Read Biatah Bidayuh 2 SAMUEL 24 Bible Online

2 SAMUEL 24 - Biatah Bidayuh bible

2 SAMUEL 24

¹TUHAN baji dinge di daya Israel, ka Ayŭh bada David taban pito di ngara. TUHAN nang di ayŭh, “Panu di mirang daya Israel ngga daya Judah.”

²Jadi David nggen ukum di Joab, adi pingibās bara soldadu-i: “Panu ngga bara pinguru soldadu mu ka yŭn sopŭrŭg tibaran-asar Israel so bŭngŭn rais ndi ndŭg bŭngŭn rais di parad mandi, ka mirang sopŭrŭg daya. Aku raan puan kiang ngara.”

³Pak Joab nam raja, “Tuan Raja, isa-i TUHAN adi Tapa mai bada daya Israel siratus rupet bagŭ so adi madin, ka isa-i kaam gibabŭ udip kan Ayŭh ndai simŭnŭ. Pak mani Tuan Raja an ndai pimirang ati?”

⁴Pak raja bada Joab ngga bara pingubak soldadu-i tunda pinganang-i; ngara ruah so yŭn-i ka matak di mirang daya Israel.

⁵Ngara mutas Yang Jordan ka bibari di tura ka siratan kupo Aroer adi di yun rubān; di tarun tana Gad.[67] So nŭ ngara masang ka utara nuju Jazer,

⁶ka radus ndŭg Gilead ngga Kadesh, di tarun tana daya Hitti.[68] Komŭnŭ ngara masang ka Dan, ka so Dan ngara[69] di ka Sidon adi di barat.

⁷Komŭnŭ ngara masang ka siratan nuju kupo Tyre adi bikuta, ka ndŭg sopŭrŭg kupo daya Hivi ngga daya Canaan, ka sikasŭn-i ndŭg Beersheba, adi di tura ka siratan Judah.

⁸Jadi kan mbŭh ripuan prii buran ngga duwŭh puru andu, ngara pari ka Jerusalem, muko panu di ndi tarun tarun tana rais.

⁹Ngara di kidaan ka raja prungun sopŭrŭg dari adi mbŭh bisa jadi soldadu: 800,000 naan di Israel, ka 500,000 naan di Judah.

¹⁰Pak ripas David muko ndai pimirang anŭ, pikir-kira atin-i nyirisut ayŭh, ka ayŭh nang di TUHAN, “Aku mbŭh raru bidosa darŭm aku ndai simŭnŭ! Turung apun aku. Aku mbŭh ndai kayuh adi raru budo.”

¹¹TUHAN nang di Gad, nabi adi nyiraja yŭn David, “Panu di kidaan di David nang Aku bada ayŭh mien taruh masam kayuh ati. Aku re ndai tadŭ tadŭ-i adi ayŭh mien.” Isan isan andu jawa ndi, ripas David mbŭh makat bŭŭs,

¹³Gad di ka yŭn-i, kidaan pinganang TUHAN, ka siken, “Aki ndi meh re mai mien? Apag taruh[70] sawa di rais mai, puan kah taruh buran bu mangān pinganyu mai, puan kah taruh andu sesak-andam dog rais mai? Nakit pikir, ka kidaan di aku pinyinam mai adi re aku taban ka TUHAN.”

¹⁴David nam, “Aku mbŭh birisut! Pak aku dŭh raan dog ngukum manusia. Isa-i adŭp Tapa adŭ adi ngukum ata, amai Ayŭh inŭh adi raru masi.”

¹⁵Jadi TUHAN pait sesak-andam bada dog Israel, adi piguru so isan isan anŭ ndŭg ka tipuh adi Ayŭh mbŭh mien. So bŭngŭn rais ndi ndŭg bŭngŭn rais di parad mandi, 70,000 daya Israel kabŭs.

¹⁶Kan malaikat TUHAN mbŭh ngaŭn re pirabur Jerusalem, TUHAN nukar pikir-I pasar ngukum daya ka nang di malaikat anŭ adi tukang siŭ ngara, “Sadang! Mbŭh ayŭh!” Nganŭ malaikat mbŭh di tarun yŭn ngiik adi dog dapu Araunah, adi daya Jebus.

¹⁷David kiris malaikat anŭ adi aŭn siŭ daya, ka nang di TUHAN, “Aku inŭh adi sarah. Aku inŭh adi ndai sarah. Ani sarah mbŭh bara daya anŭ ndai? Kaam patut ngukum aku ngga rawang ku.”

¹⁸Di andu anŭ gŭh Gad di ka yŭn David ka nang di ayŭh, “Di ka tarun yŭn ngiik adi dog dapu Araunah ka pijog ndi mija-sambah yŭn TUHAN.”

¹⁹David tunda pinganang TUHAN ka di nanyam ka adi Gad muko kidaan di ayŭh.

²⁰Araunah tingga ka sagān ka kiris raja ngga bara pinurung-i mandŭg tudu adŭp-i. Ayŭh mutu ubak-i nura David

²¹ka siken, “Tuan Raja, mani kaam kamati?” David nam, “Di miris tarun yŭn mu ngiik ka pijog ndi mija-sambah yŭn TUHAN, ngga pirŭŭ sesak-andam ati.”

²²“Tambit adŭ, Tuan Raja,” Araunah nang, “ka jugan ka TUHAN tadŭ tadŭ kayuh adi raan mai. Ta ati dari dari sapi kaam bisa badang ndu sadis di mija-sambah; Ati parang parang punggo ngga papan ngiik ndu uwang.”

²³Araunah nggen sopŭrŭg-i di raja[71] ka nang di ayŭh, “Isa-i TUHAN adi Tapa mai trima sadis mai.”

²⁴Pak raja nam, “Dŭh, aku raan miris-i. Aku dŭh re jugan ka TUHAN adi Tapa ku sadis adi dŭh biyŭn rega di aku.” Jadi ayŭh miris tarun yŭn ngiik anŭ samŭn dari dari sapi anŭ ngga 50 kiping pirak.

²⁵Komŭnŭ ayŭh pijog ndi mija-sambah yŭn TUHAN ka jugan sadis badang ngga sadis bidingan. TUHAN nam dua-i, ka sesak-andam di Israel ko.