Read Biatah Bidayuh 1 RAJA 15 Bible Online

1 RAJA 15 - Biatah Bidayuh bible

1 RAJA 15

¹Di sawa adi simŭng mai darŭm pinyipritah Raja Jeroboam di Israel, Abijah jadi raja di Judah.

²Ayŭh mritah taruh sawa di Jerusalem. Sindŭ-i Maacah, anak Absalom.

³Mun sama-i ayŭh bidosa ka dŭh tŭtŭd di TUHAN adi Tapa-i, dŭh mun babuk-i David.

⁴ Pak amai David, TUHAN adi Tapa-i nggen di Abijah anak dari adi re mritah gati ayŭh di Jerusalem ka bada Jerusalem pagŭng.

⁵ TUHAN ndai simŭnŭ sabab David muko ndai kayuh adi pimunos asŭng-I ka bŭn nyibireu pinyipesan-I, adŭ-i sarah-i di tunduh Uriah adi daya Hitti.

⁶Perang adi piguru di jaman Rehoboam ngga Jeroboam babŭ ndŭg jaman Abijah.

⁷Ka barang masam kayuh adi bŭkŭn adi Abijah ndai mbŭh dog nuris darŭm Surat Dundan bara Raja Judah.

⁸Abijah kabŭs ka dog kubur di Kupo David, ka anak-i Asa gati ayŭh jadi raja.

⁹Di sawa adi duwŭh puru darŭm pinyipritah Raja Jeroboam di Israel, Asa jadi raja di Judah.

¹⁰Ayŭh mritah 41 sawa di Jerusalem. Simbuk-i Maacah, anak Absalom.

¹¹Asa ndai kayuh adi pimunos asŭng TUHAN, nimun babuk-i David.

¹²Ayŭh taran so rais sopŭrŭg dari sundar ngga dayung sundar adi nyiraja di tarun yŭn bisambah adat karŭm. Ayŭh kadi gŭh sopŭrŭg tibudo adi raja raja adi diŭ so ayŭh mbŭh ndai.

¹³Ayŭh bisor gŭh simuk-i Maacah so pangkat-i adi jadi nyamba rani, sabab ayŭh muko ndai tibudo tapa Asherah, tapa pimuah. Asa tabŭng tibudo anŭ ka badang-i di rubān Kidron.

¹⁴Sunggu Asa dŭh nyirubuh sopŭrŭg tarun yŭn bisambah adat karŭm, ayŭh babŭ tŭtŭd di TUHAN sitŭkŭd udip-i.

¹⁵Ayŭh na di darŭm Ramin TUHAN sopŭrŭg kayuh adi sama-i mbŭh nitah ka Tapa, samŭn pingakas mas pirak adi adŭp-i mbŭh nitah.

¹⁶Raja Asa di Judah ngga Raja Baasha di Israel taŭn marar biperang ngga dingan-i sitŭkŭd pinyipritah ngara.

¹⁷Baasha nyerang Judah ka piguru ndai sindung kuta Ramah ngga nabat pimanu daya ruah mŭrŭt Judah.

¹⁸Jadi Raja Asa tambit sopŭrŭg pirak mas adi dog tingge di Ramin TUHAN ngga di istana, ka bada kada pinurung-i taban-i ka Damascus, ka yŭn Raja Benhadad di Syria, adi anak Tabrimmon ka sukuh Hezion, ngga pinganang sakati:

¹⁹“Ja ata bipambit, nimun sama ta dawŭ-i. Ati, pirak ngga mas, inŭh pinganggen ku di kuu. Madin matŭd pambit mu ngga Raja Baasha di Israel, isa ayŭh kadi bara soldadu-i so tarun tana ku.”

²⁰Raja Benhadad situju ngga pinganang Asa ka pait bara pingubak soldadu-i ngga bara soldadu ngara bada nyerang kupo kupo Israel. Ngara sirabut Ijon, Dan, Abel Beth Maacah, gadung tarun sindŭk Danu Galilee, ka sopŭrŭg tarun tana Naphtali.

²¹Kan Raja Baasha dingah kayuh adi mbŭh jadi, ayŭh ko ndai sindung kuta Ramah, rasu bu ka Tirzah.

²²Komŭnŭ Raja Asa nggen ukum di ndi tarun tana Judah bada barang naan daya, dŭh siŭn dŭh, tambit so Ramah dudu batuh ngga dudu betang kayuh adi Baasha pakai ngga ndai sindung kuta Ramah. Ngga preka piramin anŭ Asa ndai sindung kuta Mizpah ngga Geba, kupo di tarun tana daya tibaran-asar Benjamin.

²³Sopŭrŭg kayuh bŭkŭn adi Raja Asa ndai, pingandai-i adi pagan ka kupo kupo adi-i ndai sindung kuta-i, mbŭh sopŭrŭg dog nuris darŭm Surat Dundan bara Raja Judah. Pak kan ayŭh mbŭh minyamba ayŭh bajang bada andam kaja.

²⁴Asa kabŭs ka dog kubur di kubur raja di Kupo David, ka anak-i Jehoshaphat gati ayŭh jadi raja.

²⁵Di sawa adi duwŭh darŭm pinyipritah Raja Asa di Judah, anak Raja Jeroboam, Nadab, jadi raja di Israel, ka ayŭh mritah duwŭh sawa.

²⁶Mun sama-i, ayŭh bidosa rawan TUHAN ka mbŭh taban Israel bidosa.

²⁷Baasha anak Ahijah, so tibaran-asar Issachar, bipekat rawan Nadab ka siŭ ayŭh darŭm Nadab ngga bara soldadu-i aŭn nyikapung kupo Gibbethon di Philistia.

²⁸Kayuh anŭ jadi di sawa adi taruh darŭm pinyipritah Raja Asa di Judah. Ka Baasha meh gati Nadab jadi raja di Israel.

²⁹ Kan ayŭh mbŭh jadi raja, ayŭh rasu siŭ sopŭrŭg daya so rawang Jeroboam. Nanyam ka pinganang TUHAN so baba urun-I nabi Ahijah so Shiloh, sopŭrŭg daya so rawang Jeroboam dog siŭ; ndi naan mating gŭh udip.

³⁰Kayuh anŭ jadi simŭnŭ sabab Jeroboam bada TUHAN adi Tapa Israel baji, amai dosa adi-i ndai samŭn anŭ adi-i bada daya Israel ndai.

³¹Sopŭrŭg kayuh bŭkŭn adi Nadab ndai mbŭh dog nuris darŭm Surat Dundan bara Raja Israel.

³²Raja Asa di Judah ngga Raja Baasha di Israel taŭn marar biperang ngga dingan-i sitŭkŭd pinyipritah ngara.

³³Di sawa adi taruh darŭm pinyipritah Raja Asa di Judah, Baasha anak Ahijah jadi raja di ndi tarun tana Israel. Ayŭh mritah di Tirzah 24 sawa.

³⁴Mun Raja Jeroboam adi diŭ so ayŭh, ayŭh bidosa rawan TUHAN, ka mbŭh taban Israel bidosa.