Read Biatah Bidayuh 1 RAJA 19 Bible Online

1 RAJA 19 - Biatah Bidayuh bible

1 RAJA 19

¹Raja Ahab kidaan di sawŭn-i Jezebel sopŭrŭg kayuh adi Elijah muko ndai ka munki ayŭh siŭ sopŭrŭg nabi Baal.

²Ayŭh pait pinganang ka Elijah: “Isa-i tapa siŭ aku kambŭi di andu sipagi aku dŭh ndai di kuu kayuh adi kuu mbŭh ndai di bara nabi anŭ.”

³Elijah mbŭh taru, ka bikaduh bu taru adŭp-i dog siŭ; ayŭh taban daya gaji-i di ka Beersheba di Judah. Tingge daya gaji-i diginŭ,

⁴ Elijah panu ndi andu andu di ka tarun tana-pajam. Ayŭh rŭŭ ka guru di sayung tŭngŭn kayuh ka mite adŭp-i kabŭs adŭ. “Dŭh aku tan, TUHAN,” ayŭh nang darŭm dua-i. “Tambit adŭ asŭng ku; mbŭh kana dŭ aku kabŭs!”

⁵Ayŭh guring di ribo tŭngŭn kayuh ka rasu bŭŭs. Gŭgŭh agi malaikat tama ayŭh ka nang, “Makat meh man.”

⁶Ayŭh tingga bait tauh-i, ka kiris ndi baru ruti ngga ndi gabuk piin sindŭk ubak-i. Ayŭh man ka nok, ka pari guring.

⁷Malaikat TUHAN pari ka kies ayŭh dinge, nang, “Makat ka man, isa kuu bake darŭm pimanu mu adi jo te.”

⁸Elijah makat, man ka nok, ka pinguman anŭ bada ayŭh sukup bake yŭn pimanu 40 andu nuju Sinai, darŭd kudus.

⁹Diginŭ ayŭh mŭrŭt ndi tāng ka nyirŭmŭn. Gŭgŭh TUHAN minyu ngga ayŭh, “Elijah, ani ndai mu diginŭ?”

¹⁰ Ayŭh nam, “TUHAN adi Tapa Bisa-pŭrŭg, aku siraru bituan di Kaam -- Kaam sadi adŭ. Pak daya Israel mbŭh miranggar simanya adi ngara mbŭh ndai ngga Kaam, nyirubuh mija-sambah Mai, ka siŭ sopŭrŭg nabi Mai. Dŭm aku sadi adŭ adi babŭ udip -- ka ngara suba an siŭ aku!”

¹¹“Panu di mijog nura Aku di tibung darŭd,” TUHAN nang di ayŭh. Komŭnŭ TUHAN murah ka bada sabak adi daras bana poh ka mire dudu sandah ka mape dudu batuh -- pak TUHAN mating di sabak anŭ. Sabak ko poh, ka rasu agi tana-bigugoh -- pak TUHAN mating di tana-bigugoh anŭ.

¹²Ripas tana-bigugoh, rasu agi apui -- pak TUHAN mating di apui anŭ. Ka ripas apui anŭ, rasu agi sak sirŭŭn sigayas.

¹³Kan Elijah dingah, ayŭh nutu jawin-i ngga jipo-i ka ruah ka sapa di mijog di rawa tāng. Ka agi sirŭŭn nang di ayŭh, “Elijah, ani ndai mu diginŭ!”

¹⁴Ayŭh nam, “TUHAN adi Tapa Bisa-pŭrŭg, aku mbŭh siraru bituan di Kaam -- Kaam sadi adŭ. Pak daya Israel mbŭh miranggar simanya adi ngara mbŭh ndai ngga Kaam, nyirubuh mija-sambah Mai, ka siŭ sopŭrŭg nabi Mai. Dŭm aku sadi adŭ adi babŭ udip -- ka ngara suba an siŭ aku.”

¹⁵ TUHAN nang, “Pari ka tarun tana-pajam sindŭk Damascus, komŭnŭ di mŭrŭt kupo ka nginyo Hazael bada jadi raja di Syria;

¹⁶ nginyo Jehu anak Nimshi bada jadi raja Israel, ka nginyo Elisha anak Shaphat so Abel Meholah bada gati kuu jadi nabi.

¹⁷Tadŭ tadŭ daya adi bu taru adŭp-i dog siŭ Hazael re dog siŭ Jehu, ka tadŭ tadŭ daya adi bu taru adŭp-i dog siŭ Jehu re dog siŭ Elisha.

¹⁸ Pak aku re kidŭm ju ribu naan daya udip di Israel -- sopŭrŭg ngara adi tŭtŭd di Aku ka adi dŭh mutu ubak-i ka Baal bait sium tibudo-i.”

¹⁹Elijah bu ka dapŭd Elisha aŭn majak ngga ndi kaban dari sapi. Di jawin-i agi simŭng-ndi tibaran, ka ayŭh majak ngga tibaran adi sikasŭn sundis. Elijah kadi jipo-i ka kasŭk-i di Elisha.

²⁰Elisha rasu tingge dudu sapi-i anŭ, bikaduh tudu Elijah, buang nang, “Bada aku di sium sindŭ sama ku, kidaan adŭp ku re panu ka komŭnŭ aku tunda kaam.” Elijah nam, “Bisa, panu pari. Aku dŭh kijaman kuu!”[47]

²¹Komŭnŭ Elisha di ka kaban dari sapi-i, siŭ-i, ka tanŭk dagin-i, pakai parang-punggo bajak ndu uwang. Ayŭh nggen dagin anŭ di bara daya, ka ngara man. Komŭnŭ ayŭh di tunda Elijah jadi pinurung-i.