Read Biatah Bidayuh 1 RAJA 16 Bible Online

1 RAJA 16 - Biatah Bidayuh bible

1 RAJA 16

¹TUHAN nang di nabi Jehu anak Hanani ka nggen di ayŭh pinganang ati yŭn Baasha:

²“Dawŭ-i kuu daya saja, pak Aku bada kuu jadi pinguru daya Ku Israel. Ka madin kuu mbŭh bidosa mun Jeroboam ka mbŭh taban daya Ku bidosa. Dosa ngara mbŭh bada Aku baji,

³ka sabab anŭ aku re kinanyap kuu ngga rawang mu, nimun adi muko Aku ndai di Jeroboam.

⁴Asi asi so rawang mu adi kabŭs darŭm kupo re dog man kasong, ka asi asi adi kabŭs di sapa rais re dog man manuk volcha.”

⁵Sopŭrŭg kayuh bŭkŭn adi Baasha ndai mbŭh dog nuris darŭm Surat Dundan bara Raja Israel.

⁶Baasha kabŭs ka dog kubur di Tirzah, ka anak-i Elah gati ayŭh jadi raja.

⁷Pinganang TUHAN pasar Baasha ngga rawang-i dog nggen nabi Jehu sabab dosa adi Baasha mbŭh ndai rawan TUHAN. Ayŭh bada TUHAN baji dŭh sabab pingandai arap-i mun Raja Jeroboam adŭ pak sabab ayŭh muko siŭ sopŭrŭg daya so rawang Jeroboam.

⁸Di sawa adi duwŭh puru-nŭm darŭm pinyipritah Raja Asa di Judah, Elah anak Baasha jadi raja di Israel. Ayŭh mritah di Tirzah duwŭh sawa.

⁹Zimri, ndi naan so bara pingubak soldadu-i adi tukang nguasa sitangah so dudu krita kuda raja, bipekat rawan ayŭh. Ndi andu di Tirzah, Elah mabuk di ramin Arza, adi tukang kingat kayuh di istana.

¹⁰Zimri mŭrŭt ramin anŭ, siŭ Elah, ka gati ayŭh jadi raja. Kayuh anŭ simŭnŭ darŭm sawa adi duwŭh puru-ju darŭm pinyipritah Raja Asa di Judah.

¹¹Kan ayŭh mbŭh jadi raja ayŭh rasu siŭ sopŭrŭg daya so rawang Baasha. Barang madis adi dari ka jerā dog siŭ gŭh.

¹²Sabab anŭ, nanyam ka kayuh adi TUHAN muko nang pasar Baasha so baba nabi Jehu, Zimri siŭ sopŭrŭg daya so rawang Baasha.

¹³Sabab pingandai nyambah tibudo ka mbŭh taban Israel bidosa, Baasha ngga anak-i Elah mbŭh bada TUHAN, adi Tapa Israel, baji.

¹⁴Sopŭrŭg kayuh bŭkŭn adi Elah ndai dog nuris darŭm Surat Dundan bara Raja Israel.

¹⁵Di sawa adi duwŭh puru-ju darŭm pinyipritah Raja Asa di Judah, Zimri mritah Israel di Tirzah ju andu. Bara soldadu daya Israel aŭn nyikapung kupo Gibbethon di Philistia,

¹⁶ka kan ngara dingah Zimri mbŭh bipekat rawan raja ka mbŭh siŭ ayŭh, di jam anŭ gŭh ngara bada pingibās ngara Omri jadi raja Israel.

¹⁷Omri ngga bara soldadu-i bu so Gibbethon di nyikapung Tirzah.

¹⁸Kan Zimri kiris kupo mbŭh dog ngarah, ayŭh mŭrŭt kuta adi tura ka darŭm istana, sigot istana samŭn adŭp-i.

¹⁹Kayuh anŭ jadi simŭnŭ sabab dosa-i adi rawan TUHAN. Mun Jeroboam raja adi ayŭh gati, ayŭh bada TUHAN baji ngga dosa adi-i mbŭh ndai ka sabab ayŭh gŭh taban Israel bidosa.

²⁰Sopŭrŭg kayuh bŭkŭn adi ayŭh ndai, samŭn pekat-i anŭ, mbŭh dog nuris darŭm Surat Dundan bara Raja Israel.

²¹Daya Israel mbŭh pape nyinuwŭh: kada so ngara raan bada Tibni anak Ginath jadi raja, adi bŭkŭn raan bada Omri.

²²Sikasŭn-i, ngara adi raan bada Omri manang; Tibni kabŭs ka Omri jadi raja.

²³Jadi di sawa adi taruh puru-ndi darŭm pinyipritah Raja Asa di Judah, Omri jadi raja di Israel. Ayŭh mritah duwŭh puru sawa. Nŭm sawa diŭ so anŭ ayŭh mritah di Tirzah,

²⁴ka komŭnŭ ayŭh miris sandah Samaria ngga rega 6,000 kiping pirak so ndi naan daya dŭn Shemer. Omri nyindung sandah anŭ ngga sindung kuta, pijog ndi kupo diginŭ, ka kadŭn-i Samaria, tarik dŭn Shemer, daya adi diŭ dapu sandah anŭ.

²⁵Omri bidosa rawan TUHAN rabis dŭ so raja raja adi diŭ so ayŭh.

²⁶Mun Jeroboam adi diŭ so ayŭh, ayŭh bada TUHAN, adi Tapa Israel, baji, amai dosa-i adi taban daya Israel nyambah tibudo.

²⁷Sopŭrŭg kayuh bŭkŭn adi Omri ndai ngga sopŭrŭg adi tungang-i pijadi mbŭh dog nuris darŭm Surat Dundan bara Raja Israel.

²⁸Omri kabŭs ka dog kubur di Samaria, ka anak-i Ahab gati ayŭh jadi raja.

²⁹Di sawa adi taruh puru-mai darŭm pinyipritah Raja Asa di Judah, Ahab anak Omri jadi raja Israel. Ayŭh mritah di Samaria duwŭh puru duwŭh sawa.

³⁰Ayŭh bidosa rawan TUHAN rabis dŭ so raja raja adi diŭ so ayŭh.

³¹Adi bada ayŭh rabis bidosa so Raja Jeroboam inŭh ayŭh sawŭn Jezebel, adi anak dayung Raja Ethbaal di Sidon, ka nyambah Baal.

³²Ayŭh pijog bari-sambah yŭn Baal di Samaria, ndai mija-sambah yŭn-i, ka na-i di darŭm bari-sambah anŭ.

³³Ayŭh gŭh pijog ndi uros gayŭn tapa Asherah. Ayŭh mbŭh bada TUHAN, adi Tapa Israel, baji, amai pingandai adi rabis arap so anŭ adi sopŭrŭg raja adi diŭ so ayŭh mbŭh ndai.

³⁴ Di jaman pinyipritah-i, Hiel so Bethel pari pijog Jericho. Nanyam adi muko TUHAN diŭ kidaan so baba Joshua anak Nun, anak pinuai Hiel adi dŭn Abiram kabŭs kan Hiel na pinagap-rasan kupo Jericho, ka anak sibusu-i Segub kabŭs kan ayŭh ndai tiban-bās kupo.