Read Biatah Bidayuh 1 RAJA 14 Bible Online

1 RAJA 14 - Biatah Bidayuh bible

1 RAJA 14

¹Di tika anŭ anak Raja Jeroboam birandam.

²Jeroboam nang di sawŭn-i, “Nyibabā adŭp mu isa daya dŭh natŭng kuu; di ka Shiloh di yŭn ndi naan nabi dŭn Ahijah rŭŭ, ayŭh adi ko nang aku re jadi raja Israel.

³Taban ka yŭn-i simŭng baru ruti, kada kue, ka ndi gabuk ju banyis. Siken di ayŭh ani re jadi di anak ta; ayŭh re kidaan di kuu.”

⁴Jadi ayŭh di ka ramin Ahijah di Shiloh. Ahijah mbŭh minyamba ka dŭh tungang kiris tarun.

⁵TUHAN muko kidaan di ayŭh nang sawŭn Jeroboam re mandŭg an siken pasar anak-i adi birandam. Ka TUHAN mbŭh kidaan di ayŭh ani re-i nang. Kan sawŭn Jeroboam mandŭg, ayŭh ngakar jadi daya bŭkŭn.

⁶Pak kan Ahijah dingah ayŭh mŭrŭt tiban, ayŭh nang, “Mŭrŭt. Aku puan kuu sawŭn Jeroboam. Mani kuu ngakar jadi daya bŭkŭn? Aku agi agah arap yŭn mu.

⁷Panu di kidaan Jeroboam nang ati inŭh kayuh adi TUHAN, adi Tapa Israel, nang di ayŭh: ‘Aku mien kuu so dupan bara daya bagŭ ka bada kuu jadi raja yŭn daya Ku Israel.

⁸Aku tambit pritah so sesang David ka nggen-i di kuu. Pak kuu dŭh mun urun Ku David, adi mbŭh sukup tŭtŭd di aku, tunda pesan Ku, ka ndai kaŭs kayuh adi nanyam ka pinyiraan Ku.

⁹Kuu mbŭh ndai dosa adi mbŭh bās dŭ so tung ngara adi mritah diŭ so kuu. Kuu mbŭh tirawan Aku ka mbŭh bada Aku baji darŭm kuu ndai tibudo ka gayŭn so basi bada daya nyambah.

¹⁰ Sabab anŭ aku re pirabur taris asar pinyipritah mu ka re siŭ sopŭrŭg sesang mu adi dari, mara bait minyamba. Aku re bada rawang mu miyap; ngara re dog pisen mun sapok.

¹¹Asi asi so rawang mu adi kabŭs darŭm kupo re dog man kasong, ka asi asi adi kabŭs di sapa rais re dog man manuk volcha. Aku, adi TUHAN, mbŭh minyu.’ ”

¹²Ahijah pijuu nang di sawŭn Jeroboam, “Kuu bisa mari madin. Kan kuu mbŭh ndŭg kupo, anak mu re kabŭs.

¹³Sopŭrŭg daya Israel re muās ayŭh ka re kubur ayŭh. Ayŭh sadi adŭ so rawang Jeroboam adi re nakit dog kubur, sabab di ayŭh sadi adŭ TUHAN, adi Tapa Israel, munos asŭng-I.

¹⁴TUHAN re na ndi naan raja bada mritah Israel adi re matŭd taris asar pinyipritah Jeroboam.

¹⁵TUHAN re ngukum Israel; Israel re biguyut mun tŭngŭn reed biguyut di sungi. Ayŭh re dimbut daya Israel so tarun tana adi kana ati adi Ayŭh muko nggen di tayung-babuk ngara, ka Ayŭh re bada ngara papar sasah ndŭg pah majeh Yang Euphrates, sabab ngara bada Ayŭh baji darŭm ngara ndai tibudo tapa Asherah.

¹⁶TUHAN re tagan Israel sabab Jeroboam mbŭh bidosa ka mbŭh taban Israel bidosa.”

¹⁷Sawŭn Jeroboam pari ka Tirzah. Di jam ayŭh mŭrŭt ramin-i, anak-i kabŭs.

¹⁸Daya Israel muās ayŭh ka kubur ayŭh, nimun adi muko TUHAN nang so baba urun-I, nabi Ahijah.

¹⁹Sopŭrŭg kayuh adi Raja Jeroboam muko ndai, samŭn manang biperang ka munki ayŭh mritah, sopŭrŭg-i dog nuris darŭm Surat Dundan bara Raja Israel.

²⁰Jeroboam mritah 22 sawa. Ayŭh kabŭs ka dog kubur, ka anak-i Nadab gati ayŭh jadi raja.

²¹Anak Solomon, Rehoboam, mbŭh 41 sawa umbur-i kan ayŭh jadi raja Judah, ka mritah simŭng ju sawa di Jerusalem, kupo adi TUHAN muko mien so dudu tarun tana Israel ndu tarun yŭn Ayŭh dog nyambah. Sindŭ Rehoboam inŭh Naamah so Ammon.

²²Daya Judah mbŭh bidosa rawan TUHAN, ka mbŭh bada TUHAN baji di ngara amai pingandai ngara adi rabis arap so sopŭrŭg pingandai adi tayung-babuk ngara muko ndai.

²³ Ngara pijog tarun yŭn nyambah tapa-kadong, ka pijog uros uros-batuh ngga tandā tandā pinatŭng tapa Asherah di sandah ka di ribo tŭngŭn kayuh adi biyŭn sayung-i.

²⁴ Adi mbŭh rabis arap-i, agi bara dari ngga bara dayung adi jadi sundar di tarun tarun yŭn bisambah adat karŭm. Daya Judah mbŭh ndai barang masam kayuh adi nggen mangŭh adi dog ndai daya adi TUHAN muko pibu dawŭ-i so tarun tana anŭ darŭm daya Israel masang mŭrŭt-i.

²⁵Di sawa adi rimŭh darŭm pinyipritah Rehoboam, Raja Shishak so Egypt nyerang Jerusalem.

²⁶ Ayŭh tambit sopŭrŭg rata so Ramin TUHAN ngga so Istana, samŭn pinangin pinangin mas adi Solomon ko ndai.

²⁷Ngga gati-i, Raja Rehoboam ndai dudu pinangin so timaga ka bada-i dog jaga bara soldadu adi tukang jaga tiban istana.

²⁸Tiap kari raja di ka Ramin TUHAN, bara soldadu anŭ adi tukang jaga taban dudu pinangin anŭ, komŭnŭ pari-i ka birit daya adi tukang jaga.

²⁹Sopŭrŭg kayuh adi bŭkŭn adi Raja Rehoboam ndai mbŭh dog nuris darŭm Surat Dundan bara Raja Judah.

³⁰Darŭm tipuh anŭ Rehoboam ngga Jeroboam taŭn marar biperang ngga dingan-i.

³¹Rehoboam kabŭs ka dog kubur di kubur raja di Kupo David, ka anak-i Abijah gati ayŭh jadi raja.