Read Biatah Bidayuh 1 RAJA 10 Bible Online

1 RAJA 10 - Biatah Bidayuh bible

1 RAJA 10

¹ Rani so Sheba dingah pasar timagah Solomon,[30] matak di ka Jerusalem amai an suba ayŭh ngga bagŭ pinyiken adi mbar dog nam.

²Ayŭh taban bagŭ pinurung-i, samŭn onta onta adi kabis rapah, batuh brega, ka dudu mas. Kan ayŭh ngga Solomon bidapŭd, ayŭh siken barang masam kayuh adi ayŭh tungang siken.

³Solomon nam sopŭrŭg-i; mating pinyiken adi re paŭh mbar nam-i.

⁴Rani so Sheba dingah pinyibijak Solomon ka kiris istana adi mbŭh-i pijog.

⁵Ayŭh kiris pinguman adi dog ngidang di mija-i, ramin ramin bara pinurung-i, ka atur kraja pingandai bara pinurung istana ka piraka kraja adi ngara nēn, bara daya-gaji adi nguan ayŭh di tika biruman, ka dudu sadis adi ayŭh jugan di Ramin TUHAN. Sopŭrŭg anŭ bada rani anŭ ngasŭng ka inga inga.

⁶Ayŭh nang di Solomon, “Kayuh adi aku dingah so rais adŭp ku pasar kuu[31] ngga pasar pinyibijak mu inŭh sawŭ!

⁷Pak aku dŭh sabah ndŭg ka adŭp ku mbŭh kiris-i ngga batŭh adŭp ku. Ka bagŭ adi gibayuh aku dingah; pinyibijak mu ngga pinyikaya mu agi rabis so adi mbŭh dog kidaan di aku.

⁸Bituah inŭh bara sawŭn mu![32] Ka munki masam bituah inŭh bara daya-gaji mu, adi ari agi ngga kuu ka mbŭh raru utung dapŭd dingah pinganang bijak mu!

⁹Puji ka TUHAN adi Tapa mu! Ayŭh mbŭh kiren munki masam munos asŭng-I di kuu; ngapŭi meh Ayŭh mbŭh bada kuu jadi raja Israel. Sabab pinyirindu-I di Israel tan adu adu, Ayŭh mbŭh bada kuu jadi raja isa kuu dapŭd pimanu ukum-adat ngga pinyitŭnggŭn.”

¹⁰Ayŭh nggen di Raja Solomon pinganggen adi taban-i: mas adi mbŭh rabis so 4,000 kilogram ngga dudu rapah samŭn batuh brega. Kiang rapah adi ayŭh nggen di Solomon mbŭh raru bagŭ so anŭ adi ko Solomon trima tian-ti.

¹¹(Dudu kapar Hiram, adi taban mas so Ophir, agi gŭh taban mua kiang kayuh junipa ngga batuh batuh brega.

¹²Solomon pakai kayuh ngga ndai atag di Ramin TUHAN ka di istana, ka ndai gŭh kachapi ngga gambus yŭn bara pimain musik. Anŭ mbŭh kayuh junipa adi siabo kana adi dog taban ka Israel; mating tia adi mun anŭ tungang dog kiris dinge.)

¹³Raja Solomon nggen di Rani so Sheba barang masam kayuh adi-i mite, ngga nambah pinganggen adi bŭkŭn adi mbŭh-i nggen di ayŭh. Komŭnŭ rani anŭ ngga bara pinurung-i pari ka tarun tana Sheba.

¹⁴Barang sawa Raja Solomon kambat sindŭk 23,000 kilogram mas

¹⁵nambah suke[33] adi dog bayar daya daya dagang, utung utung so dagang, ka takŭd so raja raja Arab ngga takŭd so bara gabenor utung tarun tana Israel.

¹⁶Solomon ndai 200 tibande pinangin, ka barang pinangin mbŭh dog marut ngga mas sindŭk 7 kilogram.

¹⁷Ayŭh gŭh ndai 300 anak anak pinangin, ka marut sopŭrŭg-i ngga sindŭk 2 kilogram mas. Ayŭh na sopŭrŭg pinangin anŭ di Birit-bās Tuān Lebanon.[34]

¹⁸Ayŭh gŭh bada ndi takta adi baga dog ndai ngga bŭbŭt gajah ka dog marut ngga tigŭrŭ mas.

¹⁹Takta anŭ biyŭn nŭm subang tungoh ngga maad-i, ngga patong singah di barang bŭngŭn subang; prungun-i simŭng duwŭh singah. Di punok takta anŭ agi patong ubak dari sapi, ka di tigang duwŭh tangan takta agi patong singah. Mating pritah adi bŭkŭn biyŭn takta mun anŭ.

²¹Sopŭrŭg saker Solomon dog ndai so mas, ka sopŭrŭg pingakas di Birit-bās Tuān Lebanon dog ndai so tigŭrŭ mas. Mating pirak dog pakai, amai-i dŭh kayuh adi dog nyirundeng brega di jaman Solomon.

²²Ayŭh biyŭn dudu kapar baga adi birayar di rawŭt samah ngga dudu kapar Hiram. Ndi sidah darŭm taruh sawa dudu kapar-i anŭ pari, taban mas, pirak, bŭbŭt gajah, ka kiyad.

²³Raja Solomon kaya dŭ ka bijak dŭ so tadŭ tadŭ raja adi bŭkŭn,

²⁴ka ndi ong ong raan mandŭg di dingah pinyibijak adi Tapa mbŭh nggen di ayŭh.

²⁵Barang naan adi mandŭg ka yŭn-i nggen pinganggen -- barang masam kayuh adi dog ndai so pirak ngga mas, ka taris, sinyata, rapah, kuda, ka kuda pinakan kaldi. Kayuh anŭ simŭnŭ barang sawa.

²⁶ Solomon nguruk 1,400 krita kuda ka 12,000 kuda yŭn soldadu pinunggang kuda. Kada so ngara anŭ ayŭh na di Jerusalem ka adi bŭkŭn ayŭh na di kupo kupo bŭkŭn.

²⁷Di jaman pinyipritah-i pirak inŭh kayuh braŭn di Jerusalem, keya ka batuh; ka kayuh sedar inŭh kayuh adi raru bagŭ keya ka tŭngŭn kayuh sycomore di sigŭn sandah di Judah.

²⁸ Bara pinurung raja yŭn dagang, ngatur kuda kuda adi dog jua so Musri[35] ngga Cilicia,[36]

²⁹ngga krita krita kuda adi dog jua so Egypt. Ka komŭnŭ ngara jua kuda kuda ngga krita krita kuda anŭ ka raja raja Hitti ngga raja raja Syria, ngga rega 150 kiping pirak yŭn barang kuda, ka 600 kiping pirak yŭn barang krita kuda.