Read Biatah Bidayuh 1 RAJA 17 Bible Online

1 RAJA 17 - Biatah Bidayuh bible

1 RAJA 17

¹ Ndi naan nabi dŭn Elijah, so Tishbe di Gilead, nang di Raja Ahab, “Ngga adŭn TUHAN, Tapa Israel adi udip, adi aku yŭn bituan, aku kidaan di kuu re mating sipot-abun bait ujen sitŭkŭd duwŭh puan kah taruh sawa ndŭg ka andu adi ngga aku kidaan-i re agi.”

²Komŭnŭ TUHAN nang di Elijah,

³“Bu so tarun ati di ka timor ka bisukan di sungi Cherith, tura ka timor Jordan.

⁴Di sungi anŭ re agi piin nok yŭn mu, ka Aku re bada manuk kak taban pinguman yŭn mu diginŭ.”

⁵Elijah tunda pinganang TUHAN, ayŭh di ka rŭŭ di sungi Cherith.

⁶Ayŭh nok piin so sungi anŭ, ka manuk kak taban ruti ngga dagin barang andu ngga singumi andu.

⁷Mua tian ripas anŭ sungi anŭ badŭh sabab kurang ujen.

⁸Komŭnŭ TUHAN nang di Elijah,

⁹ “Di ka kupo Zarephath madin, sindŭk Sidon ka rŭŭ diginŭ. Aku muko pesan ndi naan dayung uban adi rŭŭ diginŭ bada nggen man di kuu.”

¹⁰Jadi Elijah di ka Zarephath, ka darŭm ayŭh mandŭg di tiban-bās kupo, ayŭh kiris ndi naan dayung uban ndu uwang. “Turung taban piin nok yŭn ku,” ayŭh nang di dayung anŭ.

¹¹Ka darŭm ayŭh panu di tambit-i, ayŭh bagan nang, “Ka turung gŭh taban ruti.”

¹²Ayŭh nam, “Ngga adŭn TUHAN adi udip adi Tapa mai, aku bipayu aku dŭh biyŭn ruti. Kaŭs aku biyŭn ndi agŭm tibaduk darŭm makuk ka nisit inyo kanā darŭm gabuk. Aku mandŭg kamati di ndu uwang re aku ngga sidia anŭ adi nisit yŭn anak ku ngga adŭp ku. Anŭ inŭh mbŭh sikasŭn pinguman ami, ka ripas anŭ kieh tatu re kabŭs sikirau.”

¹³“Dŭhnyah susah,” Elijah nang di ayŭh. “Panu di sidia pinguman ngan. Pak diŭ ndai ndi baru ruti adi siit so anŭ adi kuu biyŭn ka taban-i ka yŭn ku, ka komŭnŭ ndai adi bŭkŭn yŭn adŭp mu ngga anak mu.

¹⁴Amai anŭ inŭh kayuh adi TUHAN, adi Tapa Israel, nang: ‘Tibaduk dŭh re abo so darŭm makuk anŭ, ka inyo kanā gŭh dŭh re abo so darŭm gabuk anŭ diŭ so andu anŭ adi ngga TUHAN pait ujen.’ ”

¹⁵Dayung uban anŭ di ka ndai nimun adi Elijah mbŭh kidaan di ayŭh, ka sopŭrŭg ngara mbŭh biyŭn sadang pinguman yŭn barang andu.

¹⁶Nimun adi TUHAN muko bijanji so Elijah, tibaduk dŭh abo so darŭm makuk anŭ ka inyo kanā dŭh abo so darŭm gabuk anŭ.

¹⁷Kudu kudu andu ripas anŭ anak dayung uban anŭ mandam; andam-i anŭ dŭ dŭ sera, ka rango ayŭh kabŭs.

¹⁸Ayŭh nang di Elijah, “Daya Tapa, mani kaam ndai simuti di aku? Kaam mandŭg kamati batur bada Tapa rada dosa ku, ka anŭ meh sabab anak ku kabŭs?”

¹⁹“Taban ka yŭn ku anak mu anŭ,” Elijah nang. Ayŭh tambit anak anŭ so puko sindŭ-i, taban ayŭh ngga maad ka birit di yŭn rŭŭ di sambu, ka piguring ayŭh di ambok-i.

²⁰Komŭnŭ ayŭh bana bidua, “O TUHAN Tapa ku mani Kaam ndai simuti di dayung uban anŭ? Ayŭh muko raru kana mbŭh sita aku, ka madin Kaam siŭ anak-i!”

²¹ Komŭnŭ Elijah mutu nŭnggŭn pŭrŭng-i di tunduh anak anŭ pitaruh kari ka bidua, “O TUHAN Tapa ku, pari kudip anak ati!”

²²TUHAN nam dua Elijah; anak anŭ piguru ngasŭng dinge ka udip.

²³Elijah taban anak anŭ ka sagān ka yŭn sindŭ-i ka nang di ayŭh, “Tingga, udip anak mu!”

²⁴Ayŭh nam, “Madin aku puan nang kaam sawŭ daya Tapa ka TUHAN sawŭ minyu so kaam!”