Read Biatah Bidayuh 1 RAJA 18 Bible Online

1 RAJA 18 - Biatah Bidayuh bible

1 RAJA 18

¹Mua tian-i ripas anŭ, darŭm sawa adi taruh tipuh raga, TUHAN nang di Elijah, “Panu di bidapŭd ngga Raja Ahab, amai aku re pait ujen.”

²Jadi Elijah matak. Apag di Samaria mbŭh bisā,

³ka Ahab bagan Obadiah bada mŭrŭt, adi tukang kingat kayuh di istana. (Obadiah inŭh daya adi tŭtŭd nyambah TUHAN,

⁴ka di tika Jezebel siŭ bara nabi TUHAN, Obadiah tambit siratus naan ngara ka sukan ngara di tāng, ka kutung ngara duwŭh tibaran ngga rimŭh puru naan darŭm ndi tibaran, ka nggen man nok di ngara.)

⁵Ahab nang di Obadiah, “Ja ata di tingga[45] barang rubang piin ka barang dau di rais ati nang ka tungang kah dŭh ata dapŭd sadang kupai ngga kudip kuda ngga kuda pinakan kaldi. Kadŭ ata dŭhsah siŭ dāng ta.”

⁶Ngara situju gŭh birakang ka prisadi panu di parad tarun tana adi patut dog kasau ka pirasa.

⁷Darŭm Obadiah aŭn panu, ayŭh bidapŭd ngga Elijah. Ayŭh natŭng ayŭh, mutu ubak-i nura ayŭh, ka siken, “Kaam kah anŭ, tuan?”

⁸“Aku ati, Elijah,” ayŭh nam. “Panu di kidaan di raja adi tuan mu nang aku agi digiti.”

⁹Obadiah nam, “Ani anŭ adi mbŭh ku ndai adi bada kaam simuti ngga aku isa Raja Ahab siŭ aku?

¹⁰Ngga adŭn TUHAN adi udip, adi Tapa mai, aku bipayu raja mbŭh bada daya jiroh kaam di barang rais di ong. Kan pimritah di barang rais kidaan nang kaam mating di rais-i, Ahab siraru bada pimritah anŭ bipayu nang kaam sawŭ dŭh tungang dog dapŭd di rais-i.

¹¹Ka madin kaam bada aku di ka yŭn-i ka kidaan nang kaam agi digiti?

¹²Munki kambŭi roh TUHAN tambit ka taban kaam ka tarun adi dŭh daya puan, kan aku mbŭh matak. Komŭnŭ, kan aku kidaan di Ahab nang kaam agi digiti ka ayŭh dŭh tungang dapŭd kaam, ayŭh re siŭ aku. Ingat aku ati daya adi tŭtŭd nyambah TUHAN so aku gi-sŭ.

¹³Mating kah kaam dingah di andu Jezebel siŭ bara nabi TUHAN aku sukan siratus naan ngara di darŭm tāng, duwŭh tibaran ngga rimŭh puru naan darŭm ndi tibaran, ka nggen man nok di ngara?

¹⁴Jadi simuki kaam re bisa mritah aku bada di ka yun raja ka kidaan nang kaam agi digiti? Ayŭh tatu re siŭ aku!”

¹⁵Elijah nam, “Ngga adŭn TUHAN adi udip, adi yŭn ku bituan, aku bijanji aku re bidapŭd ngga raja andu ati.”

¹⁶Jadi Obadiah di ka yŭn Raja Ahab ka kidaan di ayŭh, ka Ahab matak di bidapŭd ngga Elijah.

¹⁷Kan Ahab kiris ayŭh, ayŭh nang, “Anŭ inŭh ayŭh, pimito di Israel!”

¹⁸“Aku dŭh pimito,” Elijah nam. “Kuu kidŭ-i. Kuu ngga sama mu. Kuu nyibireu pesan TUHAN ka nyambah tibudo Baal.

¹⁹Madin mritah sopŭrŭg daya Israel bada bidapŭd ngga aku di Darŭd Carmel. Taban 450 naan nabi Baal ngga 400 naan nabi tapa Asherah adi dog sita Rani Jezebel.”

²⁰Jadi Ahab bagan sopŭrŭg daya Israel ngga bara nabi Baal bada tikuruk di Darŭd Carmel.

²¹Elijah di ka yŭn bara daya ka nang, “Ndŭg sinde angān gibabŭ ndai pikir ngan? Kambŭi TUHAN inŭh Tapa, nyambah Ayŭh; pak kambŭi Baal inŭh Tapa, nyambah Baal!” Bara daya dŭh nang ani ani.

²²Komŭnŭ Elijah nang, “Dŭm aku sadi adŭ nabi TUHAN, pak digiti agi 450 naan nabi Baal.

²³Taban kamati duwŭh pŭrŭng dari sapi. Bada bara nabi Baal tambit ndi, siŭ ka natad-i, ka na-i di tunduh uwang -- pak dŭhnyah tung apui. Aku re ndai simŭnŭ gŭh ngga dari sapi anŭ ndi.

²⁴Komŭnŭ bada bara nabi Baal bidua ka tapa ngara, ka aku bidua ka TUHAN, ka sianŭ adi nggen apui ngga-i nam -- Ayŭh inŭh Tapa.” Bara daya situju.

