Read Biatah Bidayuh 1 RAJA 12 Bible Online

1 RAJA 12 - Biatah Bidayuh bible

1 RAJA 12

¹Rehoboam di ka Shechem, di yŭn sopŭrŭg daya Israel di tura ka Utara mbŭh tikuruk re bada ayŭh jadi raja.

²Kan Jeroboam anak Nebat, adi mbŭh bu ka Egypt mangān Raja Solomon, dingah agah anŭ, ayŭh pari so[41] Egypt.

³Daya tibaran-asar di tura ka utara bagan ayŭh, ka komŭnŭ sopŭrŭg ngara samah di ka Rehoboam ka nang di ayŭh,

⁴“Sama mu Solomon pijera kieh ngga kraja bat. Kambŭi kuu pijangan kraja ami anŭ ka bada pimudip ami sanang, kieh re jadi rayat adi tŭtŭd yŭn mu.”

⁵“Pari kamati darŭm taruh andu ka aku re nggen pinyinam ku di angān,” ayŭh nam. Ka ngara bu.

⁶Raja Rehoboam bisiken ngga bara nyamba adi muko jadi tukang pitayan yŭn sama-i Solomon. “Ani pinyinam sŭn angān nang aku patut nggen di ngara anŭ?” ayŭh siken.

⁷Ngara nam, “Kambŭi kuu raan digŭng daya anŭ ngga nakit, kuu nggen pimite ngara, ka ngara re ari tŭtŭd bituan di kuu.”

⁸Pak ayŭh nyibireu pinyitayan bara nyamba anŭ ka di ka yŭn ngara adi tuba takar adŭp-i adi madin mbŭh jadi tukang pitayan yŭn adŭp-i.

⁹“Ani pinyitayan ngan yŭn ku?” ayŭh siken. “Ani sŭn angān nang aku patut nang di ngara anŭ adi bada aku pijangan kraja ngara?”

¹⁰Ngara nam, “Ati inŭh kayuh adi kuu patut kidaan di ngara: ‘Anak trinju ku tabar dŭ so kupong sama ku!’

¹¹Kidaan di ngara, ‘Sama ku bada angān bandar nyiraja, pak aku re bada kraja ngan rabis bat. Ayŭh madŭs angān ngga pasut; aku re madŭs angān ngga pasut adi pireja basi!’ ”

¹²Taruh andu ripas anŭ Jeroboam ngga sopŭrŭg daya pari ka yŭn Raja Rehoboam, nimun adi muko-i kidaan di ngara.

¹³Raja nyibireu pinyitayan bara nyamba, ka ayŭh minyu kasar ngga ngara,

¹⁴nimun adi bara adi mara anŭ muko pitayan di ayŭh. Ayŭh nang, “Sama ku bada angān bandar nyiraja; Aku re bada kraja ngan rabis bat. Ayŭh madŭs angān ngga pasut; aku re madŭs angān ngga pasut adi pireja basi!”

¹⁵Anŭ mbŭh nanyam ka pinyiraan TUHAN, bada jadi bitŭtŭk kayuh adi-I nang di Jeroboam anak Nebat so baba nabi Ahijah so Shiloh. Anŭ inŭh sabab raja dŭh nggen pimite bara daya.

¹⁶ Kan bara daya kiris raja dŭh piduri kayuh adi nang ngara, ngara nyirais, “Re ata ngga mani David ngga rawang-i! Ani mbŭh ngara ndai yŭn ta? Bara daya Israel, ja ata maad! Tandah Rehoboam sadi jaga adŭp-i!” Jadi daya Israel rawan pritah,

¹⁷tingge Rehoboam jadi raja yŭn daya adi rŭŭ di utung tarun tana Judah adŭ.

¹⁸Komŭnŭ Raja Rehoboam pait Adoniram, adi tukang ngatur kraja takan, bada di ka bara daya Israel, pak ngara manjan ayŭh ngga batuh ndŭg kabŭs. Sabab anŭ, Rehoboam rikas tambit krita kuda-i ka bu di ka Jerusalem.

¹⁹So nganŭ daya Israel di pritah tura ka utara rawan taris asar pinyipritah David.

²⁰Kan daya israel dingah Jeroboam mbŭh pari so Egypt, ngara mite ayŭh sua tikuruk ngga bara daya ka bada ayŭh jadi raja Israel. Kaŭs tibaran-asar Judah adŭ adi babŭ tŭtŭd ngga sesang Raja David.

²¹Kan Rehoboam mandŭg ka Jerusalem, ayŭh bagan bada tikuruk 180,000 bara soldadu adi siabo pandai birawan so tibaran-asar Judah ngga Benjamin. Ayŭh raan matak biperang ka pari tambit kuasa-i adi mritah tibaran-asar Israel adi di tura ka utara.

²²Pak Tapa kidaan di nabi Shemaiah

²³bada nggen pinganang ati di Rehoboam ka di sopŭrŭg daya so tibaran-asar Judah ngga Benjamin:

²⁴“Dŭhnyah nyerang jurud madis adŭp ngan, adi daya Israel. Maad adŭ, sopŭrŭg ngan. Kayuh adi mbŭh jadi inŭh nanyam ka pinyiraan Ku.” Ngara sopŭrŭg tunda pinganang TUHAN ka mari maad ka ramin adŭp ngara.

²⁵Raja Jeroboam, adi raja Israel, ndai sindung kupo Shechem di rais tarun tana sandah Ephraim ka rŭŭ diginŭ mua tian-i. Komŭnŭ ayŭh bu ka ndai sindung kupo Penuel.

²⁶Ayŭh pikir, “Nanyam kayuh adi jadi madin, kambŭi daya ku di ka Jerusalem ka jugan sadis ka TUHAN di Ramin TUHAN diginŭ, ngara tatu re nundok di Raja Rehoboam di Judah ka re siŭ aku.”

²⁸ Ripas-i ko bipikir sakanŭ, ayŭh ndai duwŭh anak dari sapi so mas ka nang di bara daya-i, “Angān mbŭh raru tui ari di bisambah di Jerusalem. Daya Israel, ta digiti tapa tapa adi muko taban angān ngga ruah so Egypt!”

²⁹Ayŭh na ndi anak dari sapi mas di Bethel ka ndi di Dan.

³⁰Jadi bara daya mbŭh bidosa, matak di bisambah di Bethel ngga di Dan.[42]

³¹Jeroboam pijog gŭh tarun tarun yŭn bisambah di tibung tibung sandah, ka mien daya bada jadi imam so rawang adi dŭh tibaran-asar Levi.

³² Jeroboam gŭh piguru gawai adat di andu adi simŭng-rimŭh darŭm buran mai, mun anŭ adi di Judah. Di tunduh mija-sambah di Bethel ayŭh jugan sadis ka anak dari sapi mas anŭ adi-i ko ndai, ka ayŭh bada agi di Bethel dudu imam bada nyiraja di tarun tarun yŭn bisambah adi-i ko pijog.

³³Ka di andu adi simŭng-rimŭh darŭm buran mai, andu adi adŭp-i muko miratak, ayŭh di ka Bethel ka jugan sadis di tunduh mija-sambah ngga sita gawai adi adŭp-i muko piguru yŭn daya Israel.