Read Biatah Bidayuh 1 RAJA 11 Bible Online

1 RAJA 11 - Biatah Bidayuh bible

1 RAJA 11

¹ Solomon awang bagŭ dayung tami. Nambah anak raja so Egypt ayŭh sawŭn gŭh dayung dayung daya Hitti ngga dayung dayung so Moab, Ammon, Edom, ka Sidon.

² Ayŭh sawŭn ngara anŭ sunggu TUHAN muko pesan daya Israel bada dŭh banan sawan ngga bangsa bangsa anŭ, sabab ngara re bada bara daya Israel nyambah tapa tapa bŭkŭn.

³Solomon sawŭn 700 anak raja ka biyŭn gŭh 300 dayung nyikŭn. Ngara anŭ bada ayŭh kambŭt Tapa

⁴ka kan ayŭh mbŭh minyamba ngara mbŭh bada ayŭh nyambah tapa tapa saruh. Ayŭh dŭh tŭtŭd di TUHAN adi Tapa-i, dŭh mun sama-i David.

⁵Ayŭh nyambah Astart, tapa daya Sidon, ka Molech adi tapa daya Ammon, tapa adi sipŭ anŭ.

⁶Ayŭh bidosa rawan TUHAN ka dŭh tŭtŭd di Ayŭh, dŭh mun sama-i David.

⁷Di darŭd tura ka timor Jerusalem ayŭh ndai ndi tarun yŭn nyambah Chemosh, adi sipŭ tapa daya Moab, ka tarun yŭn nyambah Molech adi sipŭ tapa daya Ammon.

⁸Ayŭh gŭh pijog tarun yŭn bisambah di yŭn sopŭrŭg sawŭn-i adi daya tami badang kimanyan ka jugan sadis ka tapa ngara.

⁹Sunggu TUHAN adi Tapa Israel muko nandŭng di Solomon piduwŭh kari ka mbŭh pesan ayŭh bada dŭh nyambah tapa saruh, Solomon dŭh dingah pinganang TUHAN, ka tanŭ ka ayŭh kambŭt Ayŭh. Jadi TUHAN mbŭh baji di Solomon

¹¹ka nang di ayŭh, “Sabab kuu mbŭh singaja miranggar simanya mu ngga Aku ka nyibireu pesan ku, Aku bipayu Aku re kadi pritah ati so kuu ka nggen-i di ndi so pinurung mu.

¹²Pak amai David adi sama mu, Aku dŭh re ndai simŭnŭ di jaman mu. Aku re kajŭn ndŭg ka anak mu jadi raja.

¹³Ka Aku dŭh re kubo kadi pritah anŭ so ayŭh; Aku re kidŭm yŭn-i ndi tibaran-asar amai David adi urun Ku, ka amai Jerusalem, kupo adi mbŭh Aku bada jadi kupo adŭp Ku.”

¹⁴Jadi TUHAN bada Hadad, adi so rawang raja di Edom, jadi pinganyu Solomon.

¹⁵Mua tian dawŭ-i, kan David muko ngarah rais Edom, Joab adi pingibās bara soldadu-i di kamanŭ di kubur daya. Ayŭh ngga bara daya-i rŭŭ di Edom nŭm buran, ka di tipuh anŭ ngara siŭ sopŭrŭg dari di Edom

¹⁷adŭ-i Hadad ngga kudu kudu naan daya-gaji sama-i adi daya Edom, adi bikaduh bu ka Egypt. (Nganŭ Hadad gibabŭ sŭ.)

¹⁸Ngara bu so Midian di ka Paran, di yŭn agi kudu kudu naan daya bŭkŭn sua ngga ngara. Komŭnŭ ngara matak di ka Egypt ka di bidapŭd ngga raja, adi nggen di Hadad kada tana, ramin ngga pinguman.

¹⁹Hadad bijerā ngga raja, ka raja nggen sude sawŭn-i, adi jurud Rani di Tahpenes, di Hadad ndu sawŭn.

²⁰Ayŭh biranak yŭn-i ndi anak dari, Genubath, adi dog sita rani di istana ndŭg-i baga, bigaur ngga anak anak raja adi bŭkŭn.

²¹Kan agah mbŭh ndŭg Hadad di Egypt nang David mbŭh mating ka Joab adi pingibās bara soldadu mbŭh kabŭs, Hadad nang di raja, “Bada aku pari ka rais adŭp ku.”

