Read Biatah Bidayuh 2 SAMUEL 9 Bible Online

2 SAMUEL 9 - Biatah Bidayuh bible

2 SAMUEL 9

¹ Ndi andu David siken, “Agi kah daya so rawang Saul adi babŭ udip? Kambŭi agi, aku re kana ngga ayŭh amai Jonathan adi ko kana ngga aku.”

²Agi ndi naan daya-gaji rawang Saul dŭn Ziba, ka ayŭh dog kidaan bada di ka yŭn David. “Kuu kah Ziba?” raja siken. “Aku, tuan,” ayŭh nam.

³Raja siken ayŭh, “Agi kah daya so rawang Saul adi babŭ udip adi bisa aku stabi buang kana ngga, nimun muko aku bijanji ngga Tapa?” Ziba nam, “Babŭ agi ndi naan, anak Jonathan. Ayŭh bajang.”

⁴“Diki ayŭh?” raja siken. “Di ramin Machir anak Ammiel di Lodebar,” Ziba nam.

⁵Jadi Raja David bada daya di bagan ayŭh.

⁶Kan Mephibosheth, adi anak Jonathan ngga sukuh Saul, mbŭh mandŭg, ayŭh mutu ubak-i di sirung jawin David ngga stabi. David nang, “Mephibosheth,” ka ayŭh nam, “Ani, tuan.”

⁷“Dŭhnyah taru,” David nang di ayŭh. “Aku re kana ngga kuu amai sama mu Jonathan. Aku re nggen pari ka kuu sopŭrŭg tana adi babai mu Saul ko dapu, ka kuu re ari sua man ngga aku.”

⁸Mephibosheth mutu ubak-i dinge ka nang, “Aku ati mbŭh keya ka tadang kasong, tuan! Mani kaam sah kana ngga aku?”

⁹Komŭnŭ raja bagan Ziba, daya-gaji Saul, ka nang, “Aku nggen di Mephibosheth adi sukuh tuan mu, sopŭrŭg kayuh adi Saul ngga rawang-i ko dapu.

¹⁰Kuu, bara anak dari mu, ngga bara daya-gaji mu re biteya birŭmŭh di tana anŭ yŭn rawang tuan mu Saul ka ngatŭm buwa-i, ngga kudip ngara. Pak adŭp Mephibosheth re ari sua man di mija ku.” (Ziba biyŭn simŭng rimŭh naan anak dari ka duwŭh puru naan daya-gaji.)

¹¹Ziba nam, “Aku re ndai sopŭrŭg kayuh adi Tuan Raja bada.” Jadi Mephibosheth man di mija raja,[23] nimun anak raja.

¹²Mephibosheth biyŭn ndi naan anak dari dŭn Mica. Sopŭrŭg ngara di rawang Ziba jadi daya-gaji Mephibosheth.

¹³Jadi Mephibosheth, adi bajang so-duwŭh kaja-i, rŭŭ di Jerusalem, ari man ayō raja.