Read Biatah Bidayuh 1 RAJA 20 Bible Online

1 RAJA 20 - Biatah Bidayuh bible

1 RAJA 20

¹Raja Benhadad so Syria nguruk sopŭrŭg soldadu-i, ka 32 naan raja adi bŭkŭn batu ayŭh ngga dudu kuda ngga krita kuda. Ayŭh matak, kirurung kupo Samaria, ka nyerang-i.

²Ayŭh pait bara pinyisung ka darŭm kupo bada bidapŭd ngga Raja Ahab adi raja Israel ka nang, “Raja Benhadad mite kuu nyerah

³di ayŭh pirak ngga mas, bara dayung mu ka bara anak mu adi siabo bake.”

⁴“Kidaan di tuan ku, Raja Benhadad, nang aku situju. Ayŭh siŭn tambit aku ngga sopŭrŭg kayuh adi aku dapu,” Ahab nam.

⁵Ripas anŭ bara pinyisung anŭ pari ka yŭn Ahab ngga pimite adi bŭkŭn so Benhadad: “Aku muko pait pinganang mite kuu nggen di aku pirak ngga mas, bara dayung mu ngga bara anak mu.

⁶Pak madin, aku re pait bara pinurung ku bada di grundak istana mu ngga ramin ramin pinurung mu, ka tambit sopŭrŭg kayuh adi ngara[48] nyirundeng brega. Ngara re agi diginŭ munti andu sipagi.”

⁷Raja Ahab bagan bada mŭrŭt sopŭrŭg pinguru rais ka nang, “Kiris ngan daya anŭ re pirabur ata. Ayŭh pait pinganang mite aku nggen bara sawŭn ngga bara anak ku, pirak ngga mas, ka aku situju.”

⁸Bara pinguru ngga bara daya nam, “Dŭhnyah piduri ayŭh; dŭhnyah nurut ayŭh.”

⁹Jadi Ahab nam bara pinyisung Benhadad, “Kidaan di tuan ku adi raja nang aku situju ngga sibungas pimite-i, pak aku dŭh situju ngga pimite-i adi numbor duwŭh.” Bara pinyisung anŭ bu ka komŭnŭ pari dinge ngga pinganang adi bŭkŭn

¹⁰so Benhadad: “Aku re taban sukup bagŭ soldadu ngga di nyirubuh kupo mu ka taban ngga bu rapuh rapuh-i ngga tangan ngara. Isa-i tapa tapa siŭ aku kambŭi aku dŭh ndai simŭnŭ!”

¹¹Raja Ahab nam, “Kidaan di Raja Benhadad nang soldadu adi sawŭ, minyu gambung ripas biperang, dŭh sibayuh biperang.”

¹²Benhadad kambat pinyinam Ahab darŭm ayŭh ngga bara pambit-i, bara raja adi bŭkŭn, nok di bari ngara. Ayŭh mritah bara soldadu-i bada sidia yŭn re nyerang kupo anŭ, ka ngara mbŭh rasu sidia.

¹³Atan anŭ, ndi naan nabi di tudu Raja Ahab ka nang, “TUHAN nang, ‘Dŭhnyah taru bara tibaran soldadu anŭ! Aku re bada kuu manang ngarah ngara andu ati, ka kuu re puan nang Aku ati TUHAN.’ ”

¹⁴“Asi re tukang nguru nyerang?” Ahab siken. Nabi anŭ nam, “TUHAN nang bara soldadu adi mara adi di ribo bara gabenor utung tarun tana rais re nguru.” “Asi re tukang piguru perang?” Ahab siken. “Kuu,” nabi anŭ nam.

¹⁵Jadi raja bagan sopŭrŭg bara soldadu adi mara adi di ribo bara pingibās utung tarun tana rais, 232 naan prungun ngara. Komŭnŭ ayŭh bagan sopŭrŭg bara tibaran soldadu, ka prungun ngara anŭ agi 7,000 naan.

¹⁶Serang anŭ piguru ngga arong yun kumbeng, darŭm Benhadad ngga bara pambit-i mbŭh mabuk di bari bari ngara.

¹⁷Bara soldadu adi mara anŭ masang diŭ. Bara adi tukang nyibatŭh adi dog pait Benhadad kidaan di ayŭh nang agi ndi tibaran soldadu mandŭg so Samaria.

¹⁸Ayŭh nggen ukum, “Nakap ngara ka dŭhnyah siŭ, bait-i ngara mandŭg an birawan puan kah an mite bidamai.”

¹⁹Bara soldadu adi mara anŭ nguru serang, dog tunda bara tibaran soldadu Israel,

²⁰ka barang naan siŭ sianŭ adi-i rawan. Bara daya Syria babak bu, dog tadak bara soldadu daya Israel, pak Benhadad bu nunggang kuda, ayō kada soldadu pinunggang kuda.

²¹Raja Ahab sua ruah, sirapas dudu kuda ngga krita krita kuda, ka bana ngarah bara soldadu daya Syria.

²²Komŭnŭ nabi anŭ di ka yŭn Raja Ahab ka nang, “Panu pari ka nyibake bara soldadu mu, ka bisatur nakit, sabab raja Syria re pari nyerang di tipuh bunga adi re.”

²³Bara pinurung Raja Benhadad nang di ayŭh, “Bara tapa Israel inŭh tapa darŭd, anŭ inŭh sabab bara daya Israel tungang ngarah ata. Pak ata tatu tungang ngarah ngara kambŭi ata biperang ngga ngara di rabak.

²⁴Madin, gati bara raja adi taruh puru-duwŭh naan anŭ ngga bara pingibās soldadu.

