Read Biatah Bidayuh 2 SAMUEL 4 Bible Online

2 SAMUEL 4 - Biatah Bidayuh bible

2 SAMUEL 4

¹Kan anak Saul Ishbosheth dingah Abner dog siŭ di Hebron, ayŭh mbŭh taru, ka sopŭrŭg daya Israel gŭgŭh.

²Ishbosheth biyŭn duwŭh naan pingubak soldadu adi pinguru tibaran tibaran soldadu adi tukang mirupak; ndi naan dŭn Baanah, sianŭ ndi dŭn Rechab. Ngara duwŭh madis anŭ anak Rimmon, so Beeroth so tibaran-asar Benjamin. (Beeroth dog ngitong ndi so utung rais Benjamin.

³Tibirik daya-asar rais anŭ mbŭh bu ka Gittaim, adi yŭn ngara rŭŭ ndŭg andu ati.)

⁴ Sesang Saul adi bŭkŭn inŭh Mephibosheth anak Jonathan. Ayŭh anŭ rimŭh sawa umbur-i di andu sama-i Jonathan ngga Saul dog siŭ. Kan agah pasar pinyikabŭs ngara dog taban so Jezreel, pinyude-i taban ayŭh ngga bu; pak sitagar paŭh bigaut ayŭh rabu so tangan-i, ka ayŭh meh mbŭh bajang.

⁵Rechab ngga Baanah di ka ramin Ishbosheth, darŭm ayŭh aŭn rŭŭ-paya arong kumbeng.

⁶Dayung adi tukang jaga tiban mbŭh nundu darŭm-i sun kirŭh gandom ka mbŭh rasu bŭŭs, jadi Rechab ngga Baanah naku mŭrŭt.[5]

⁷Kan ngara mbŭh di darŭm ramin, ngara di ka birit Ishbosheth, di yŭn-i rŭrŭ bŭŭs, ka siŭ ayŭh. Komŭnŭ ngara kapŭg ubak-i, taban-i ngga bu, ka panu ndi ngarŭm ngarŭm kadŭg rubān Jordan.

⁸Ngara taban ubak anŭ ka Raja David di Hebron ka nang di ayŭh, “Ta ati ubak Ishbosheth, anak pinganyu mai Saul, adi suba an siŭ kaam. Andu ati TUHAN mbŭh nyibandar Tuan Raja maras dendam di Saul ngga di bara sesang-i.”

⁹David nam ngara, “Aku mbŭh bipayu ngga adŭn TUHAN adi udip, adi mbŭh nyiramat aku so sopŭrŭg pinyusah!

¹⁰ Pinyisung adi mandŭg ka yŭn ku di Ziklag ka kidaan di aku pasar pinyikabŭs Saul, pikir adŭp-i taban agah kana. Aku nakap ayŭh ka bada ayŭh dog siŭ. Anŭ upah adi aku nggen di ayŭh yŭn agah kana anŭ!

¹¹Jung ka rabis bisā-i upah yŭn daya adi arap adi siŭ daya adi dŭh sarah adi bŭŭs di ramin adŭp-i! Aku madin re maras di tunduh ngan sarah adi angān muko ndai di tunduh ayŭh ka re kadi angān so jawin ong!”

¹²David nggen ukum bada bara soldadu-i siŭ Rechab ngga Baanah ka kapŭg kaja tangan ngara ka tangid-i sindŭk ndi pagong di Hebron. Ngara tambit ubak Ishbosheth ka kubur-i di kubur Abner di Hebron.