²²“Mani?” raja siken. “Agi aku kambŭt nggen kayuh di kuu? Anŭ kah sabab kuu raan mari?” “Bada adŭ aku mari,” Hadad nam raja. Ka ayŭh mari ka rais adŭp-i.[37] Di jaman-i jadi raja di Edom, Hadad mbŭh daya adi raru arap, pinganyu bās Israel.[38]

²³Tapa gŭh bada Rezon anak Eliada jadi pinganyu Solomon. Rezon ko bikaduh bu so tuan-i, Raja Hadadezer di Zobah,

²⁴ka mbŭh jadi pinguru ndi anak tibaran pinyamun. (Kayuh anŭ jadi simŭnŭ ripas David ko ngarah Hadadezer ka ko siŭ bara pambit-i daya Syria.) Rezon ngga bara daya-i matak ka rŭŭ di Damascus, di yŭn bara daya-i bada ayŭh jadi raja Syria.

²⁵Ayŭh jadi pinganyu Israel di jaman Solomon.

²⁶Ndi naan dinge adi jadi pinganyu Raja Solomon inŭh ndi naan so bara pinurung adŭp-i, Jeroboam anak Nebat, so Zeredah di Ephraim. Sindŭ-i inŭh dayung uban dŭn Zeruah.

²⁷Ati inŭh dundan daya makat rawan Solomon. Solomon ngisi tana di tura ka timor Jerusalem ka nyurat sindung kupo.

²⁸Jeroboam inŭh daya pimara adi gagah nyiraja, ka kan Solomon kiris munki ayŭh bandar nyiraja, ayŭh bada ayŭh jadi tukang ngatur kraja takan di tarun tana tibaran-asar Manasseh ngga Ephraim.

²⁹Ndi andu, darŭm Jeroboam panu so Jerusalem, nabi Ahijah, so Shiloh, bidapŭd ngga ayŭh sadi di aran di sapa rais.

³⁰Ahijah kadi jipo-ambu adi-i nēn, nyiratak-i bada jadi simŭng duwŭh supek,

³¹ka nang di Jeroboam, “Tambit simŭng supek yŭn adŭp mu, sabab TUHAN, adi Tapa Israel, nang di kuu, ‘Aku re kadi so Solomon pritah-i, ka Aku re nggen di kuu simŭng tibaran-asar.

³²Solomon re dapu ndi tibaran-asar, amai David adi urun Ku, ka amai Jerusalem, kupo adi Aku mbŭh mien bada jadi tung jaku so ndi tarun tarun tana Israel.

³³Aku re ndai simŭnŭ sabab Solomon mbŭh tirawan Aku ka mbŭh[39] nyambah tapa tapa saruh: Astart, tapa daya Sidon; Chemosh, tapa daya Moab; ka Molech, adi tapa daya Ammon. Solomon mbŭh[40] nyibireu Aku; ayŭh mbŭh sarah, ka dŭh sita ukum ukum-adat Ku ngga pesan Ku, dŭh mun sama-i David.

³⁴Pak Aku dŭh re tambit sopŭrŭg pritah anŭ so Solomon, ka Aku re bada ayŭh bikuasa sitŭkŭd umbur-i. Aku re ndai simŭnŭ amai David adi urun Ku, adi Aku mbŭh mien ka adi tunda ukum ukum-adat Ku ngga pesan Ku.

³⁵Aku re tambit pritah anŭ so anak Solomon ka re nggen simŭng tibaran-asar di kuu,

³⁶pak Aku re bada anak Solomon dapu ndi tibaran-asar, isa Aku tungang adu adu biyŭn sesang urun Ku David mritah Jerusalem, kupo adi Aku mbŭh mien ndu tarun yŭn Aku dog nyambah.

³⁷Jeroboam, Aku re bada kuu jadi raja di Israel, ka kuu re mritah sopŭrŭg tarun tana adi kuu raan.

³⁸Kambŭi kuu batur batur nundok di Aku, udip nanyam ka ukum-adat Ku, ka ndai kayuh adi Aku bada kuu ndai, nimun urun Ku David, Aku re ari agi ngga kuu. Aku re bada kuu jadi raja di Israel ka re natu nang sesang mu re mritah gati kuu, nimun adi ko Aku ngatur yŭn David.

³⁹Sabab dosa Solomon Aku re ngukum bara sesang David, pak dŭh re adu adu.’ ”

⁴⁰Jadi Solomon raan siŭ Jeroboam kan kayuh anŭ mbŭh ndŭg kajit-i, pak ayŭh bu di ka Raja Shishak di Egypt ka rŭŭ diginŭ ndŭg ka Solomon mbŭh kabŭs.

⁴¹Sopŭrŭg kayuh bŭkŭn adi Solomon ndai, pasar pinyipritah ngga pinyibijak-i, mbŭh dog nuris darŭm Surat Dundan Solomon.

⁴²Ayŭh jadi raja di Jerusalem, mritah sopŭrŭg tarun tana Israel sitŭkŭd 40 puru sawa.

⁴³Ayŭh kabŭs ka dog kubur di Kupo David, ka anak-i Rehoboam gati ayŭh jadi raja.