Read Biatah Bidayuh 1 RAJA 4 Bible Online

1 RAJA 4 - Biatah Bidayuh bible

1 RAJA 4

¹Solomon jadi raja yŭn sopŭrŭg tarun tana rais Israel,

²ka ati inŭh bara pinurung-i: Imam: Azariah anak Zadok

³Bara tukang pinuris-i: Elihoreph ngga Ahijah, anak anak Shisha Adi tukang jaga rekod: Jehoshaphat anak Ahilud

⁴Pingibās bara soldadu: Benaiah anak Jehoiada Imam: Zadok ngga Abiathar

⁵Pingubak Gabenor utung tarun tana: Azariah anak Nathan Tukang Pitayan Raja: Imam Zabud anak Nathan

⁶Adi tukang nguasa daya daya-gaji istana: Ahishar Adi tukang jaga kraja takan: Adoniram anak Abda

⁷Solomon tijuan simŭng duwŭh naan daya jadi gabenor utung tarun tana di Israel. Ngara tukang piruah biranja so tarun tana adŭp ngara yŭn raja ngga rawang-i. Barang naan tanggong biranja yŭn ndi buran darŭm ndi sawa.

⁸Ati inŭh dŭn dŭn ngara adi simŭng duwŭh naan ngga utung tarun tana adi ngara nguasa: Benhur: rais tarun tana sandah Ephraim

⁹Bendeker: Kupo Makaz, Shaalbim, Beth Shemesh, Elon, ngga Beth Hanan

¹⁰Benhesed: kupo Arubboth ngga Socoh ngga sopŭrŭg tarun tana Hepher

¹¹Benabinadab, adi sawŭn anak dayung Solomon Taphath: Ndi tarun tarun gadung Dor

¹²Baana anak Ahilud: kupo Taanach, Megiddo, ngga sopŭrŭg gadung tarun sindŭk Beth Shan, sindŭk kupo Zarethan, tura ka siratan kupo Jezreel, jeh ndŭg kupo Abel Meholah ngga kupo Jokmeam

¹³Bengeber: kupo Ramoth di Gilead, ngga anak anak kupo di Gilead adi dog dapu manak Jair, sesang Manasseh, ka gadung Argob di Bashan; nŭm puru kupo adi bayah sopŭrŭg-i, bisindung kuta ka ngga parang timaga di tiban tiban-bās kupo

¹⁴Ahinadab anak Iddo: utung tarun tana Mahanaim

¹⁵Ahimaaz, adi sawŭn Basemath, ndi dinge anak Solomon: tarun tana Naphtali

¹⁶Baana anak Hushai: gadung tarun Asher ngga kupo Bealoth

¹⁷Jehoshaphat anak Paruah: tarun tana Issachar

¹⁸Shimei anak Ela: tarun tana Benjamin

¹⁹Geber anak Uri: gadung Gilead, adi muko dog mritah Raja Sihon daya Amor ngga Raja Og daya Bashan Ripas so ngara anŭ adi simŭng duwŭh naan, agi ndi naan adi gabenor adi tukang jaga ndi tarun tarun tana anŭ.

²⁰Daya Judah ngga daya Israel mbŭh raru bagŭ, keya ka sumat di pang rawŭt; ngara man, nok, buang gaŭn.

²¹ Pritah Solomon nyinŭn sopŭrŭg bangsa piguru so Yang Euphrates ndŭg Philistia ngga baat Egypt. Ngara bayar suke di ayŭh ka nundok di ayŭh sitŭkŭd umbur-i.

²²Pinguman adi Solomon biguna barang andu inŭh 5,000 lita tibaduk adi anŭk ka 10,000 lita tibaduk adi kasar;

²³simŭng pŭrŭng sapi adi dog paan di kandang, ka duwŭh puru sapi adi man di tana kupai, ka siratus pŭrŭng biri, ngga peyu, jerak, dari peyu raking, ngga siok.

²⁴Solomon mritah ndi tarun tana tura ka barat Yang Euphrates, so Tiphsah di Euphrates jeh ndŭg barat kupo Gaza. Sopŭrŭg raja adi di tura ka barat Euphrates mbŭh di ribo-i, ka ayŭh bidamai ngga sopŭrŭg rais adi maning ayŭh.

²⁵Sitŭkŭd ayŭh udip, daya di Judah ngga di Israel udip ngga siramat, barang rawang biyŭn teya anggor ngga risŭn ara adŭp-i.

²⁶ Solomon biyŭn 40,000 kandang yŭn nyikŭn kuda kuda krita kuda-i ngga 12,000 kuda yŭn soldadu pinunggang kuda.

²⁷Simŭng duwŭh naan gabenor-i, masin masin nanyam buran adi mbŭh dog natu yŭn-i, piruah biranja yŭn Raja Solomon samŭn sopŭrŭg adi man di istana; ngara ari piruah sopŭrŭg-i ngga sukup.

²⁸Barang naan gabenor piruah so utung adŭp-i jeri ngga siriyang, di yŭn-i dog biguna[9] yŭn kuda kuda krita kuda ka di tadŭ yŭn pinguman dāng dog biguna.

²⁹Tapa nggen di Solomon pinyibijak ngga pinyipitar adi saruh, ka pinyipuan adi dŭh tungang dog kira.

³⁰Solomon bijak dŭ so daya bijak di Timor puan kah so daya bijak di Egypt.

³¹ Ayŭh adi siabo bijak so sopŭrŭg daya: bijak dŭ so Ethan daya Ezrah, so Heman, so Calcol ngga Darda, adi anak anak Mahol, ka ayŭh mbŭh timagah di barang rais adi maning ayŭh.

³² Ayŭh nimbur 3,000 pinganang pitas ka siribu rabis ragu.

³³Ayŭh minyu pasar tŭngŭn tŭngŭn kayuh ngga anak anak kayuh-udip, piguru so sedar Lebanon ndŭg hyssop adi timbu di sindung; ayŭh minyu pasar dāng, manuk, dāng adi bigawang, ka iken.

³⁴Bara Raja di ndi ong ong dingah pasar pinyibijak-i ka pait daya bada dingah ayŭh.