Read Biatah Bidayuh 2 SAMUEL 3 Bible Online

2 SAMUEL 3 - Biatah Bidayuh bible

2 SAMUEL 3

¹Bara daya adi batu rawang Saul ngga bara daya adi batu David babŭ biperang mua tian-i. Darŭm David jadi makin bake, pinganyu-i jadi makin ramah.

²Bara anak dari adi nŭm madis ati, nunda ka susud pinyibranak ngara, inŭh dog biranak yŭn David di Hebron: Amnon, sindŭ-i Ahinoam so Jezreel;

³Chileab, sindŭ-i Abigail, uban Nabal, so Carmel; Absalom, sindŭ-i Maacah, anak dayung Raja Talmai so Geshur;

⁴Adonijah, sindŭ-i Haggith; Shephatiah, sindŭ-i Abital;

⁵Ithream, sindŭ-i Eglah. Sopŭrŭg anak dari anŭ dog biranak di Hebron.

⁶Darŭm bara daya David ngga bara daya adi tŭtŭd di rawang Saul babŭ biperang, Abner jadi makin bikuasa di dupan bara pinunda Saul.

⁷Agi ndi andu meh Ishbosheth anak Saul nyarah Abner amai bŭŭs ngga dayung nyikŭn Saul Rizpah, adi anak Aiah.

⁸Anŭ bada Abner raru tuas. “Kuu pikir aku raan nyipunok Saul ka batu Judah kah?” ayŭh nang. “So sibungas-i aku tŭtŭd di sama mu Saul, bara jurud-i, bara dingan-i, ka aku mbŭh nyiramat kuu so dog ngarah David; pak andu ati kuu nyarah aku jeja ka dayung!

⁹ TUHAN bijanji nang adŭp-I re tambit pritah so Saul ngga bara sesang-i ka re bada David jadi raja yŭn Israel ngga Judah, so bŭngŭn rais parad ndi ndŭg parad andi. Isa-i Tapa siŭ aku kambŭi aku dŭh bada kayuh anŭ jadi bitŭtŭk!”

¹¹Ishbosheth ruai taru Abner, ka dŭh-i birani nang ani ani.

¹²Abner pait pinyisung ka David, adi di tika anŭ agi di Hebron,[4] bada nang, “Asi re mritah tarun tana ati? Ndai pekat-janji ngga aku, ka aku re turung kaam tambit sopŭrŭg Israel ka parad mai.”

¹³“Kana!” David nam. “Aku re ndai pekat-janji ngga kuu adŭ-i pakai ndi masam aran: kuu dŭh siŭn dŭh taban anak dayung Saul ka yŭn ku kan kuu mandŭg di dapŭd aku.”

¹⁴ Ka David pait gŭh pinyisung ka Ishbosheth bada nang, “Pari sawŭn ku Michal ka aku. Siratus kurit-tŭbŭn buat daya Philistine ko ku kapŭg ngga miris ayŭh ndu sawŭn.”

¹⁵Jadi Ishbosheth bada Michal dog tambit so banŭh-i Paltiel anak Laish.

¹⁶Paltiel tunda Michal ndi aran aran ndŭg kupo Bahurim, sien buang-i panu. Pak kan Abner nang, “Pari maad kuu,” ayŭh sawŭ pari.

¹⁷Abner di ka yŭn bara pinguru Israel ka nang di ngara, “Mbŭh tui angān raan bada David jadi raja ngan.

¹⁸Madin inŭh mbŭh tipuh-i angān bada bitŭtŭk kayuh adi TUHAN muko nyabŭt di angān, ‘Aku re pakai urun Ku David ngga nyiramat daya Ku so daya Philistine ka so sopŭrŭg pinganyu ngara adi bŭkŭn.’ ”

¹⁹Abner minyu gŭh di bara daya so tibaran-asar Benjamin ka komŭnŭ di ka Hebron di kidaan di David kayuh adi bara daya Benjamin ngga bara daya Israel mbŭh situju an ndai.

²⁰Kan Abner mandŭg ka yŭn David di Hebron ngga duwŭh puru naan daya-i, David kuka gawai yŭn ngara.