²⁵Komŭnŭ Elijah nang di bara nabi Baal, “Amai angān mbŭh raru bagŭ, angān diŭ tambit dari sapi anŭ ka sidia-i. Bidua ka tapa ngan, pak dŭhnyah tung apui di tugung uwang anŭ.”

²⁶Ngara tambit dari sapi anŭ adi dog nggen di ngara, sidia-i, ka bidua ka Baal ndŭg kumbeng. Ngara nyirais, “Nam kieh, Baal!” buang birajang nganing mija-sambah adi ngara ko pijog. Pak mating pinyinam.

²⁷Ngga arong kumbeng Elijah piguru napat ngara: “Bana bidua! Ayŭh anŭ tapa! Kadŭ ayŭh nyipŭmŭh puan kah bijamban, puan kah di ka tarun bŭkŭn! Bŭŭs kani ayŭh. Angān an di kies ayŭh!”

²⁸Bara nabi anŭ bidua rabis bana buang nidi adŭp ngara ngga sinda ka bade, nanyam adat ngara, ndŭg ka deya ruah.

²⁹Ngara babŭ ndai simŭnŭ ndŭg ka yun kumbeng, pak mating pinyinam so tapa ngara; angū-i mating gŭh.

³⁰Komŭnŭ Elijah nang di bara daya, “Mandŭg kamati sindŭk aku,” ka ngara sopŭrŭg mbŭh tikuruk maning ayŭh. Ayŭh piguru pari pijog mija-sambah TUHAN adi muko dog nyirubuh.

³¹ Ayŭh tambit simŭng duwŭh batuh, ndi yŭn barang tibaran-asar adi simŭng duwŭh so asar bara anak Jacob, daya adi TUHAN muko kadŭn Israel.

³²Ngga dudu batuh anŭ ayŭh pari pijog mija-sambah ngga nyambah TUHAN. Ayŭh kareh anak parit maning-i, tŭrŭp sadang yŭn kurang rabis 14 lita piin.

³³Komŭnŭ ayŭh na uwang di tunduh mija-sambah anŭ. Ayŭh nang, “Ngisi pat tipayan ngga piin ka ren-i di tunduh sadis ngga uwang anŭ.” Ngara ndai nanyam adi dog kidaan,

³⁴Ayŭh nang, “Ndai dinge” -- ka ngara ndai dinge. “Ndai dŭm ndi sidah,” ayŭh nang -- ka ngara ndai gŭh simŭnŭ.

³⁵Piin aman maning mija-sambah ka ngisi parit anŭ.

³⁶Di tika adi ngga jugan sadis ripas kumbeng Nabi Elijah di ka mija-sambah ka bidua, “O TUHAN adi Tapa Abraham, Isaac, ngga Jacob, kiren madin adŭp Mai sawŭ Tapa Israel ka aku ati urun Mai adi ndai simuti so ka pesan Mai.

³⁷Nam aku, TUHAN, nam aku, isa bara daya ati puan nang Kaam, TUHAN inŭh Tapa, ka Kaam inŭh taban ngara ngga pari ka adŭp Mai.”[46]

³⁸TUHAN pait apui ka-i badang sadis, uwang, ngga batuh, ka nyau tana ka nyibadŭh piin di parit anŭ.

³⁹Kan bara daya kiris kayuh anŭ, ngara mŭŭb di tana ka nang, “TUHAN inŭh Tapa; TUHAN sadi adŭ Tapa!”

⁴⁰Elijah nggen ukum, “Nakap bara nabi Baal; dŭhnyah bada tadŭ tadŭ so ngara bu!” Bara daya nakap sopŭrŭg ngara, ka Elijah taban ngara ka Yang Kishon ka siŭ ngara.

⁴¹Komŭnŭ Elijah nang di Raja Ahab, “Madin, man meh. Aku dingah jawŭn ujen mbŭh sindŭk.”

⁴² Atan Ahab di man, Elijah maad ka tibung Darŭd Carmel, di yŭn-i mutu ubak-i rapat ndŭg karŭb-i.

⁴³Ayŭh nang di daya gaji-i, “Maad ka sambu ka tingga rawŭt ajeh.” Daya-gaji maad ka sambu ka kan-i pari, ayŭh nang, “Aku mating kiris ani ani.” Pitaruh kari Elijah bada ayŭh di tingga.

⁴⁴Adi pitaruh kari ayŭh pari, ayŭh nang, “Aku kiris abun adi siit, siit so tangan manusia, makat so rawŭt.” Elijah mritah dinge daya gaji-i, “Di ka yŭn Raja Ahab ka kidaan di ayŭh bada mŭrŭt krita kuda-i ka mari diŭ so ujen matŭn ayŭh.”

⁴⁵Dŭh tui rangit mbŭh singŭt bada kruman, sabak bangat poh, ka ujen bangat mbŭh piguru rabu. Ahab mŭrŭt krita kuda-i ka mari ka Jezreel.

⁴⁶TUHAN nguasa Elijah; ayŭh ngabŭt piraka-i di kupong-i ka bikaduh diŭ so Ahab ndi aran aran ndŭg Jezreel.