²⁵Komŭnŭ bagan bada tikuruk bara tibaran soldadu kiang anŭ adi mbŭh tingge kaam, ngga kuda kuda ka krita krita kuda adi kiang anŭ gŭh. Ata re rawan bara soldadu daya Israel di tarun tana rabak, ka kari ati ata re ngarah ngara.” Raja Benhadad situju ka tunda pinyitayan ngara.

²⁶Di tipuh bunga anŭ ndi, ayŭh bagan bara soldadu-i ka baris matak di ka kupo Aphek di nyerang bara daya Israel.

²⁷Bara soldadu daya Israel mbŭh dog bagan ka mbŭh sidia ngga pingakas perang. Ngara baris ruah ka bibari ngga duwŭh tibaran nura bara soldadu daya Syria. Bara soldadu daya Israel mun duwŭh anak kaban kambing dog danding ngga bara soldadu daya Syria, adi mbŭh muno sapa tarun tana rais.

²⁸Ndi naan nabi di ka yŭn Raja Ahab ka nang, “Ati inŭh kayuh adi TUHAN nang: ‘Sabab daya Syria nang Aku tapa sandah ka dŭh tapa rabak, Aku re nggen pimanang di angān ngarah bara tibaran soldadu ngara, ka kuu ngga daya mu re puan nang Aku ati TUHAN.’ ”

²⁹Ju andu soldadu daya Syria ngga soldadu daya Israel rŭŭ di bari ngara, nura dingan-i. Di andu adi ju ngara piguru bisaad, ka soldadu daya Israel siŭ siratus ribu daya Syria.

³⁰Adi dŭm babak bu di ka kupo Aphek, di yŭn sindung kupo tumbang nyatŭk ngara. Benhadad gŭh bu di ka kupo anŭ ka bisukan darŭm birit tura ka punok ndi ramin.

³¹Bara pinurung-i di ka yŭn-i ka nang, “Kieh dingah raja raja daya Israel biyŭn pinyirasi. Nyibandar kieh di ka yŭn raja Israel ngga banang guni dog marut di kupong ami ka taris ngarung tungo ami, amai kadŭ ayŭh dŭh re siŭ kaam.”

³²Jadi ngara marut banang guni di kupong ngara ka taris dog ngarung di tungo ngara, rasu di ka yŭn Ahab ka nang, “Urun mai Benhadad mite kaam masi di adŭp-i ka dŭh siŭ ayŭh.” Ahab nam, “Gibabŭ udip kah ayŭh? Kana! Ayŭh inŭh keya ka jurud di aku!”

³³Bara pinurung Benhadad aŭn kajŭn tandā adi kana, ka kan Ahab nang “jurud”, ngara rasu bidigŭng di pinganang anŭ, ka nang, “Sak adi nang mai, Benhadad inŭh jurud mai!” “Taban ayŭh ka yŭn ku,” Ahab mritah ngara. Kan Benhadad mandŭg, Ahab bagan ayŭh bada maad krita kuda ngga ayŭh.

³⁴Benhadad nang di ayŭh, “Aku re pari nggen di kuu kupo kupo adi sama ku muko tambit so sama mu, ka kuu bisa gŭh pijog yŭn adŭp mu ndi tarun yŭn bidagang di Damascus, nimun anŭ adi sama ku muko pijog di Samaria.” Ahab nam, “Amai-i simŭnŭ garang, aku re pirupas kuu.” Ayŭh ndai pekat-damai ngga ayŭh ka bada ayŭh matak.

³⁵So ka pesan TUHAN ndi naan so tibaran nabi mritah ndi naan so adŭp ngara bada mukong adŭp-i. Pak ayŭh abah,

³⁶ jadi ayŭh nang di ayŭh, “Sabab kuu mbŭh nyibireu pesan TUHAN, singah re siŭ kuu kan kuu mbŭh bu so yŭn ku.” Ka kan ayŭh bu, singah rasu mandŭg ka siŭ ayŭh.

³⁷Komŭnŭ nabi adi diŭ anŭ di ka yŭn daya bŭkŭn ka nang, “Mukong aku!” Daya anŭ sawŭ ndai simŭnŭ; ayŭh bana mukong ayŭh ndŭg ka ayŭh mandam.

³⁸Nabi anŭ marut jawin-i ngga banang, ngga nyibabā adŭp-i, di mijog di bŭngŭn aran, kajŭn raja Israel murah.

³⁹Darŭm raja Israel murah, nabi anŭ bagan ka nang, “Tuan Raja, aku agi sua biperang kan ndi naan soldadu taban ka yŭn ku pinganyu adi mbŭh dog nakap ka nang, ‘Jaga daya ati; kambŭi ayŭh rupas, kuu re tanggong ngga asŭng adŭp mu, puan kah bayar ukum taruh ribu kiping pirak.’

⁴⁰Pak aku raru dŭh paya bada kayuh bŭkŭn, ka daya anŭ rupas.” Raja nam, “Kuu mbŭh nggen ukum di adŭp mu, ka kuu re bayar ukum anŭ.”

⁴¹Komŭnŭ nabi anŭ nyiratak banang anŭ so jawin-i, ka nganŭ raja rasu natŭng ayŭh ndi naan so bara nabi.

⁴²Nabi anŭ nang di raja, “Ati inŭh pinganang TUHAN: ‘Sabab kuu bada daya anŭ rupas adi Aku bada kuu siŭ, kuu re bayar ngga asŭng adŭp mu, ka bara tibaran soldadu mu re dog pirabur amai muko bada bara tibaran soldadu-i rupas.’ ”

⁴³Raja pari ka Samaria, susah buang bipito.