku so prigi adi ngapid tiban-bās kupo Bethlehem!”

¹⁶Taruh naan soldadu anŭ adi timagah nyurong mŭrŭt tarun yŭn daya Philistine bibari ka nyauk piin so prigi anŭ di Bethlehem, ka taban-i ngga pari ka nggen di David bada nok. Pak David abah nok-i; ayŭh ren-i di tana ndu sadis ka TUHAN

¹⁷ka nang, “TUHAN, aku dŭh bisa nok piin ati! Anŭ mbŭh keya ka nok deya ngara adi muko ruban asŭng-i!” Raja David dŭh adŭ an nok-i. Anŭ inŭh pingandai so pinyipagan ngara adi taruh naan soldadu adi timagah.

¹⁸Jurud Joab adi dŭn Abishai (sindŭ ngara inŭh Zeruiah) inŭh pinguru “Ngara adi Taruh Puru adi Timagah anŭ”. Ayŭh pakai jarok-i ngga rawan 300 naan daya, ka siŭ ngara, ka jadi timagah di dupan “Ngara adi Taruh Puru”.[64]

¹⁹Ayŭh inŭh adi siabo timagah di dupan “Ngara adi Taruh Puru”[65] buang jadi pinguru ngara, pak ayŭh dŭh timagah mun “Ngara adi Taruh”.

²⁰Benaiah anak Jehoiada, so Kabzeel inŭh ndi naan soldadu adi timagah gŭh; bagŭ pingandai adi kiren pinyipagan-i, samŭn siŭ duwŭh naan pimagan daya Moab. Ndi sidah ayŭh mūn ka darŭm rubang tana di tika salju ka siŭ ndi singah.

²¹Ayŭh agi gŭh siŭ ndi naan daya Egypt, tibande dari adi kaŭs sinyata-i inŭh jarok. Benaiah nyerang ayŭh ngga pakung, sirapas jarok so tangan daya Egypt anŭ ka siŭ ayŭh ngga jarok adŭp-i.

²²Anŭ inŭh pingandai Benaiah adi kiren pinyipagan-i. Ayŭh ndi naan so “Ngara adi Taruh Puru”.[66]

²³Ayŭh timagah gŭh di dupan adŭp ngara, pak dŭh timagah mun “Ngara adi Taruh”. David bada ayŭh jadi pingubak bara pingibān-i.

²⁴Ati inŭh ngara adi bŭkŭn adi so “Ngara adi Taruh Puru”: Asahel, jurud Joab Elhanan anak Dodo so Bethlehem Shammah ngga Elika so Harod Helez so Pelet Ira anak Ikkesh so Tekoa Abiezer so Anathoth Mebunnai so Hushah Zalmon so Ahoh Maharai anak Netophah Heleb anak Baanah so Netophah Ittai anak Ribai so Gibeah di tarun tana tibaran-asar Benjamin Benaiah so Pirathon Hiddai so rubān rubān sindŭk Gaash Abialbon so Arabah Azmaveth so Bahurim Eliahba so Shaalbon Bara anak dari Jashen Jonathan Shammah so Harar Ahiam anak Sharar so Harar Eliphelet anak Ahasbai so Maacah Eliam anak Ahithophel so Gilo Hezro so Carmel Paarai so Arab Igal anak Nathan so Zobah Bani so Gad Zelek so Ammon Naharai so Beeroth, tukang taban sinyata Joab Ira ngga Gareb so Jattir Uriah daya Hitti Sopŭrŭg-i agi taruh puru-ju naan soldadu adi timagah.