²¹Abner kidaan di David, “Aku madin re matak di ngaja sopŭrŭg Israel ka darŭm pinyipritah mai, Tuan Raja. Ngara re trima kaam jadi raja ngara, ka kaam re mritah ndi tarun tana rais Israel, nanyam patut ngga pinyiraan mai.” David natu Abner siramat ka nyibandar ayŭh matak.

²²Ko anŭ Joab ngga bara daya David adi bŭkŭn pari ko mirupak, taban mua kiang kayuh sirapas. Pak Abner mating di Hebron ngga David, sabab David mbŭh bada ayŭh matak buang natu pimanu-i siramat.

²³Kan Joab ngga bara daya-i mandŭg, ayŭh dog kidaan nang Abner agi mandŭg di bidapŭd ngga David ka mbŭh matak ngga pimanu adi dog natu siramat.

²⁴Jadi Joab di ka yŭn raja ka nang di ayŭh, “Ani anŭ mbŭh mai ndai? Abner agi dapŭd kaam, ka mani kaam pirupas ayŭh?

²⁵Ayŭh mandŭg kamati di nipu kaam ka raan puan sopŭrŭg kayuh adi kaam ndai ka kamaki kaam panu. Adŭp mai tatu puan!”

²⁶Ripas-i ruah so yŭn David, Joab pait bara pinyisung ka Abner, ka ngara taban ayŭh pari so prigi Sirah; pak David dŭh puan ani ani pasar kayuh anŭ.

²⁷Kan Abner mbŭh ndŭg Hebron, Joab taban ayŭh ka bŭngŭn di tiban-bās kupo, mun adi re an minyu ngga ayŭh sadi adŭp-i, pak diginŭ ayŭh tabŭk ayŭh di tain-i. Simŭnŭ inŭh meh Abner dog siŭ Joab sabab ayŭh muko siŭ sude-i Asahel.

²⁸Kan David dingah har anŭ, ayŭh nang, “TUHAN puan nang rayat ku ngga aku dŭh sarah di pinyikabŭs Abner adi dog siŭ daya.

²⁹Isa-i ukum nyatŭk Joab ngga sopŭrŭg rawang-i! Di barang turap re agi dari di rawang-i adi dog andam buat-i adi bijire puan kah andam kurit adi bisā, puan kah dari adi kaŭs-i tungang ndai pingandai dayung, puan kah adi dog siŭ darŭm perang, puan kah adi dŭh biyŭn sukup pinguman!”

³⁰Jadi Joab ngga jurud-I Abishai mbŭh maras dendam yŭn sude ngara Asahel adi dog siŭ Abner di tika bisaad di Gibeon.

³¹Komŭnŭ David mritah Joab ngga bara daya-i bada nyiratak piraka ngara, pakai banang guni, ka muās Abner. Ka di tika nyikubur, Raja David panu di punok tunda arung.

³²Abner dog kubur di Hebron, ka raja muās bana di kubur, ka simŭnŭ gŭh bara daya.

³³David nang ragu puās ati yŭn Abner: “Mani Abner sah kabŭs mun sibudo?

³⁴Tangan-i dŭh dog mŭŭng, Ka kaja-i dŭh dog muak; Ayŭh kabŭs mun adi dog siŭ daya adi ganas!” Ka bara daya muās dinge.

³⁵Ndi andu andu anŭ daya suba bada David man, pak ayŭh mbŭh bipayu nang, “Isa-i Tapa siŭ aku kambŭi aku man sibayuh andu karŭm!”

³⁶Ngara dingah kayuh nang-i ka dŭh mito ayŭh. Sawŭ, sopŭrŭg kayuh adi raja ndai pimunos asŭng rayat-i.

³⁷Sopŭrŭg daya David samŭn sopŭrŭg daya Israel puan nang raja mating sua siŭ Abner.

³⁸Raja nang di bara pinurung-i, “Dŭh kah angān rada nang andu ati inŭh andu adi ngga pinguru adi bās di Israel mbŭh kabŭs?

³⁹Sunggu aku raja adi dog mien Tapa, aku kinyam adŭp ku ramah andu ati. Di aku, anak anak Zeruiah anŭ mbŭh raru ganas. Isa-i TUHAN ngukum bara adi ginaka anŭ nanyam ka pingandai ngara.”