Read Biatah Bidayuh 1 RAJA 22 Bible Online

1 RAJA 22 - Biatah Bidayuh bible

1 RAJA 22

¹Israel ngga Syria bidamai sitŭkŭd duwŭh sawa,

²pak di sawa adi taruh Raja Jehoshaphat so Judah matak di bidapŭd ngga Raja Ahab so Israel.

³Ahab siken bara pinurung-i, “Mani ata gi-mating ndai ani ani ngga tambit pari Ramoth di Gilead so raja Syria? Ramoth inŭh tung jata!”

⁴Ahab siken Jehoshaphat, “An kah kuu matak ngga aku di nyerang Ramoth?” “Aku mbŭh sidia kambŭi kuu ngaja,” Jehoshaphat nam, “ka simŭnŭ gŭh bara soldadu ku ngga bara soldadu ku adi pinunggang kuda.

⁵Pak ata an diŭ bisiken ngga TUHAN.”

⁶Jadi Ahab bagan bara nabi bada mŭrŭt, agi 400 naan ngara, ka siken ngara, “Patut kah aku di nyerang Ramoth?” “Nyerang nŭh,” ngara nam. “TUHAN re nggen di kaam pimanang.”

⁷Pak Jehoshaphat siken, “Mating kah nabi adi bŭkŭn adi so ta bisa bisiken ngga TUHAN?”

⁸Ahab nam, “Agi dŭm ndi naan, Micaiah anak Imlah. Pak aku tiru di ayŭh, sabab ayŭh bŭn minyu-binabi pasar kayuh adi kana yŭn ku. Taŭn-i marar kayuh adi arap adŭ.” “Kuu dŭh patut minyu sakanŭ!” Jehoshaphat nam.

⁹Komŭnŭ Ahab bagan pinurung istana ka kidaan di ayŭh bada rikas di bagan Micaiah.

¹⁰Ngara duwŭh, nēn piraka raja ngara, guru di takta ngara di tarun yŭn daya ngiik di sapa tiban-bās kupo Samaria, ka sopŭrŭg nabi anŭ minyu-binabi nura ngara.

¹¹Ndi naan so ngara, Zedekiah anak Chenaanah, ndai ndi tanduk basi ka nang di Ahab, “Ati kayuh adi TUHAN nang: ‘Ngga ati kuu re rawan daya Syria ka batur batur ngarah ngara.’ ”

¹²Sopŭrŭg nabi anŭ nang sakanŭ. “Matak di nyerang Ramoth ka angān re manang,” ngara nang, “TUHAN re nggen di angān pimanang.”

¹³Atan anŭ, pinurung adi mbŭh matak di bagan Micaiah nang di ayŭh, “Sopŭrŭg nabi adi bŭkŭn mbŭh minyu-binabi pasar pimanang raja, ka kaam patut gŭh nang sakanŭ.”

¹⁴Pak Micaiah nam, “Ngga adŭn TUHAN adi udip aku bijanji aku re nang kayuh adi Ayŭh bada aku nang!”

¹⁵Kan ayŭh mbŭh mandŭg ka yŭn Raja Ahab, raja siken ayŭh, “Micaiah, patut kah kieh duwŭh Raja Jehoshaphat matak di nyerang Ramoth?” “Nyerang nŭh!” Micaiah nam. “Sawŭ kuu re manang. TUHAN re nggen pimanang di kuu.”

¹⁶Pak Ahab nam, “Kan kuu minyu ngga aku ngga adŭn TUHAN, kidaan nŭh kayuh adi sawŭ! Pikudu kari aku kidaan di kuu?”

¹⁷ Micaiah nam, “Aku kiris bara tibaran soldadu Israel basak basik di arong dudu sandah mun dudu biri dŭh biyŭn pingingat-biri. Ka TUHAN nang, ‘Ngara dŭh biyŭn pinguru; bada ngara mari ngga siramat.’ ”

¹⁸Ahab nang di Jehoshaphat, “Dŭh kah aku muko kidaan di kuu nang ayŭh bŭn minyu-binabi pasar kayuh adi kana yŭn ku? Taŭn-i marar kayuh adi arap adŭ!”

¹⁹ Micaiah pijuu nang: “Madin dingah kayuh adi TUHAN nang! Aku kiris TUHAN guru di takta-I di shorga, ngga sopŭrŭg malaikat-I mijog sindŭk Ayŭh.

²⁰TUHAN siken, ‘Asi re kadong Ahab isa ayŭh matak ka dog siŭ di Ramoth?’ Kada malaikat nang ndi masam kayuh, ka adi bŭkŭn nang kayuh bŭkŭn,

²¹ndŭg ka ndi naan roh di ka jawin, tudu TUHAN, ka nang, ‘Aku re kadong ayŭh.’

²²‘Munki?’ TUHAN siken. Roh anŭ nam, ‘Aku re di ka bada bara nabi Ahab kadong ayŭh.’ TUHAN nang, ‘Panu di kadong ayŭh. Sawŭ kuu re tungang kadong ayŭh.’ ”

²³Ka Micaiah kubo pinganang-i: “Ati kayuh adi mbŭh jadi. TUHAN mbŭh bada bara nabi mu kadong kuu. TUHAN mbŭh natu kuu re dog nyatŭk pinyirusag!”

²⁴Komŭnŭ nabi Zedekiah tudu Micaiah, napar jawin-i, ka siken, “So sinde roh TUHAN mbŭh bu so aku ka minyu di kuu?”

