Read Biatah Bidayuh 1 RAJA 6 Bible Online

1 RAJA 6 - Biatah Bidayuh bible

1 RAJA 6

¹Pat ratus mai puru sawa ripas daya Israel bu so Egypt, darŭm sawa adi pat di jaman pinyipritah Solomon di Israel, ngga buran adi duwŭh, buran Ziv, Solomon piguru nyiraja pijog Ramin TUHAN.

²Tura ka darŭm, anjong-i 27 mita, buka-i 9 mita, ka bigatung-i 13.5 mita.

³Birit-mŭrŭt inŭh 4.5 mita ambu-i, 9 mita buka-i, nyimati ngga buka adŭp Ramin anŭ.

⁴Sindung Ramin anŭ biyŭn bagŭ pinjan dieh, masip tura ka sapa so anŭ adi tura ka darŭm.

⁵Di sapa sindung, tigang ngga punok Ramin TUHAN, mbŭh dog pijog birit birit anjung adi taruh takah bigatung-i -- barang takah agi 2.2 mita bigatung.

⁶Barang birit di takah sagān agi 2.2 mita buka-i, barang birit di takah rapŭt agi 2.7 mita buka-i, ka barang birit di takah sambu agi 3.1 mita buka-i. Sindung Ramin TUHAN adi bibatŭn ngga anjung anŭ mbŭh ride dŭ so anŭ adi di takah anŭ adi di ribo-i isa giragar birit anŭ bisa dog sangan adŭ di tunduh sindung adi di ribo-i, isa dŭhsah nyirubong sindung yŭn kasŭk tŭbŭn giragar.

⁷Dudu batuh adi dog pakai ngga pijog Ramin TUHAN dog ndu ka dog mŭŭt di kwari isa ratok rago pabā ngga kapak ngga pingakas basi adi bŭkŭn dŭh dog dingah di tarun adi yŭn Ramin TUHAN dog pijog.

⁸Tiban adi so nŭŭh mŭrŭt takah sagan[11] birit birit anjung anŭ agi di tura ka siratan Ramin TUHAN, ka agi tungoh maad ka takah duwŭh ngga ka takah taruh.

⁹Jadi Raja Solomon ngamas pijog Ramin TUHAN. Ayŭh ndai dek-i pakai kayuh sedar ndu papan ngga giragar-i.

¹⁰Birit birit anjung anŭ adi bitakah taruh, 2.2 mita bigatung barang takah,[12] mbŭh dog pijog bitubu ngga sindung sapa Ramin TUHAN pakai giragar so betang kayuh sedar.

¹¹TUHAN nang di Solomon,

¹²“Kambŭi kuu tunda sopŭrŭg ukum-adat ngga pinyipesan ku, Aku re ndai yŭn mu kayuh adi Aku mbŭh bijanji di sama mu David.

¹³Aku re rŭŭ di ruang daya Ku Israel darŭm Ramin adi kuu pijog ati, ka Aku dŭh re tagan ngara.”

¹⁴Jadi Solomon ngamas pijog Ramin TUHAN.

¹⁵Sindung Ramin TUHAN tura ka darŭm dog nurap ngga kiping papan sedar so yŭn bidigang ndŭg dek-i, ka papan yŭn bidigang dog ndai so tŭngŭn kayuh sipres.

¹⁶ Ndi birit adi di darŭm-i, dog kadŭn Yŭn adi Siabo Kudus dog ndai di parad ka punok Ramin TUHAN. Ambu birit anŭ agi 9 mita ka dog nyindung ngga papan sedar so yŭn bidigang ndŭg dek.[13]

¹⁷Birit adi di jawin Yŭn adi Siabo Kudus mbŭh 18 mita ambu-i.

¹⁸Papan sedar adi nurap sindung mbŭh dog mŭŭt gambar buwa buwa rigo ngga bunga bunga. Ndi tarun tarun darŭm Ramin TUHAN mbŭh puno adŭ dog nurap ngga sedar, isa batuh batuh sindung dog matŭn ka dŭh tungang dog kiris.

¹⁹Ndi birit di darŭm dog ndai tura ka punok Ramin TUHAN, adi yŭn Pati Simanya re dog piguru.

²⁰Birit anŭ mbŭh 9 mita ambu-i, 9 mita buka-i, ka 9 mita bigatung-i, ka ndi tarun tarun dog nurap ngga tigŭrŭ mas. Mija-sambah dog nurap ngga kiping papan sedar.[14]

²¹Sindung darŭm Ramin TUHAN dog nurap ngga mas, ka parik parik mas dog na bada nyikutang bŭŭn tiban birit adi di tura ka darŭm, adi dog nurap ngga mas gŭh.

²² Ndi tarun tarun darŭm Ramin TUHAN mbŭh dog nurap ngga mas, samŭn mija-sambah adi di darŭm Yŭn adi Siabo Kudus.

²³ Duwŭh cherubim mbŭh dog mŭŭt so betang kayuh kanā ka dog piguru di Yŭn adi Siabo Kudus. Soduwŭh-i 4.4 mita bigatung-i.

²⁴Soduwŭh-i nyimati buang brimun. Barang pŭrŭng-i biyŭn duwŭh urad. Ndi urad 2.2 mita ambu-i, ka juan asah barang tŭbŭn urad agi 4.4 mita so anŭ ndi.

²⁷Ngara dog pijog bada bidindar darŭm Yŭn adi Siabo Kudus, isa duwŭh urad ngara adi tiburai bitatok ngga tung dingan-i, ka duwŭh urad adi bŭkŭn nyindong sindung birit anŭ.

²⁸So-duwŭh cherubim anŭ bibarut ngga mas.

²⁹Sindung birit bās samŭn sindung birit adi tura ka darŭm mbŭh dog ngabuh ngga gayŭn cherubim, gayŭn tŭngŭn kurma, ngga gayŭn bunga, adi dog mŭŭt.

³⁰Ndŭg ka yŭn bidigang dog nurap ngga mas

³¹Tiban brembang adi dog ndai so tŭngŭn kayuh kanā mbŭh dog na di piburong tiban Yŭn adi Siabo Kudus, ka-i masip di sambu-i

³²Tiban brembang anŭ dog ngabuh ngga gayŭn cherubim, gayŭn tŭngŭn kurma, ka gayŭn bunga, adi dog mŭŭt dieh. Sindung, cherubim, ka tŭngŭn tŭngŭn kurma dog marut ngga mas.

³³Yŭn tiban adi so nŭŭh mŭrŭt ka darŭm birit bās, sibukah tiban adi misagi pat mbŭh dog ndai so tŭngŭn kayuh kanā.

³⁴Agi duwŭh tiban brembang adi dog ndai so tŭngŭn kayuh sipres

³⁵ka dog ngabuh ngga gayŭn cherubim, gayŭn tŭngŭn kurma, ngga gayŭn bunga, adi dog mŭŭt ka dog marut ngga mas.

³⁶Ndi badag tura ka darŭm agi dog ndai di jawin Ramin TUHAN, adi dog kirurung ngga sindung adi dog na ndi turap parang parang kayuh sedar di barang asah taruh panggar batuh adi bisandug.

³⁷Pinagap-rasan Ramin TUHAN dog na darŭm buran adi duwŭh, anŭ inŭh buran Ziv, darŭm sawa adi pat Solomon mritah Israel.

³⁸Darŭm buran adi mai, anŭ inŭh buran Bul, darŭm sawa adi simŭng ndi Solomon mritah Israel, Ramin TUHAN mbŭh kamas, batur nanyam adi mbŭh dog ngatur. Ju sawa Solomon ndai Ramin TUHAN.