Read Biatah Bidayuh 2 SAMUEL 5 Bible Online

2 SAMUEL 5 - Biatah Bidayuh bible

2 SAMUEL 5

¹Komŭnŭ sopŭrŭg tibaran-asar Israel di ka yŭn David di Hebron ka nang di ayŭh, “Kieh ati isin ngga deya adŭp mai.

²Dawŭ-i, di tipuh Saul gibabŭ raja ami, kaam nguru daya Israel darŭm perang, ka TUHAN bijanji ngga kaam nang kaam re nguru daya-I ka jadi raja ngara.”

³Jadi sopŭrŭg pinguru Israel mandŭg ka yŭn Raja David di Hebron. Ayŭh ndai pambit kudus ngga ngara, ngara nginyo ayŭh, ka ayŭh jadi raja Israel.

⁴ David mbŭh 30 sawa di andu ayŭh jadi raja, ka ayŭh mritah pat puru sawa.

⁵Ayŭh guru di Hebron mritah Judah sitŭkŭd ju sawa sitangah, ka di Jerusalem mritah sopŭrŭg Israel ngga Judah sitŭkŭd 33 sawa.

⁶ Tipuh mbŭh mandŭg adi ngga Raja David ngga bara soldadu-i matak di nyerang Jerusalem. Bara daya Jebus, adi rŭŭ diginŭ, pikir David dŭh re tungang ngarah kupo anŭ, nang di ayŭh, “Kuu dŭh re tungang mŭrŭt kamati; Daya adi karak ngga adi kipang tungang gŭh bitan kuu mŭrŭt kamati.” (

⁷Pak David sawŭ tungang ngarah kuta Zion, ka-i dog kadŭn “Kupo David.”)

⁸Di andu anŭ David nang di bara daya-i, “Agi kah daya adi tiru di bara daya Jebus mun aku tiru di ngara, ndŭg ka an siŭ ngara? Kambŭi agi, angān bisa di so rubang piin ka nyerang ngara adi karak ngga adi kipang.” (Ngapŭi meh agi dog nang, “Adi karak ngga adi kipang dŭh bisa mŭrŭt ramin TUHAN.”)[6]

⁹Ripas-i ko sirabut kuta anŭ, David rŭŭ diginŭ ka kadŭn-i “Kupo David.” Ayŭh pijog kupo maning-i, piguru so tana ngisi di parad tura ka timor sandah anŭ.

¹⁰Ayŭh makin tui makin bake, sabab TUHAN adi Tapa Bisa-pŭrŭg agi ngga ayŭh.

¹¹Raja Hiram so Tyre pait bara daya dagang-i ka yŭn David; ayŭh nggen di ayŭh kayuh kayuh sedar ngga bara tukang kayuh ka tukang tukang batuh bada turung pijog istana.

¹²Simŭnŭ inŭh meh David puan nang TUHAN mbŭh bada ayŭh jadi raja Israel ka mbŭh bada pritah-i mujur yŭn kana bara daya-I.

¹³Ripas-i bipindah so Hebron ka Jerusalem, David tambit yŭn adŭp-i rabis bagŭ dayung nyikŭn samŭn adi ndu-i sawŭn, ka biyŭn tambah anak dari ngga anak dayung.

¹⁴Ngara ati adi dog biranak yŭn-i di Jerusalem inŭh: Shammua, Shobab, Nathan, Solomon,

¹⁵Ibhar, Elishua, Nepheg, Japhia,

¹⁶Elishama, Eliada, ngga Eliphelet.

¹⁷Bara daya Philistine mbŭh dog kidaan nang David mbŭh jadi raja Israel, jadi bara soldadu ngara matak re di nakap ayŭh. Kan David dingah anŭ, ayŭh di ka ndi tarun yŭn adi bikuta.

¹⁸Bara daya Philistine mbŭh ndŭg Rubān Rephaim ka rŭŭ diginŭ.

¹⁹David siken TUHAN, “Bisa kah aku nyerang bara daya Philistine anŭ? Re Mai nggen kah pimanang di aku?” “Bisa, nyerang nŭh!” TUHAN nam. “Aku re bada kuu manang!”

²⁰Jadi David di ka Baal Perazim ka diginŭ ayŭh ngarah bara daya Philistine. Ayŭh nang, “TUHAN mbŭh nyarab pinyibake pinganyu ku mun uba nyarab tadŭ kayuh di tipuh uba.” Jadi meh tarun anŭ dog kadŭn Baal Perazim.[7]

²¹Kan bara daya Philistine mbŭh bu, ngara tingge tibudo tibudo ngara, ka David ngga bara daya-i taban-i ngga bu.

²²Komŭnŭ bara daya Philistine pari ka Rubān Rephaim ka rŭŭ diginŭ dinge.

²³David siken TUHAN dinge, ka Ayŭh nam, “Dŭhnyah nyerang ngara so ti, pak di ka parad tura ka majeh sindŭk dudu tŭngŭn kayuh balsam, ka sidia di nyerang ngara so nŭ.

²⁴Kan angān dingah jawŭn daya baris di tibung tŭngŭn tŭngŭn kayuh, nganŭ angān nyerang amai Aku re agi panu diŭ so angān di ngarah bara soldadu daya Philistine.”

²⁵David ndai nimun TUHAN ko pesan di ayŭh, ka mbŭh tungang kasig bara daya Philistine so Geba bada pari ka Gezer.