²⁵“Kuu re puan di andu kuu di bisukan di birit tura ka punok,” Micaiah nam.

²⁶Komŭnŭ Raja Ahab mritah ndi naan so bara pingubak soldadu-i, “Nakap Micaiah ka taban ayŭh ka yŭn Amon, gabenor kupo, komŭnŭ di ka Anak-raja Joash.

²⁷Kidaan di ngara bada na ayŭh darŭm jer ka nggen di ayŭh ruti ngga piin ndŭg ka aku mbŭh pari ngga siramat.”

²⁸“Kambŭi kaam pari ngga siramat” Micaiah nang, “rati-i TUHAN mating minyu so aku!” Ka ayŭh pijuu nang, “Dingah, sopŭrŭg ngan, kayuh adi aku mbŭh nang!”

²⁹Komŭnŭ Raja Ahab so Israel ngga Raja Jehoshaphat so Judah di nyerang kupo Ramoth di Gilead.

³⁰Ahab nang di Jehoshaphat, “Darŭm ata matak di biperang, aku re nyibabā adŭp ku, pak kuu nēn piraka raja mu.” Jadi raja Israel nyibabā adŭp-i darŭm-i matak di biperang.

³¹Raja so Syria muko nggen ukum bada 32 naan pingubak krita krita kuda-i nyerang kaŭs-i raja Israel.

³²Jadi kan ngara kiris Raja Jehoshaphat, ngara sopŭrŭg pikir anŭ raja Israel, jadi ngara nyerang ayŭh. Pak kan ayŭh nyirais,

³³ngara rada anŭ dŭh raja Israel, ka ngara dŭh nyerang ayŭh.

³⁴Tipia, ndi naan soldadu daya Syria nimbak reja-panah ka dog Raja Ahab, tambus asah tubu piraka perang-i. “Aku mbŭh biragan!” ayŭh nang di sianŭ adi tukang pimanu krita kuda-i. “Biruit ka bu so yŭn biperang ati!”

³⁵Atan bisaad anŭ, Raja Ahab babŭ di krita kuda-i, nura bara soldadu daya Syria. Deya so tawan-i aman ka misa rasan krita kuda, ka ngga arong singumi andu ayŭh kabŭs.

³⁶Sindŭk singumi andu pinganang mbŭh dog nggen di barang naan soldadu samŭn bara pingubak: “Barang naan soldadu siŭn mari ka rais ngga kupo adŭp-i!”

³⁷Jadi Raja Ahab meh mbŭh kabŭs. Tadang-i dog taban ka Samaria ka dog kubur.

³⁸Krita kuda-i dog ngu di pagong di Samaria, di yŭn kasong nyarek deya-i ka di yŭn dayung sundar mamuh, sak adi nang TUHAN.

³⁹Sopŭrŭg kayuh bŭkŭn adi Raja Ahab ndai, samŭn dundan pasar istana-i adi dog ngabuh ngga bŭbŭt gajah ka kupo kupo adi-i pijog, mbŭh dog nuris darŭm Surat Dundan bara Raja Israel.

⁴⁰Kan ayŭh mbŭh kabŭs anak-i Ahaziah gati ayŭh jadi raja.

⁴¹Di sawa adi pat darŭm pinyipritah Raja Ahab di Israel, Jehoshaphat anak Asa jadi raja di Judah

⁴²kan umbur-i 35 sawa. Ayŭh mritah Jerusalem 25 sawa. Sindŭ-i Azubah, anak Shilhi.

⁴³Mun sama-i Asa adi diŭ so ayŭh, ayŭh ndai kayuh adi batur di batuh TUHAN; pak tarun yŭn bisambah dŭh dog nyirubuh, ka daya gibabŭ jugan sadis ka badang kimanyan dieh.

⁴⁴Jehoshaphat bidamai ngga raja Israel.

⁴⁵Sopŭrŭg kayuh bŭkŭn adi Jehoshaphat mbŭh ndai, sopŭrŭg kraja pagan-i ngga perang-i, mbŭh dog nuris darŭm Surat Dundan bara Raja Judah.

⁴⁶Ayŭh siŭ sopŭrŭg dari ngga dayung sundar adi nyiraja di yŭn bisambah adat karŭm adi dŭm so jaman sama-i Asa.

⁴⁷Tarun tana Edom dŭh biyŭn raja. Tarun tana anŭ dog mritah pinurung adi dog tijuan raja di Judah.

⁴⁸Raja Jehoshaphat ndai dudu kapar ngga birayar di rawŭt bās pakai ngga di ka Ophir di tambit mas; pak kapar kapar anŭ rusak di Eziongeber ka bŭn-i birayar.

⁴⁹Komŭnŭ Raja Ahaziah so Israel mite bara daya-i birayar ngga daya Jehoshaphat, pak Jehoshaphat abah.

⁵⁰Jehoshaphat kabŭs ka dog kubur di kubur raja di Kupo David, ka anak-i Jehoram gati ayŭh jadi raja.

⁵¹Di sawa adi simŭng ju darŭm pinyipritah Raja Jehoshaphat di Judah, Ahaziah anak Ahab jadi raja di Israel. Ayŭh mritah di Samaria duwŭh sawa.

⁵²Ayŭh bidosa rawan TUHAN, tunda arap sama-i Ahab, sindŭ-i Jezebel, ka Raja Jeroboam, adi taban Israel bidosa.

⁵³Ayŭh nyambah ka bituan di Baal, ka mun sama-i adi diŭ so ayŭh, ayŭh bada TUHAN, adi Tapa Israel, baji.