Read Biatah Bidayuh 1 RAJA 13 Bible Online

1 RAJA 13 - Biatah Bidayuh bible

1 RAJA 13

¹So ka pinyibada TUHAN, ndi naan nabi so Judah di ka Bethel, ka ndŭg nŭ darŭm Jeroboam mijog sindŭk mija-sambah jugan sadis.

² Nanyam ka pesan TUHAN, nabi anŭ nyarah mija-sambah anŭ: “O mija-sambah, mija-sambah, ati inŭh pinganang TUHAN: Ndi naan anak daya, adi re dog kadŭn Josiah, re dog biranak so rawang David. Ayŭh re simareh di tunduh mu bara imam adi nyiraja di tarun yŭn nyambah tibudo, ka adi jugan sadis di tunduh mu. Ayŭh re badang turang manusia di tunduh mu.”

³Ka nabi anŭ pijuu nang, “Mija-sambah ati re rubuh, ka dudu apŭk di tunduh-i re mingare. Komŭnŭ kuu re puan nang TUHAN mbŭh minyu so baba ku.”

⁴Kan Raja Jeroboam dingah pinganang anŭ, ayŭh tiju ayŭh buang nyirais nang, “Nakap ayŭh!” Jam anŭ gŭh tangan raja bagŭg, dŭh-i tungang tarik-i pari.

⁵Mija-sambah anŭ rasu rubuh ka apŭk mingare di tana, nimun adi muko nabi diŭ kidaan ngga adŭn TUHAN.

⁶Raja Jeroboam nang di nabi anŭ, “Turung bidua yŭn ku di TUHAN adi Tapa mu, ka bada Ayŭh pibua tangan ku!” Nabi anŭ bidua ka TUHAN, ka tangan raja bua.

⁷Komŭnŭ raja nang di nabi anŭ, “Maad ka arŭn ku, ata bisamah. Aku re ngupah kuu amai kayuh adi kuu muko ndai.”

⁸Nabi anŭ nam, “Sunggu bait kani kuu nggen di aku sitangah pinyikaya mu, aku dŭh re tunda kuu, di man bait di nok tadŭ tadŭ kayuh ngga kuu.

⁹TUHAN mbŭh pesan aku bada dŭh man bait nok kayuh, ka dŭh siŭn mari kadŭg aran adi so aku mandŭg.”

¹⁰Jadi ayŭh dŭh pari kadŭg aran adi so-i mandŭg, pak kadŭg aran bŭkŭn.

¹¹Di tika anŭ, agi ndi naan nabi adi minyamba rŭŭ di Bethel. Bara anak dari-i[43] mandŭg ka kidaan di ayŭh kayuh adi nabi so Judah muko ndai di Bethel andu anŭ ka kayuh adi-i muko nang di Raja Jeroboam.

¹²“Aran aki kadŭg-i kan-i bu?” nyamba nabi anŭ siken ngara. Ngara tiju yŭn-i[44] aran anŭ

¹³ka ayŭh bada ngara na tapas-pinyiguru di tunduh kaldi yŭn-i. Ngara sawŭ na, ka ayŭh matak

¹⁴kadŭg aran anŭ tunda nabi so Judah anŭ ka dapŭd ayŭh guru di ribo tŭngŭn oak. “Kuu kah nabi so Judah?” ayŭh siken. “Aku,” nabi anŭ nam.

¹⁵“Ja maad di bisamah ngga aku,” ayŭh nang.

¹⁶Pak nabi so Judah anŭ nam, “Aku dŭh dapŭd tunda kuu bait mŭrŭt ramin mu. Ka aku dŭh dapŭd man bait nok tadŭ tadŭ kayuh digiti ngga kuu,

¹⁷sabab TUHAN mbŭh pesan aku bada dŭh ndai simŭnŭ, ka dŭh siŭn pari kadŭg aran adi so aku mandŭg.”

¹⁸Komŭnŭ nyamba nabi so Bethel anŭ nang di ayŭh, “Aku nabi gŭh mun kuu, ka so ka pesan TUHAN malaikat kidaan di aku bada taban kuu ngga maad ka arŭn ku.” Pak nyamba nabi anŭ kadong.

¹⁹Jadi nabi so Judah anŭ maad ngga nyamba nabi anŭ ka ramin-i ka bisamah ngga ayŭh.

²⁰Darŭm ngara man, pinganang TUHAN mandŭg ka nyamba nabi anŭ,

²¹ka ayŭh nang di nabi so Judah anŭ, “TUHAN nang kuu nyibireu pinganang-I, dŭh ndai kayuh nanyam adi muko-I pesan.

²²Gŭt-i kuu mbŭh pari ka man di tarun adi Ayŭh muko nagah. Sabab anŭ kuu re dog siŭ, ka tadang mu dŭh re dog kubur di kubur rawang adŭp mu.”

²³Ripas ngara ko man, nyamba nabi anŭ na tapas-pinyiguru di tunduh kaldi yŭn nabi so Judah anŭ,

²⁴ka ayŭh matak. Di aran, singah nakap ka siŭ ayŭh. Tadang-i guring di aran, ka kaldi ngga singah anŭ mijog sindŭk-i.

²⁵Kudu kudu naan daya murah ka kiris tadang di aran, ka singah adi mijog sindŭk-i. Ngara radus panu ka Bethel ka kidaan kayuh adi ngara mbŭh kiris.

²⁶Kan nyamba nabi anŭ dingah, ayŭh nang, “Anŭ inŭh nabi adi nyibireu pesan TUHAN! Ka TUHAN mbŭh bada singah di nakap ka siŭ ayŭh, sak adi muko TUHAN nang.”

²⁷Komŭnŭ ayŭh nang di bara anak dari-i, “Na tapas-pinyiguru di tunduh kaldi ku.” Ngara sawŭ na,

²⁸ka ayŭh matak ka dapŭd tadang nabi anŭ di aran ngga kaldi ka singah anŭ babŭ mijog sindŭk-i. Singah anŭ dŭh man tadang anŭ bait nakap kaldi anŭ.

²⁹Nyamba nabi anŭ tambit tadang anŭ, na-i di tunduh kaldi anŭ, ka taban-i ngga pari ka Bethel yŭn muās-i ka kubur-i.

³⁰Ayŭh kubur-i di kubur rawang adŭp-i, ka ayŭh ngga bara anak dari-i muās-i, nang, “O jurud ku, jurud ku!”

³¹Ripas pinyikubur, nabi anŭ nang di bara anak dari-i, “Kan aku kabŭs, kubur aku digiti sindŭk ayŭh.

³²Pinganang adi-i piruah so ka pesan TUHAN pasar mija-sambah di Bethel ka pasar sopŭrŭg tarun yŭn bisambah di kupo kupo di Samaria re tatu jadi bitŭtŭk.”

³³Raja Jeroboam, di Israel gibabŭ dŭh tingge pingandai arap-i, ka babŭ mien imam imam so rawang daya saja bada nyiraja di mija-sambah adi-i muko ndai. Ayŭh garar tadŭ daya adi raan jadi imam.

³⁴Dosa-i anŭ pirabur taris asar pinyipritah-i.