Read Biatah Bidayuh 1 RAJA 21 Bible Online

1 RAJA 21 - Biatah Bidayuh bible

1 RAJA 21

¹Sindŭk istana Raja Ahab di Jezreel agi ndi teya anggor adi dog dapu ndi naan daya dŭn Naboth.

²Ndi andu Ahab nang di Naboth, “Bada aku dapu teya anggor mu. Teya anggor mu sindŭk istana ku, ka aku raan pakai-i ndu teya kudos. Aku bisa nggen di kuu teya anggor adi kana dŭ, puan kah, kambŭi kuu raan, aku bisa bayar kuu ngga rega adi patut.”

³“Aku dapu teya anggor ati so tayung-babuk ku,” Naboth nam. “TUHAN kijaman aku nggen kayuh rawang ku di kaam!”

⁴“Ahab maad, susah buang tuas amai kayuh adi Naboth mbŭh nang di ayŭh. Ayŭh guring di ambok, nura sindung, ka dŭh raan man.

⁵Sawŭn-i Jezebel tudu ayŭh ka siken, “Mani kuu raru susah? Mani kuu abah man?”

⁶Ayŭh nam, “Sabab kayuh adi Naboth nang di aku. Aku mite adŭp ku miris teya anggor-i, puan kah, kambŭi ayŭh raan, nggen di ayŭh adi bŭkŭn ngga gati-i, pak ayŭh kidaan di aku nang aku dŭh siŭn dapu-i!”

⁷“Kuu ati raja kah ani?” Jezebel nam. “Makat so ambok, bada sanang asŭng mu ka nŭŭh di man. Aku re tambit yŭn mu teya anggor Naboth!”

⁸Komŭnŭ ayŭh nuris kada surat, na tandā tangan-i di tunduh dŭn Ahab, sagan chop tandā-i dieh, ka pait-i ka bara pinurung rais ngga bara pingibās di kupo Jezreel.

⁹Surat anŭ nang: “Kidaan di sopŭrŭg daya bada bipusa ndi andu, bagan bara daya bada tikuruk, ka nggen di Naboth yŭn guru adi dog stabi.

¹⁰Bada duwŭh taruh naan daya adi arap nyarah ayŭh amai mbŭh mangu Tapa ngga raja. Komŭnŭ taban ayŭh ka sapa kupo ka manjan ayŭh ngga batuh ndŭg kabŭs.”

¹¹Bara pinurung anŭ ngga bara pingibās di kupo Jezreel ndai nimun adi Jezebel mbŭh pesan.

¹²Ngara kidaan di bara daya bada bipusa ndi andu, bagan bara daya bada tikuruk, ka nggen di Naboth yŭn guru adi dog stabi.

¹³Duwŭh naan daya adi arap anŭ nyarah ayŭh di sirung jawin daya bagŭ, nang ayŭh mbŭh mangu Tapa ngga raja, ka ayŭh meh dog taban ka sapa kupo ka dog manjan ngga batuh ndŭg kabŭs.

¹⁴Pinganang dog pait ka Jezebel: Naboth mbŭh kabŭs.”

¹⁵Kan Jezebel mbŭh kambat pinganang anŭ, ayŭh nang di Ahab, “Naboth mbŭh kabŭs. Panu meh di dapu teya anggor anŭ adi ayŭh abah jua di kuu.”

¹⁶Jam anŭ gŭh Ahab di ka teya anggor anŭ di dapu-i.

¹⁷Komŭnŭ TUHAN nang di Elijah, nabi so Tishbe,

¹⁸“Di ka yŭn Raja Ahab di Samaria. Kuu re dapŭd ayŭh di teya anggor Naboth, re dapu teya anggor anŭ.

¹⁹ Kidaan di ayŭh Aku adi TUHAN, nang di ayŭh, ‘Muko siŭ daya, kuu re dapu gŭh kah rata-i?’ Kidaan di ayŭh ati pinganang Ku: ‘Di tarun yŭn kasong nyarek deya Naboth diginŭ gŭh-i re nyarek deya mu!’ ”

²⁰Kan Ahab kiris Elijah, ayŭh nang, “Madin kuu mbŭh dapŭd aku, pinganyu!” “Sawŭ,” Elijah nam. “Kuu mbŭh siraru ndai sarah di sirung jawin TUHAN.

²¹Jadi TUHAN nang di kuu, ‘Aku re taban pinyirusag ka kuu. Aku re ngukum kuu. Aku re siŭ kuu ngga barang naan anak dari di rawang mu, mara bait tuuh.

²²Rawang mu re mun rawang Raja Jeroboam anak Nebat ka mun rawang Raja Baasha anak Ahijah, sabab kuu mbŭh bada Aku baji darŭm kuu taban daya Israel bidosa.’

²³ Ka pasar Jezebel, TUHAN nang kasong re man tadang-i di kupo Jezreel.

²⁴Tadŭ tadŭ so madis mu adi kabŭs darŭm kupo re dog man kasong, ka tadŭ tadŭ so ngara adi kabŭs di sapa rais re dog man manuk volcha.”

²⁵(Mating daya bŭkŭn mbŭh ndai sarah di sirung jawin TUHAN mun Ahab -- sopŭrŭg anŭ mbŭh so ka pingasu sawŭn-i Jezebel.

²⁶Sarah-i adi raru sipŭ inŭh ayŭh nyambah tibudo, mun daya Amor, adi TUHAN muko pibu so tarun tana anŭ darŭm daya Israel masang mŭrŭt dawŭ-i.)

²⁷Kan Elijah muko minyu, Ahab nyiratak piraka-i, pirukos-i, ka kasŭk banang guni. Ayŭh abah man, ka bŭŭs nēn banang guni, ka panu susah buang bipito.

²⁸TUHAN nang di nabi Elijah,

²⁹“Kiris mu kah munki Ahab pirapat adŭp-i di sirung jawin Ku? Amai ayŭh mbŭh mun anŭ, Aku dŭh re taban pinyirusag di tunduh-i sitadŭn ayŭh udip; pak di jaman anak-i Aku re taban pinyirusag ka rawang-i.”